Damdawi （Drugs） an siamdan tlangpui

Dr. K.Vanlaldinpuia

Assistant Professor

Department of Chemistry

Pachhunga  University College

Damdawi te hi awlsam taka siam a ni ngai loa, hman theih/ei theiha peih tur chuan stage/ phase 4/5 emaw a kal tlang a ngai thin a, tlem tlem han thai lang zawr zawr ila.

1. Drug discoveries and development: Laboratory a siam chhuah emaw, thlai leh thil nung dang atanga drug lakchhuah. Hei hi tunah ka lab ah kan kalpui ve mek.

2. Preclinical trail: Khang damdawi chi thar laboratory a siamchhuah te kha a that leh that loh chi hrang hrangin an test hmasa thin a. Anti-microbial activity an neih dan bio-safety cabinet ah  method chi hrang hrang hmangin zirchian a ni thin a. Hei hi _in vitro_ studies an ti. Chumi hnu ah mice (chaichim) leh rannung dangah a that leh that loh test leh thin a ni a. Hei hi _in vivo_ studies an ti thung. Hemi bakah cytotoxicity leh thil dang tam tak, hemi stage ah hian zirchian a ni thin a. Hun pawh a duh rei hle. Chuta promising deuh te chu clinical trail atana tih an ni thin. Mizoram ah hian anti-bacteria, anti-fungi, anthelmintic activity te kan test ve thei a. Anti-viral property an neih leh neih loh erawh kan test thei hrih lo, BSL-2 a ngaih avangin.

3. Clinical trail: Hei hi chu mihring ah kha damdawi kha a that leh that loh an test thin a. Mi 3000 lai ah te an test thin. Preclinical trail a tha tak si, clinical trail a tla leh si hi a tam hle a, a chhan chu kan taksa a enzymes leh biomolecules dang awm ten an lo khawih danglam theih thin vang a ni a. A natna tak a va thlen hma ten an lo kehchhe thin bawk.

4. Review and monitoring: Clinical trail an paltlang tawh chuan mipui hman theih a ngaih an ni tawh a. Mahse uluk taka review a niin, hun rei zawk a side effect an neih dan te thlithlai reng an ni.

Damdawi thar hmuhchhuah hi thil namai hi a ni lo a, a pangngai ah chuan kum 3-5 te a duh thin. Chupawh hmanrawh tha neih in. Covid-19 chungchangah erawh a hlauhawm zia hria in sum tam tak thehchhuah a ni a, Scientist te an che suau suau a ni ber e. A damdawi pawh an hmuchhuak vat in a rinawm.