I NUI HAWK HAWK MAI TEH ANG U

-Rev. Lalbiakhlira

Covid-19 hripuiin khawvêl a tuam hlup hlup mai a! An thi ruih ruih! Khawvêl a tâlbuai!Kan thaw a i-pik tlat! Inah kan tawm-im tlat bawk si! Hindu pâ, kan PM, Pu Modi-a pawhin chhûngkaw tawm-im mêkte kan hlim theih nân chhepchher khawn rîk te, êng chhit te a rawt. A ho lo! Indîp hauh loa kalkawp thei 1 ka'n rawt ve ang e, "I nui hawk hawk mai teh ang u" tih hi.

I. TUTE NGE NUI THEI LO?

Tute nge huatthu chhia? Nui ngâi mang lo te! Tute nge "Ka nâ!" ti reng țhin? Nui ngâi mang lo te! Tute nge a bawplawka thil lâk chîng? Nui ngâi mang lo te! Tute nge "Saw pa/nu saw ka ngei a nia! A nuih dân te saw...!" ti țhin? Nui ngâi mang lo te! Tute nge nun ninga beidawng hial țhin? Nui ngâi mang lo te! Tute nge manganga chiâi thuai țhin? Nui ngâi mang lo te! Tute nge inhau luih luiha chênpui hreawm? Nui ngâi mang lo te! Tute nge piangthar hlei thei lo? Nui ngâi mang lo te! Tute nge midang ngeia haw țhin? Nui ngâi mang lo te! 

II. ENG VÂNGIN NGE KAN NUIH ANG?

(1) Pathianin nui turin min duh! Țap țhin te, lungngâi țhin te, hreawm țhin te, nuihna tur chhan rêng hmu tawh lo te tân a fapa mal neih chhun, aw, a neih chhun liau liau, Lal Isua min pê tawp mai! Hlim turin min va duh em! Kan hlim loh chuan, "Haleluiah!", "Amên!", "Hosanâ!" te hi pêk theih a ni hleinêm! Bible thupui pakhat chu "Hlim, nuih, lâwm" hi a ni asin!

(2) Lal Isua ringtute kan nih avângin kan nui ang chu! Amah Isua ngêi pawh kha Bible-in "Isua a nui a" a tih loh avâng ngawtin, 'nui ngâi lo' emaw i ti ang e! Pathian tak ni mah se mihring tak a ni alâwm! Nui ngâi lo a nih zawngin mihring tak a ni thei dâwn em ni? Mi hausa tân Pathian Ram luh a harsat turzia a sawi dân hi ngaihtuah teh: "Mi hausa Pathian rama luh aiin sanghawngsei, hriau benga luh tlang a awl zâwk," a ti! (Mk 10:25). A ngâithlatu tân nuih hawk hawkna tham a ni asin! Kan nuih hian Isua nun kan țawm a lo ni reng mai!

(3) Mi puitling leh fing apiang an hlima, an nui tam! Nui ngâi lo chu a puitling lo tihna; a tûm nilêng zankhua țhak mai ang! Chutiang mi bula awm reng chu tumâ'n a nawmna an pawh ngâi lo! "Ekhâi! hlim rawh u, nui rawh u, Ha ha ha ha ha!" tih hi tu phuah nge? Tu maw? Upa Rokûnga in ti em ni? Mi puitling tak a nih chu! "I hlim ang u, Lalpa fakin, Kan Tlantu, kan Pathian fakin; I thinlung ngui tûnah lâwm rawh..."(KHB 425) tia min sâwmtu Rev. P. Doddrdge pawh hi a tûm buau lo tawp ang! Mi fing an nui a, an hlim țhin. Kei chu ka nui fo!

(4) Nangma tân i nui tih hre reng teh. I nui thawm chuan midang nun a châwi kâng a ni mai hleinêm, i nun chhûngril a fan vek asin! I hmêl a lo êng sawt sawt ang a! I vun a lo nung sarh ang! Awih lo tawp mah la, "Nuih hi damdawi țha ber a ni! (Laughter is the best medicine!" tih hi thufing a ni reng tho tho dawn! I nuih theih loh chuan damdawi in lam i mamawh tawh a ni mai thei asin! Nangmâ'n i ngeih; midang nui duh miah lo mah se, i hlêp a bo thei lo!

(5) Midang tân nui rawh! I melh râwm te, i tûm khum buau te, engemaw i sawi hluk paha i kal daih te, 'i mâwl' i tih te kha...a tîrah hreawm an ti ve deuh a! An ngaihtuah chhunzawm neuh neuh a, 'engemaw hriatchhuah' an nei ngei țhin. Chu chu "A â deuh a niang!" an ti che a; an dam leh mai! I nuih fo erawh chuan, Thotlê ar-êk-pa-chal hmû ang maiin an ngainâ ang chia; i hlu ngawt ang! 'Kalbo rawh u!' ti pawh ni la, i nuih chhûng chuan i kawr hmâwr dek țalh duh an kuhțul tho ang! I thih palh vaih chuan, "Ka va ui tak em!" tia țap țap tur hi, a tlêm berah, dawzawn 1 chu i ngah sa! 

III. NUI TURA HRIAT TUR TLÊM:

(1) Nui thei lo, "Ka thei ngang lo alâwm! Ka dam lo miau a!" i ti em ni? I na êm a nih tak kha! Mahse, hei hi hre teh, na nei chunga nuih theihna a awm; Pathian hnênah inhlân rawh. A nuihtîr ang che.

(2) Zahmawh kan sawi ang a, kan nui ang maw? Tehsuh e! "Zahmawh te, thu lawi lo sawi te, fiamthu te pawh, chung chu a mawi lo a ni; chung tih ai chuan lawmthu hrilh zawk rawh u" (Eph 5:4) thu hi hre reng la, zâwm zâwk rawh. Zahmawh sawi leh nuihpui bânsan vek pawh ni ila, fiamthu awm sâ leh phuah belh tur hi a la tam lutuk!

(3) A nih leh 'fiamthu' pawh a duh loh khi, Bible thu khian! I ti dik e. Bible duh dân kan zâwm tur a ni alawm. Bible-in "Nui suh u" a ti lo! Han inngaihtuah chiang teh, Bible duh loh chu i hrethiam mai ang. "Ka fiamthu a nih kha! I mâwl hle mai!" tih chângchâwiin mi engzâtnge i tihnat tawh! Bible duhdân chu a chiang mai tiraw...Pathian hre reng chungin i nuiin i hlim thei. Kristian nuih chu a thianghlim bîk asin! Midang a deu ve lo a; a tina ngâi hek lo. Midang châwikâng hlauh thung a; amah pawhin a ngeih! Vânram hlim lâwmna nên a inzawm tlat nia! 

(4) Khawvêlin "mi hrisêl" a hrilhfiahna pawh, "Taksa, rilru, thlarau- mihring pakhata mi pathum awmte hlim tlân vekna" ngat a ni asin! Harsatna thlipuiin a nuai lai ngei che hian i rilru leh thlarau tal nui teh se!

(5) "Kan nui reng thei em ni? Lusûn mêkte pawh kan ni alawm!" I ti dik e. Bible pawhin "Nuih hun a awm" a ti alawm! (Thuh 3:4). Hun tam zâwk hi hlim taka nuihna hun a awm asin! Nuih hun hi a vântlà nghah chi a ni lo; mahni'n siam châwp chi! I thlarau a fuh phawt a ngâi; i rilru leh i taksa nên. 

Bible chuan Covid-19 hripui avâng te, harsatna dang avângin kan țap a ni mahnâ; Lal Isuan, "Nangni tûna țapte û, in eng a thâwl e; in la nui dawn si a" (Mat 6:21) a la ticheu nia!