FIFA World 2022 - Khelmual

Hmaa Hauzel

Khawvela ennawm ropui ber ' Fifa World Cup' chu November ni 21-ah khelh tan a ni dawn a. Thlasik World Cup khelh hmasak ber tur hi ram hausa Qatar in a thleng dawn a nih kha. Qatar hian World Cup thlenna tur liau liau in khelmual ropui tak tak a sa thar a. World Cup 2022 khelhna tur khelmual pariat kan fang kual ang.

Lusail Stadium

Entu mipui 80,000 lenna Lusail Stadium hi World Cup 2022 a khelmual pawimawh ber tur a ni a. He khelmual ropui zet mai, World Cup thlen nan liau liaua sak thar hi Doha khawpui laili atanga mel 10-a hlaah a awm. Lusail Stadium-ah hian World Cup 2022 hawnna hun neih a ni dawn a, final khelh a ni bawk ang. Inkhel ngaihven hlawh pahnih a thlen bakah hian inkhel pawimawh tak tak pariat a thleng tel dawn bawk.

Lusail Stadium hi kum 2022 kum tir lam kan peih fel a, hawn chauh a ni a, World Cup zawhah chuan mipui thutna tam zawk lak bo an ni ang a, Football khelmualah hman zui mamawhna awm tawh dawn lo bawk. Lusail hi Qatar khawpui thar ni tura duan mek a ni a. Lusail Stadium ngei pawh hi an khawpui thar tih hmasawnna atan hlan a ni ang.

Al Janoub Stadium

World Cup 2022 a inkhel pa sarih ngahna tur Al Janoub Stadium hi World Cup khelhna tura peih fel hmasak ber pawl a ni a, May, 2019 khan peih fel a ni tawh. He khelmual hi British-Iraqi architect, Dame Zaha Hadid design a ni a. A design tu Hadid hi kum 2016 khan a boral a, a boral hnuah a design angin sak a ni ta tho thung. He khelmualah hian entu mipui sing li an leng a, Doha khawpui laili atanga mel 14-a hlaa awm a ni.

Al Janoub Stadium pawh hi Worl Cup khelh zawh hunah tih danglam a ni leh dawn a, mipui thutna sing hnih zet lak bo a ni ang a, Thil dangah tangkai zawkin hman a ni ang. He khelmual design hi a dangdai viau a... han en vang vang la a an deuh i hre mai thei... a an deuh chu... sawi chi loh...!

Al Bayt Stadium

Semi-final bakah inkhel dang paruk thlengtu tur Al Bayt Stadium-ah hian entu mipui 60,000 an leng a. He khelmual mawi tak mai hi Dar Al-Handasah-a design a ni. He khelmual awmna hmun hi November thlaah pawh a la lum hle dawn a, khaw lum lam hi 30C a la ni veng mai dawn. Hei vang hian entu mipuite tan awlsam zawk turin a bul hnaiah hian five-star hotel leh shopping centre lian tak tak a awm nghal nghe nghe.

Ahmad Bin Ali Stadium

Entu mipui 40,000 lenna Ahmad Bin Ali Stadium hi thlalera awm a ni a, he khelmualah hian last 16 chin chung lam inkhel paruk a thleng ang. Ahmad Bin Ali Stadium hi khelmual thar hlak a ni lova, World Cup thlen nan tuaihnum thar leh a ni a. Tuna hmanraw tam zawk pawh hi an khelmual hlui a mi kha a la ni nghe nghe.

Education City Stadium

Entu mipui singli lenna Education City Stadium hi lunghlu pianzia (Shape) a sak a nih vangin 'the diamond in the desert' tia sawi a ni thin bawk. World Cup khelh zawh hunah pawh football khelmualah hman chhunzawm zel a ni ang a. Qatar hmeichhe team khelmual atan ruahman a ni. He khelmual hian 2021 FIFA Club World Cup a Bayern Munich leh Tigres te inkhel kha a lo thleng tawh nghe nghe a. Education City Stadium hian World Cup 2022 ah inkhel pariat a thleng ang.

Al Thumama Stadium

He khelmualah hian entu mipui 40,000 an leng a, World Cup 2022-ah inkhel pariat nghah a ni ang. World Cup khelh zawh hunah mipui thutna sing hnih zet lak bo a ni ang a, ram hmasawn nan hlan a ni ang. He hmunah hian mosque leh hotel hawn a ni zui dawn a ni.

Stadium 974

Entu mipui sing li lenna Stadium 974 hi hmaraw thiar sawn zung zung theih 974 leh hman raw dang lak sawn zung zung theih chuktuah khawma sak a ni a; World Cup 2022 thlenna tur liau liaua sak lai lawk a ni. Stadium 974-ah hian inkhel pa sarih nghah a ni ang. World Cup 2022 zawh hunah chuan football khelmual angin hmuh zui a nih a rinawm loh.

Khalifa International Stadium

He khelmual hi Qatar-a football khelmual lar leh upa tawh tak mai a ni a, kum 1976 daih tawha lo sak tawh, changkang leh changtlung zawka thuam that zel niin, Qatar national Stadium a ni. He khelmual hian kum liam ta mai khan Emir Cup final a thleng a, he final hi mipui 40,000 zetin an en nghe nghe a. 

Asian Games, Gulf Cup leh AFC Asian Cup bakah IAAF World Athletics Championship -2019 te he khelmual hian a lo thleng tawh bawk. World Cup thlenna tura chei hnum a nih angin entu leng zat pawh an pung hret a. Mipui 45,416 zet an leng tawh a. Khalifa International Stadium-ah hian inkhel pariat nghah a ni ang a; pathumna an inchuhna hmun tur a ni.