Social Media vs Print Media

Ngura Sailo Zofa

Ram changkang leh hnam changkang zawk ten phone an siam chhuak a, Facebook an siam chhuak a, mahse, anni ramah chuan vawiin thlengin lehkhabu leh chanchinbu hralh a tlangtla reng tho va, ziak leh chhiar lamah an hnufual phah chuang lo. An library leh lehkhabu dawr te pawh a hnawn phah chuang hauh lo va, ziakmite pawhin hna an hmuh dan leh an sum lak luh a ngai reng tho a ni.

Keini Zofate hi eng kan ti ta nge ni lehkhabu leh chanchinbu zawrhna dawr te hi a țhin rup tak mai le? Kan library te lah chu thla a hrang mai awm mang e tih hlauhawm khawpin a reh ngawih ngawih mai a ni. Chuvangin lehkhabu dawr leh lehkhabu hawh theihna dawr țhenkhat chu a bo pheuh pheuh bawk a. Mobile phone zawrhna dawrin a luahlan zo ta. Kohhran chanchinbu leh mimal chanchinbu te pawh manganthlak khawpin a copy tihchhuah zat a kiam ta duai duai mai zawng a ni e.

Chungte avang chuan ziak mite sum hnar a chat mai ni lovin an chawbel a keh ta ti ila uar lutuk chan kan chang em lo`ng chu maw!. Changkanna tuilianin min chim a, IT khawvelah kan cheng mek a, Social media hian print media chu ral runin a run mek chu a ni ta ber mai. Heiha,,,,huiha…. Mobile phone hi kan pathian a ni hlawm ta ber lawm ni? Hnathawhnaah, School class-ah,Bus-ah, kawnga kal lai pawhin khawih kan țhulh chuang lova, Ek inah pawh chuti tho, khumah phei chuan sawi lohva lum. Khawtlang leh kohhran hnatlan nikhuaah pawh he thil hian hna a tisawt lo va, Chhungkhat laina, țhenrual, chhungkua, nupa adt…te pawh inhnaih reng si a min inhlattirtu chu he thil hi a ni.

Ti ti sawi a awm tawh lo va, inkawm chet chetna hun a awm thei tawh hek lo.Kan thai chho va, kan thai phei a,kan hai thla leh a, tu lawm hleih lovin kan khi leh vur vur a, kan tûm leh hmuk a, a changin thawpui kan chhuah a,a changin kan hui pap pap a, he thil hian kan hun hmun thuma țhena hmun hnih chu nitin hian min ruksak hiau hiau mai a ni ber lawm ni. “A hmangthiamtu aiin hmang thiam lotu kan tam zawk” an tih hi a dik a rinawm hle a ni.

Online hmanga thu țha leh hringnun tana hmasawnna thu chhiar chet chet peih chu mi sawmah pakhat tluk pawh kan awm meuh ang emaw chu? Miin thu țha an post a thuziak a sei deuh phei chuan “Ka hman hunah ka chhiar leh ang” tih chu comment-na tam ber a ni țhin. Chuvangin fb ațang hi chuan hringnun tana hmasawnna lam hi kan chhiar lo tlangpui chu ni ta berin a lang. Hringnun khawsak a lo changkan a, Mobile phone ( Internet) kan hman hian chhiar lamah nasa takin kan hnufual phah a, intihawi zau leh intichangkang viau mah ila, kan changkanna hi a zik a bul ta tlat thung ni. Chanchinthar ( News) chhiar tam hian fin varna min pe lo va, tunah kan hria a ” A va mak ve” kan ti a kan theihnghilh zui leh nghal mai a heng hian hringnun hmasawnna a paw chhuak hlawl lo a ni. Hnam changkang, ram changkang leh hmasawn kan tihte hi mipui mi mirin hringnun hmasawnna lam lehkhabu nasa taka an chhiar vang a ni. Kan țhalai rualte hian degree a thuah a thipin khum mah se, print media an hlamchhiaha social media chauh an tuipui chuan țhangthar mâwl kan kawl țeuh ang a, tun hnu kum sawm velah chuan nu leh pa mawl an pung zel ang a, chumi ina a rah chhuah chu naupang mawl kawl țeuh a ni tawh mai a ni. Kan khawtlang chu mawlnain a tuam vel dawn a nih chu.

Pathian ațanga chhuak finna chu dah țha ila, khawvelin a pek finna hmu tur leh chhar tur hian, college kaia, kum khata pawl san belh zel khan chu finna chu min pe hauh lo, kan ram zirna phei hi chu by-heart system a ni a, a taka practice a awm ve loh avangin intihtheih nana hman tlak a ni lo va, mi hnena inchhuan phah nana hmanpui chi a ni hlawl lo a ni. Chuvangin, lehkhabu chhiara nunchan kan inzir loh zawngin he generation hi ngaihtuahawm tak a ni zui zel ngei ang.

Zan tairek thlengin kan online a mut nachang kan hre lo va, kan mut lahin thawh nachang kan hre bawk hek lo. IT avang hian kan khawvel hi a zim phah an ti em ni kha, a dik kher mai, mahse IT luhchilhtu sawma pariatte hi chu IT avang hian kan hriatna a zim a keimahni pawh kan zim sawt ta hle a ni mai lo maw.

Ram leh hnam leh khawtlang leh kohhran hma a sawn theihna tur atana a thuk phum pawimawh tak chu ziak leh chhiar ( Literature ) lama hmasawnna hi a ni a, Social media aia Print media hi ngaipawimawh zawk tura kan țhalaite leh naupangte hnena lehkha chhiar tura inzirtir hi a ni dawn lawm ni.

Hawh u, hranghluite hian thawka kan puan vente sawi chhingin, kan fa kan nau, kan țhalai rualte hi chhiar turin i han zirtir tak tak teh ang u, chutianga kan zirtirna an pawm a an zawm ngat zawngin kan khawtlang leh kohhran hian hma a va sawn nasa dawn em!