Unji Lasi awmzia

Hmaa Hauzel

Football hmanga khua leh vengte inelna lian leh ngaihhlut hlawh tak; LBS Suzuki All Inter Village Football Tournament, 2022 (a hming dehduah hi aw.... tiang duaha sei lo, tawi fel deuha phuah a duhawm mang e aw!!) ah Sialhawk an cheṭha viau a, final an thleng der tawh. Inelna neih mekah Sialhawk an thleng sang telh telh a, an khaw bil ṭawng 'Unji..Lasi' a lar telh telh a, tunah chuan ram pum hriat ṭawng a ni der tawh. Social media leh titi-na hmunah a lar viau lai hian a awmzia hria kan tam lo mai thei a. PostSport (The Aizawl Post) in 'Unji...Lasi' awmzia kan zawhna chhangin an au hla buaipuitu Pu Isai-an a awmzia min hrilh.

'Unji..Lasi' hi Sialhawk khaw bil ṭawng, hun rei tawh tak aṭanga an lo hman tawh; awmze pahnih nei a ni. A awmze pakhat zawk chu inchibaina (hello / hi) tihna ang deuh hi a ni a. Khawdangah Sialhawk mi an inhmuh a, Chawngkawr posi-a kut an phar a, 'Uuunssiiii..Lassi" an tih chuan 'E kha i dam maw?, in va ngaihawm em em ve adt." an tihna ang a ni. "Unji...Lasi..." tia an lo chhan let chuan.." In dam zawk maw? Nangni deuh a lawm ngaihawm...".. tia an lo chhanletna ang a ni.

A awmzia pahnihna mi thusawi an awih lohzia tihlanna leh tihelna a ni ve thung. Miin thu an sawi a, an awih loh zawng deuh mai a nih chuan 'ka awih lo eee' ti mai lovin... 'Unnnsiii..Lassi' an ti ta ṭhin a ni. Miin thu an sawi laia 'Unj Lasi..' ti an lo awm chuan a sawitu tan sawi chhunzawm chi a ni tawh lova, zak tak chunga ngawih hmak kha an finthlak ber tawh a ni awm e...! Chuan 'Unji..Lasi' tih hi 'Unnzi....Laaa..zii' tia lam tur a ni e' Pu Isaia chuan a ti bawk. 

'Unji, Lasi' hi Sialhawk khuaa vohbik Pu Sangber-a chinchhuah a ni a. A chingchhuaktu Pu Sangber-a hi a la dam nghe nghe ni.