Rev. L.Rema
1. Chhinlung chungchanga Zofate tui halna : Zoram chhung leh pawna cheng Zofate hian kan tobul (Zofa Origin) hi chiang fek fawka, hria leh sawi thei hi kan vang hle mai a ; a tam ber chuan Chhinlung chhuak kan ni kan ti deuh ber a; Amaherawhchu Chhinlung chu eng nge ni a? Puk nge? Lungkua nge? Mihring hming nge? Khua hming nge? China Lal pakhat hming nge? tiin chianglo takin a tham ral mai mai em mi. A hming ah ringawt pawh hian chiang fek fawk a sawi thei kan awmlo hi Zofate tui halna pakhat chu a ni.
3. Chhinlung a awm: Zofate zinga Hmar hnam hian duhlian tawnga Chhinlung kan tih hi Sinlung an tia. Chhin tih hi Sin tiin an hmang a ni. AD 800 vel bawr pawh khan Chhinlung atanga thlang an tlak thu kha hla an lo phuah thlap mai a, hetiang hian,
Hmar tawngin:
Khaw Sinlung ah Kawt Sial ang
Ka zuong Suaka mile nello tam e Hriaemni hrai ah
Lusei tawng:
Chhinlung khua atangin Sial a
a huanga a zuang chhuak angin
kan zuang chhuaka mihring fate
tiin Hmar hla hlui bu ah hmuh theih in a awm.
Tin Hmar pi leh pu te hian Sinlung khua atanga an ram thlang tlak lai hian Sinlung khua, an pianna ram an ngaih thu hla hmang bawkin hetiang hian an phuah.
Hmar tawngin:
Ka siengna Sinlung ram hmingthang Ka nu ram, ka pa ram ngai, Chawng zil
ang ka kir thei chang siem,
Ka nu ram ka pa ram ngai
Lusei tawngin:
Kan pianna, Chhinlung ram hmingthang
Ka nu ram ka pa ram ngei chu
Koh kir theih chang sela Aw ka ti thin
Ka nu ram ka pa ram ka ngai........
an lo tam hle mai.
Khawvela hnam hrang hrangte hian an hnam pian chhuahna, an tobul an thlah tute chanchin hi a chiang thei ang berin an history bu-ah dik takin an ziak a, class V to X zirlaiten an hnam tobul (origin) chu dik takin an zirin an hre hneh hle a ni. Keini Zofate erawh hi chuan mahni tobul dik tak chiang fek fawk a sawi zar zar thei kan vang hle awm e.
Awle, engpawh nise, Chhinlung chu a awm ngei a ni tih he Hmar hla hlui buah a lo chuang kiau mai hi Zofa tobul Chhinlung hi a lo awm tak tak a ni tih a nemnghet chiang hle; chuvangin, Chhinlung chu khua a ni tih pawh i hre nawn leh ang u.
4. Chhinlung khua chu khawi ah nge a awm: Chhinlung hi khua a nih chuan khawi ramah nge a awm? tih hi lo chhui leh ta ila. Mizoram atanga khawchhak ram ropui tak China ram Sichuan Province Garze District Yalong lui kam ah duhlian tawnga Chhinlung khua chu a awm a. Hmar tawng chuan Sinlung an tia tuna a khua a cheng Tibet ho pawhin Sinlung khua an ti.
Awle, Zofate lo chhuahna Chhinlung chu khua a nih thu te China ram chhunga Sichuan Province chhunga Yalong lui kam ah a awm tih kan hre tawh bawk a. Khawnge khual pang zin tal in ka han kal teh ang tiin ni 22.2.2012 khan Venghnuai, Aizawl atangin China ram Sichuan Province pan chuan ka chhuak ta hlawl mai a, Myanmar paltlangin China ram Yuman Province chu tluang takin ka thleng a, Chanchin Thaa ka rawngbawlpui China Pastor Yanjinfua chu Chhinlung/Sinlung khua Sichuan Province a awm chu han tlawh turin ka sawm ta chawt mai a, Pastor hian a bial leh a nupui fanau kalsanin, Chhinlung khua tlawh tura ka sawmna chu min yes pui ta chu, Pathian thil rel dan hi ava mak em !! tih hla kan thunawn awn awn mai a ni.
Tichuan, harsatna lutuk awm lovin Chhinlung khua chu 19th March, 2012 tlai lam dar 6:15 pm khan Chhinlung khua a Hotel pakhat ah kan lut ta rawih mai a, kan thlen veleh hah pawh sawi thei lovin ka thianpa Pastor Yanjinfua nen Pathian hnenah lawmthu sawi tawngtaina kan (Note - Chhinlung khua ka zinna video hi Youtube-ah “Chhinlung lamtluang” tiin type ula a movie-in a hmuh theih ang, evidence atan.)
Awle, kan Chhinlung zin kawng chhuk chho tak chu kan sawi vek seng lo ang. Kan ziak chhuak vek seng lo va. Amaherawhchu, Chhinlung kan hriat dan, a awm leh awm loh thu-ah te, Sinlung leh Chhinlung tih thu-ah chuan kan ngaihdan tlangpui sawh sawn a tul pawh a sawh sawn ngam turin, sahuai thing vawn tlat lovin pen khat talin hma i sawn ang u.
5. Chhinlung khua kan fang: Chhinlung khua kan fan chungchang hi kan sawi kim thei dawn lova a tlangpui chauh aw.
March 20, 2012 .Nilai a ni a, China sana ah chuan zing dar 6:30 am-ah kan tho va, Sinlung/Chhinlung khua chu a lo eng ruih mai a, a vawt em em mai bawk nen; Chhinlung leilung kan rap ringawt pawh kha ka thinlung chhungril tak atangin hlim leh lawmna in ka khat a, ka thianpa China Pastor Yanjinfua nen zing nichhuak engmawi tak kar ah Yalong lui kam thingpui dawr pakhat ah kan lut a, thingpui in pah in vawin Chhinlung khua kan fan dan tur te programme tlangpui kan sawi dun a, video camera pahnih kan ken te pawh kan ak chhuak a, kan phur dun khawp mai.
6. Yalong lui kamah ka ding: Chhinlung khawlaia luang, Yalong lui zawh thlain kein khua kan fang tan a, Yalong lui kanna concrete bridge hmun thum lai ah an dawh a, a thlang ber lei bul Yalong lui kam a dingin thu tawite ka sawi a. Hetiang hian
(a) A hmasa berah chuan Pathian hnenah mumang pawh a kan la man phak loh zofa te lo chhuahna Sinlung/Chhinlung leilung chu ke ngeia rap thei tur a min hruai thleng Pathian hnenah lawmthu sawina ka nei hmasa ber a ni.
(b) Zofate tobul Sinlung/Chhinlung khua zofa te zingah thleng hmasa ber ka nih thu te Yalong lui kamah dingin thu ka sawi bawk a ni.
(c) Sinlung/Chhinlung ka thlen theihna tura min hruai thleng tu China Pastor Yanjinfua hmaihma ah lawmthu ka sawi bang thei lo bawk.
7. Sinlung mual zawl ah kan leng: Sinlung/Chhinlung khaw mawng Yalong lui kanna concrete lei sei ve deuh chu kan zawh phei a, kawngpui kan thleng a. Sinlung mual zawl pan tur chuan steps ah kan chho va, mual zawl ah chuan hmanlaia mi huaisen Amry General Lianhua a lim sakawr chunga chuang lai a ding luah mai a. Tun thlengin Lianhua a lim hi Sinlung khua luahtute hian an hlut in, chawimawina pangpar mawi tak tak an la hlan reng thin a ni.
Tin Sinlung/Chhinlung khuaah hian Tibet hnam Dalai Lama Buddhist sakhaw biate an tam ber.
Awle, Sinlung/Chhinlung khuaa kan cham chhung hian hmanlai kan pi leh pu ten an lo luah laia mitthi an phumna thlanmual kan tlawh a, kan pipute an thlang tlak hma khan mumal takin thlanmual an lo nei a, an thlang tlak hnu a Sinlung khua luahtute hian vawin ni thlengin tumah he thlanmualah hian an phum thiang lo. China sawrkarin a enkawltute dahin fai tak leh thianghlim takin an vawng fai a ni. Thlanmual photo hi Chhinlung chhuak Zofa tih lehkhabuah a chuang a, a mamawh tan Synod Bookroom ah a awm.
8. Sinlung Rial ka ei: Sinlung khua kan cham ni hnih naah chuan zing ni chhuak eng mawi tak mai hian Yalong lui dung chu a rawn chhun eng ruih mai a. Yalong lui hnar lam atangin lui mawng lamah ka thianpa China Pastor Yanjinfua nen chuan kan chhuk thla leh a. Minute 15 vek kan kal chuan lui lian vak lo (lui te) hmar lam atanga rawn luang thla chuan Yalong lui a rawn finna hmun kan thleng thla a. Chu luite a kam tawn tawnah chuan Metal Road kawngpui tha tak mai hi a awm a. Kan veilam panga kawngpui chu kan zawh chhova kawngpui sirah chuan chenna in an sa tlar ve thlap mai a. Thui pawh kan la kal hmain building lian ve deuh sen ver vur Jail In hi a lo awm a. Kan kal chho zel a thing zaina hmun te, buh herna khawl te, leh sangha khawina dil lian ve deuh te a lo awm a. Kan chho zel a Sinlung khaw dai ani tawh mai a, bawng, sial, beram leh kel te an vulhna hmun kan thleng a. Remchang tak maiin chawlhna tur thingpui dawr kan thleng chu bawnghnute leh artui te kan ei ve a. A tui khawp mai, minute 30 vel kan chawlh hnu chuan lui lehlam kan panin thing leihlawn chu kan zawh kai a. Yalong lui lam panin kan chhuk thla leh ta a. Lui te in Yalong lui a finna kan thleng hman chiah tihah chuan thli a rawn telh thut mai a. Khua a rawn thim khup khup a. Ruah a rawn sur nghal buan buan mai a. Keini pawh a hnai berin bathlarah kan tlan lut a, chu veleh rial a rawn tla ta pawp pawp mai a. Sinlung rial sinlung rial tiin ka zuang chhuak a. Rial chu ka chhar a, ka ei nghal bawrh bawrh a. Zofa te zinga Sinlung rial ei hmasa ber ka ni ta ringawt mai.
Tun tum atan chuan duh tawk hrih phawt ila sawi tur leh ziah tur ala tam a, kan ziak seng dawn lo Covid 19 hmai tuam te kut silfaite kha ngaipawimawh ila. Hand Sanitaizer i hmang uar bawk ang u. Tichuan, Sinlung khua zin thu, dam takin ka sawi leh dawn a ni.