Pasaltha Huaisen

Reuben Lalnunthara Hnamte

Hmanlai mizote chuan an ngaihsan ber zinga mi chu pasaltha huaisen te hi an ni a. Pasaltha huaisen ni tur chuan mi tlawmngai tak te, sa kap thei takte nih a ngai thin. Pa sakap thei tak chu an ngaisang hle thin. Thangchhuah Pa kan han tih ngat ang chi phei hi chu an dah sang hle a, tunlai ang ni ta se, India President chawimawina sangber dawng thei ngat ang tluk hial an ni ngei ang. Thangchhuah tur chuan sa lukim kah te a ngai a, huaisen a ngaiin a theuneulo hle a ni. Tunlaiah erawh chuan sakap thei chu ngaihsan an ni ta lo, ngaihsan a hnekin, sorkar pawikhawih leh environment ti chhe tu anga ngaih an ni tawh a ni. Kan tunlai khawvel changkan dan a zir zelin ngaisan zawng leh a tehna dan te pawh a lo danglam ta. Sa kap thei ai chuan Ramsa humhalh thei ten ngaihsan an hlawh ta zawk a ni.

Anih leh pasaltha huaisen chu tunlai hunah hian tutenge ni ta ang le? A tlangpuiin mipa phei hi chuan huaisen nih hi kan duh deuh theuh; dawihzep nih hi chu kan duh lo tlangpui. Hmanlai Cowboy ho hunlai phei kha chuan dawihzepa inpuh chu thihna a ni mai. Chuti khawp chuan dawihzepa inpuh leh mi dawih nih chu tunhma ang tho khan tunah pawh tumahin kan duh loh thil vek a ni. Tunlai khawvelah erawh chuan mi huaisen ni tur chuan mi dik nih a ngai thung. Rukru ngai lo, thilsual ti ngailo chuan police emaw, dan kengkawhtu a hlauhna chhan tur kha awm lo. Politician a ni emaw, sorkar hnathawk leh contractor a ni emaw, dik taka thil a ti a nih chuan atan hlauh tur tumah an awm lo.

Tunlai hunah hian mi dik leh thil tisual duh ve hauh lo te hian lawm an hlawh lo fo. Christian ram intihna hmun si ah hian dikna hian ro a rel ta lo emaw tih mai turin a te ber atanga lianber thleng hian ei theih tur zawng hian kan phe ruai ta mai a ni. Chutih rual chuan mi dik takte chuan a ruka zah an hlawh khawp thung. Mi tamtakin hnawksak lo ti mahse, mi diktakte an dikna avang khan an huaisen tlat. Dikna avanga tuar ngam, chan ngam te hi a ni kei chuan mi huaisen pasaltha ka tih ve chu ni. Hmanlai kan pi leh pu hunah khan mizote chuan dikna kha kan kengkawhtha em em, mi dikote tan hmun a awm lo tih theih mai a ni thin. Tunah erawh chuan mi dik takte tan hian hmun a awm ta lo emaw tih mai tur khawp a lo ni ta.

Tripura State a Chief Minister thin Manik Sarkara te kha a huaisen teh mai a sin. Amah kha eiruk emaw thilah han puhchhiatna tur a awm hauh lo mai a, kum 20 chuan CM a nih chhung khan in leh lo tha pawh nei lo, ro tih tham pawh a neih thu sawi a awm lo. A Bank account an han check te khan pawisa tih tham a nei lo. A Chief Minister lai khan a nupui pawh sorkar hna thawk a ni a, Office kal nan Auto rickshaw a phar ve mai a ni. Biplap kumar Deb C.M a rawn nih hnu ah khan a nih tan tirh laiin (He tih lai hi Tripura kan awmlai a ni) Manik Sakara hunlaia Cabinet minister hun rei tak lo ni tawh chu a boral a. C.M thar chu a vuinaah a va kal ve a, chuti chen Minister lo ni tawh in chu chhia a ti lutuk a, a khawngaih em em mai a; a fapa hnenah chuan “ In in sakna tur chu ka ngaihtuah sak ang che u” a tiam ringawt mai a ni.

Heng kan han sawite hi ringlo mi, Pathian pawh awm ringlo te an han ni lehnghal a ni a. Manik Sarkara hunlaia khawpui zauhna tura an hnathawhte khu a ropui khawp a., kawngpui dala in nei te warning an pek tawh te chu an huntiam a pelh tawh a, hma la duh lo chu JCB hmangin an in leh dawr te an nawr chhe hmak hmak mai a ni. Engvanga khati taka huaisen ngam nge an nih kan tih chuan an dik tlat vang a ni. Kan ramah chuan dikna aiin, pawisa, mi hausa, mi thiltithei leh politiciante hian thil an tithei zawk emaw tih mai tur a ni. Ringtu inti tho si, sum leh pai hmachhuan leh hmelhriat neih that avanga, dik lo taka mi ram thalai chhusak duh tlat te kan awm ta nawk a nih hi.

Kan ram hi he ti khawpa a chhe tawh kan tih ruala, Pathian thinurna kan la tawngbuak lohna chhan chu – Mi dik tlemte leh Pathian mi leh tawngtai mi la awm tlat te avang hi a ni. Sodom leh Gomora khua Pathianin a tihboral dawn khan, mi fel 10 chauh an awm pawhin a tihboral loh tur thu a sawi a. Mahse, mi fel 10 pawh an awm loh avangin a tiboral ta a nih kha. Kan ram sualna hi rin aiin a thuk a, a nasa hle tawh a ni. Eirukna a hluar em em a, sex hmansualna, mahni anpui kawp te, mi duham leh dawhah tak tak kan pung tulh tulh a, Pathian tihna reng kan nei tawh lo. Kan ramah hian simna tak a thlen lova, dikna hi sira hnawl a nih zel chuan kan sualna avang hian chhiatna nasa chu kan la hmabak ngei dawn a ni. Kan ram hian dikna/Felna avanga chan ngam, tuar ngam , pasaltha huaisen kan mamawh a ni e.