Hnam chhanhimah harh thar ila

Vanlalnghakliana

April thla kum 1953 khan India prime minister Pu Nehru-a Aizawl-ah alo zin a. Tlaiah Aizawl alo lut a. Chu ni chu Nilaithawh\anni a ni a. Chutihlaia autonomous district council CEM chu Pu Lalsawia a ni. Pu Lalsawia, CEM chuan a tuk Zirtawpni chu Kristiante ni serh Good Friday ni a nih avangin mi pawimawh interview tur te tan a lo thlen zan chuan interview hun a siam a. Zanlai pelh dar 1 thlengin interview-na hun chu an siam ta a.

Chutih lai chuan Silchar-Aizawl kawngah hian jeep a lut hram hram thei chauh a. Kawng chhe tak a la ni . Prime minister Nehru-a putar tawh si kawng chhe taka nilenga insawhchho dawt dawt chu a chauh hle a rinawm a. A zan azana interview a han la lehnghal chu a chau hle ang. Hahthlak a tihzia pawh a sawi chhuak hial a, Pu Nehru-a tlawmngaihna chu a fakawm hle mai.

Tin, Mizoram CEM-in Good Friday dawn a nih vanga kan sakhaw ni serh heti tak maia a ngaihpawimawh a, PM meuh pawh lo kal se Good Friday ni bawhchhiat mai mai a duh lohzia a lan tir ngam hi Pu Lalsawia CEM a fakawm tak zet zet bawk a ni.

Pu Nehru-a chuan CEM hnenah chuan “ Mizoram boss i ni a, in ram hian eng nge a mamawh ber?” tiin a zawt thut mai a. Pu Lalsawia chuan kan mamawh ber min hriatsaktu kan mamawh ber a ni,” tiin a chhang nghal vat a. Pu Nehru-a chuan mak tiin CEM chu a en ha mai a. Mizoram CEM chu pianpui politician a niin, intelligence a nei \ha tih a hmu nghal mai a. CEM thuthlen te pawh a ngaihtuah uluk em em a ni, an ti.

April ni 3,1953 chuan Reid House (Pawnpuite in)-ah district council member-te hmaah thu ropui tak mai a sawi ta a, Reid House hi tuna Tennis Court chhak building thar awmna hmunah hian a awm a ni. Chuta Pu Nehru-a thusawi tlangpuite hi keini thangtharte tan hriat a pawimawh em a. I han sawi teh ang.

“In hnena ka lo kal thei leh thuchah ka sawi thei hi ka lawm hle. Ka la cham rei lo hle a, mamawh zualte erawh chu ka hriatpui mai thei che u a ni. Kawngpui \ha te, thlawhna \umhmunte, damdawi in \ha zawkte, tui in tur hnianghnar zawk te, lo neih dan thar \ha zawk te in mamawh hle a ni.

"India ram hmun dangte ngaihtuah chuan inhnufual lo. Lehkha thiam hna thawh tur hmu lo in la buaipui ve lo hi in vannei hle mai. Zirna hi a \ha lo ka ti hauh lo va, amaherawh chu lehkhathiam hna nei lo tam lutuk dinhmuna in luh loh hram ka duh a ni.

"Kut hnathawh in uar a, hei hi uar zel rawh u. In hma a thiltih tur reng rengah kum 5 bite, kum 10 bite-a plan siam hi thiam a ngai. Second Year Plan te kan ti \hin a ni.

"India rama thil dehchhuah lamah \an in lak thiam a ngai a, midangte rinchhan loh zir ang che u. In chhehvel hnamdangte thiltih dan \ha lo tam tak te chu in ram leh in thinlungah la lut reng reng lovang che u. In hnam dan leh hrai te, in nunphung te hi inhumhalh tlat tur a ni. Hnamdangte tih dan la luta mahni hnam tih dan hloh reng reng chu hnam boral an ni \hin tih te hi hre reng ang che u.

“Sorkar hna thawh ringawtte hi uar lutuk suh u. Mahnia thil dehchhuaha intodelhte hi nasa takin a hlu zawk a ni. Sorkar rinchhan lova mahni kut leh kea din te hi in inzirtir nasat chuan hnam dingchhuak, ram vannei in ni ang a. In \hangthar zelte tan rohlu a tling dawn tih hre reng ang che u."

Pu Nehru-a hian district council member-ho leh Mizo mipui te hmaah rotling thufing a dah a ni. Awle, heng thu te a\ang hian sawi duh ka nei a. Chu chu hnam anga Zofate nun zirchian hi a ni. Tun lai hian sorkar kan rinchhan lutuk a, mimal leh chhungkuaah te, khawtlangahte leh kohhran thleng hian mahni thawhchhhuah loh sorkara intunun kan uar lutuk ta a. Hei hi hnam kal sualna bul a ni.

Pu Nehru-a India zalenna sual chhuaktu chuan, “Mahni hnam dan hloh va hnamdangte tihdan la lut mi chu mi boral let der a ni a. Khawvelah hian dihchhuah theih tawh lohna khuarkhurumah a tla hlum a ni,” a lo ti a. Hetiang hi Zofate zingah kan tam ta. Kan khawlaia advertisement tarahte hian kan mizia a lang. Hnamdangte hmel kan tar tam lutuk. Mizo Nula/tlangval hmel\ha tak takte lemziak tar ve mai awm tak. Hnamdangte hmel kan ngaina ta lutuk te hi thinlunga inchimralna chiah a ni. Tokyo-ah te , Beijing-ah te leh khawpui dangah te hnam dangte thla leh lemziak advertisement atan tar ta ila, ni khat bak a intar lovang. A tartu nunna thlengin a hlauhthawn awm nghal ang. Chutiang chu mite awmdan leh zei zia chu a ni zawk.

Sorkar hnaahte, kan eizawn danah te, ka sakhuaahte leh politic thlengin kan hnam nunphung rem zela tih tur a ni. Chutiang chu a tlo va, hnam anga dinchhuahna thuruk a ni. Assamese-ho te hnama an harhchhuah hlim khan an thupui chu 'Save Assam Today, Save India Tomorrow' (Assam chhanhim phawt la, zawi muangin India chu ila chhan him dawn nia) a ni. Hetiang rilru leh thinlung hi Zofa te hian kan put a ngai ta tak zet a ni.

Hnam chhhanhimnaa kan harh thar hi a ngai a. Sorkar hnathawk-ho an kalsual mek a, NGO-ho thlengin kan kalsual mek a. Kohhran pawh a bang chuanglo, Hnam chhanhimnaah hian reformation / revolution lian tak Zofate zingah hian thleng se he hnam hi a dingchhuak ang a, Rahbi dik a rap ang.