Tlaitla engmawi

C.Lalthazuala

Zo rimawi chanchin-a hming dai tawh ngai lo tur, zaithiam lar nih bak piah lama hla phuah thiam lar ni bawk, Mizo mipa zaithiam dangte neih ve reng reng loh aw mawi dangdai leh lunglen thlak, hipna ngah bawk si nei bik tlat leh tuma tihdan la chhawng lova huaisen taka mahni tihdan a ding nghet tlat reng, kum 30 chuang zet zofate’n kan tuipui tawh leh engchen nge kan la tuipui zel dawn tihpawh sawi lawk theih loh, thang leh thar zelte pawhin an rawn tuipui chhoh ve nghal mai theih zel ni tura kalphung thing thei hauh lo neitu Chaltlang lal tupa C.Lalrinmawia hla phuah ‘Tlaitla engmawi’ tih hla rawn zik chhuah dan hi a ngaih nawm ru riau a sin!

Tlai ni tla tur “chamrih la tlaitla engmawi no ruai” tia ui em ema auh lawm lawm ngai khawp chu a mawi ngiang a niang chu. “I liam tur maw lo ngui zo ta” tiin a thunawn a khar nghe nghe a. Engpawh nise, kan chenna khua emaw, ram emaw, a zir zelin tlai ni tla mai tur lan dan hmangte pawh hi a inmawi hleih thei viau ngei ang. Khaw hawina tur awm miah lo, tlang leh tlangin a kar cheh tlat, luipui hrula awm khua te tan chuan Ni chhuak tir mawi zia leh tlaini tla tur mawizia te, tlaini tla turin a tleu zawnga tlang dung mawi tak takte leh a bawmtu zolentu thing hring nghelh mai te a han en no nghulh mai mawizia te leh a ti mawi leh zual tura hramthiam va tin chhunlam rahtlan chi hrang hrang lo tlan puar tawh, riahrun lawi paha tlai ni tlak dawn suara an hram vel noh noh mai ten mit leh beng a tih tlai zia te hi an hrethiam pha kher lo mai thei a ni. Thlang tiang kawl rawna a eng mawi em em mai a her liampui rual khan thim lal thuneihna chu a intan leh mai dawn a, chhawrthlapui a en lai a niloh phei chuan chhun lama chaw zawng ho tan chuan a thawpik thlak thin si a, C.Lalrinmawia’n “I liam tur maw lo ngui zo ta” a ti chhuak ta hial mai pawh hi a thiamawm khawp mai.

Chaltlang veng hi tunhma deuh chuan inla hrang tak an ni a. Lal hrang neiin Aizawl veng khat anga ngaih a ni ngai lova, an mahni pawhin Aizawl khua angah an in ngai ngai lo. Bawrhsapin Aizawl a thut tantirh lai leh mumal taka Aizawl khawpui a awm tawh hnu pawh khan Aizawl inti ve lovin, khaw hran hlak angin an in relbawl thin a ni. Khawchhiar (Circle Interpreter) chu lal a ni nghal a, chu khawchhiar chu C.Lalrinmawia pu chu a ni a. Aizawl khawpui hrim hrim hi a boruak that zia leh zangkhai zia chu kan hre tlang vek awm e. A awmna hmun hi a sangin Sea Level atanga teh phei chuan a hniam lo khawp ang. Chuvangin ‘Zo boruak thiang’ kan tih ang hi a ni reng bawk a ni. Aizawl hmun rau rau ah pawh a sang lai bik leh thengthaw nuam zual lai a awm leh hlawm a, Chaltlang veng hi a thengthaw nuam zual lai ber a ni hial awm e. A awmna hmun hi a sang viau nain, tlang chung zawl deuh reuh, a chhuah lam panga inpharh rem tha em em mai, tlang chhip hmun sang leh thengthaw nuam taka awm ni si, a hmun a rem nuam em em leh zel a, hei tak hi khaw dang emaw, veng dang emaw, tlang dung bawha awm ve te nen an inan lohna tak pawh a ni awm e.

Tlaini tla turin Chaltlang leh a chheh vel ram a tleu zawnga a chhun en ruih lai chuan Chaltlang hmar lam leh a tlak lam kham panga thing buk mawi tak tak luah hulumtu nungcha hram thiam rual chiar nuk nukte, Chaltlang hmar lama Durtlang leitan chhuntu kawngpui hrul chhak lam leh thlang lama kham chhawrdawh mawi tak tak inchherchhuan vel et ut mai te an mawi dan tur zia chu kan suangtuah thiam mai awm e. C.Lalrinmawia’n ‘Tlaitla engmawi’ tih hla a phuah lai vel hi chuan tuna Tourist Lodge building lian pui mai awmna laite hi ‘Zo thing hnah nem diai’ mai la din velna hmun a ni a, hram thiam va te tan pawha zantlai riah run rem nana hmun him a la ni bawk. He hla chang thumna in a sawi lan “Lenkawl cham duai tlang dum dur, leh ruam dai sirva lengte’n, an lo bel e riah buk ram dai an” a tih pawh hi heng lai vel ruam rai leh a chheh vel hi a nih ngei a rinawm.

Zaithiam lar leh hla phuah thiam hmingthang ni bawk chu mi nawlpui aiin a lung pawh a leng thei hle turah ngai ila. C.Lalrinmawia pawh a pianna khua, tuna Aizawl Chaltlang veng kan tih tak, kan sawi tawh anga Aizawl veng chuanchung laia awm, hmun lunglen thlak leh mawi bawk si, chhak lam leh thlang lam mit tlin tawka hla lang thei, chhak lamah Myanmar ramri, thlang lamah nise Mamit leh a chheh vel tlang dung ropui tak inkhang tawn vel et ut lang thei tho bawk si, hla phuahna atana hman tur hmanrua zawng zawng fawmkhawm theihna tura hmun duhthusam leh lunglen thlak, lunglen ti zual tur tinga a khaw hmun thlang lam leh a khaw tlang dung tlak lam khamin a chawi vel leh a hual vel avanga khamko atanga thlifim rawn thaw lut heuh heuh zul zuia, Pengleng leh Vamur tual leng vel delh delh nitina hmuh ziah theihna hmun atang hian nikhaw hre rual a nih atangin hun a rawn hmang chho ve a ni a, C.Lalrinmawia tan chuan, Pathian thil siam leilung ti mawitu leh ti nuamtu ‘thil siam’ mawi tak takte chu an hluin an ropui thlawt a niang, hram thiam va te, zolentu thing hring nghelh maite, tlaini tla tur eng mawi no ruai mai te, tuma chin leh enkawl pawh nilo, khuanu’n a ruat anga ramhnuaia lo tual to ve, ram pangpar chitin an vul huna an lo vul chuk thin mai te chu an hluin hring nun an ti nuam a ni ber mai. Chu thil ti chiang tur chuan a ma irawm chhuak ngei ‘ tlaitla engmawi’ tih chang khatna leh a thunawn hi ilo tarlang nghe nghe teh ang...

    “Aw ka thlir vel tlaitla engmawi;
    Aw ilo mawi chuang mange;
    Sakhmel thar hrai lengte’n lolawm.
        Cham rih la tlaitla engmawi no ruai,
        La la la (3)
        Cham rih la hrai leng zawng lunglawm nan maw
        I liam tur maw lo ngui zo ta.”

Kum 1973 kum bul lam a ni a, boruak inthlak thleng vel lai chu a zo bik lo a niang, C.Lalrinmawia pawh ni engemaw zat hritlang khawsik avangin khum betin a awm a. A han tha chhuak leh tir, a dam kawr lai tak chuan a chenna In bul mai, an In chhim chhawng lama ‘Chaltlang field’ sir velah chuan a va tei rawlai mai mai a. Hetia a va len vei vah hunlai vel hi tlai ni tlak dawn ruaiah a ni a, field velah chuan hmeichhe naupang leh mipa naupang bakah tleirawl rual thenkhatte nen hlim taka an infiam velte leh an hlim nui ri te, an in au vel chel chul te chu a va hmu a. Tin, Chaltlang khaw chheh vel leh a khaw hmar lam awihtlan vela zolentu thing hnah hring cham del mai timawi leh zual tura hram thiam va chitin an aw rawl tawp nena zai vawrte a thlir reng lai chuan ‘tlaitla engmawi’ tih hla pawisawi lo, hla lenglawng hmingthang zet mai hi a rawn phuah chhuak ta hlawl mai a ni.

Chaltlang field chunga mipa naupang leh hmeichhe naupang rual, tleirawl thenkhatte nen hlim em ema an infiam vel a hmuh chuan a ngaihtuahna a sawrbing hle ni tur a ni. Chutiang thil a thlir reng lai chuan C.Lalrinmawia chuan a nunhlui mual liam tawh thlengin a chhuikir nghal zut zut a ni ngei ang, field chhunga naupang infiam hlim em em, engmah vei leh thawpikna tur pawh la neilo, khawvel sualna pawh la dai phak lo, rilru leh taksa-a la thianghlim em em maite anga hun a hman ve hun laite kha chawp leh chilhin a ngaihtuah chhuak a. Chutianga hun hlimawm alo hmanpui thin, a lenrual hluite a hre chhuak nghal uar uar bawk nen, mahse hun leh ni te a dang tawh si, kum engemaw zat kal tawha hlim taka tlai ni tla tur engmawi lawma an infiam ve thin laite kha hmanlai an chang zo ta. Chaltlang veng leh a chawi vel ram timawi leh zual tura tlai ni tla tur engmawi takin a tleu zawnga a en tlet sur lai chuan lenrual then hnute a ngaih zia thu he hla chang hnihna ah hian hetiang hian a han au chhuahpui hial bawk a.

        “Kumpuisul lo vei hian;
        Hun leh ni te alo dang,
        Ka ngai thin lenrual hlui then hnu te.”

He hla ‘tlaitla engmawi’ a phuah lai hian tlaini tlak dawn ruaia phuah a ni a, a phuahtu C.Lalrinmawia hian he hla a phuah ni tlai hi ‘Chawlh ni tlai’ a ni lo tih chu a chiang tawk a, amaherawhchu kar khata ni sarih awm zingah hian a eng ni tlai bera a phuah nge tih erawh a hrechiang thei bik tawh lo.

    He hla hi C.Lalrinmawia Audio album chuai thei lo ‘Di Chambawihpuii’ tih album kum 1986 daiha tlangzarh tawh, tun thlenga Zoram dung leh vanga Zofate’n kan la tuipui em em, Otto Rcording Studio atanga tihchhuah ah khan telh ve a ni a. Side ‘A’ hla hmasa ber a nih nghe nghe kha. He hla thu leh a thluk mawina piah lama a satu aw pa tak leh lunglen thlak tak mai timawi belhchhah leh zual tura rimawi bikima lo thuam mawitu - Hmuaka (guiterist), Thawngnova Bassist (Ex-Bassist of Vulmawi), Thuama (Keyboardist), Zothana Drummer (Ex-Drummer of Vulmawi) te ho hian fak an phu hliah hliah a ni.

Kum 27 chhung teh meuh Zofate’n kan tuipui thin leh kan ngaih hlut tawp theih loh ‘Di chambawihpuii’ tih album ah khan telh ve a nih thu kha kan sawi tawh a, he album-a telh ve a nih hma daih hian C.Lalrinmawia hian All India Radio Station-ah lo record tawhin Radio kaltlanga Zoram dung leh vanga lo lar chhuak a ni mah zawk a. Heti taka hla lar reh thei lo, thangthar leh zelte pawhin an rawn tuipui chawpchilh ve nghal zel theih hla phuahtu C.Lalrinmawia hi ‘Zorimawi’ huangchhungah kher kher hi chuan chawimawina nopui dawm tlak a va ni em.

Aw le, tunlaiin thangtharte rimawi lamah kan in el nasain kan intlansiak nasa hle mai. Amaherawhchu, kan rimawi khawvel thlir dan leh kalpui dan hi a lerah kan thuai mah mah deuh a maw ni chu aw a tih theih awm e. Kan zaithiam leh hranghlui chhuanawm tak tak ‘Zorimawi’ khawvela a bul lo tantute leh hma lo hruaitute atang hian, hla phuah dan chungchangah emaw, lungleng taka zai dan chungchangah emaw, music nena a thuam mawi dan tur chungchang thleng pawhin a ni thei ang, i inzir thar leh sauh sauh ang u. Tunlai zaithiamte aia chungnunna kan hranghluite khan an lo ngah mai si a, kawng tam takah kan la tluk lo a chha niin a lang. An mahni zah thiam leh ngaih hlut thiamte, an mahni atanga zir tur tam tak kan neih ziate hi a lera thuai mai thin lo hian thangthar rimawi khawvel lamtluang zawh tum zel turte hian i inzir thar zel teh ang u. A bik takin hla phuah lamah hian kan hranghluite kha kan tluk lo hle niin a lang. Zorimawi lama tui em em thangthar zelte hian kan rual u zawkte hlaphuah dan phungte zirchiang zel chungin Mizo thu leh hla tih hausak nan hla tha tak tak phuah belh zel thei turin tan i han la sauh sauh teh ang u khai.