Mizo hnam nun zir chiang zel ila

Lalnghakliana
Ramhlun Vengthar

Mizo hnam hi kan vanneih bikna a tam mai a; hmasang atangin kan chhehvel ramte thlirin kan kalhmangah vanniehna kan ngah mai. Hmán laia lal lian bik vak awm lova khaw lian deuh lalten khawper tlem azawng an lo nei chauh kha kan vanneih hah ta hle a ni. Khaw tinah khawtlang enkawltu tur defence centre Zawlbûk a lo ding vek maite kha an lo vanneih phah em em a ni. Tlawmngaihna lamah leh inhumhalhnaah khawtlang a venghim tha em em a ni.

Kan chhak Burma rama Pawiho leh hnamdangte khan zawlbûk an nei ve lova; khawtlang tana thawhhhona leh tlamwngaihan lamah pawh keiniho ai chuan an hniam em em a ni. Mizorama British sipai an lo luh khan Luseiho ram, tuna Mizoram lo ni taa mipui chengte leh an inawp dante kha uluk takin an rawn thlir a, hetiang hian ngaihdan an neiin an hmuhchhuah takte chu niin a lang.

1. Tuna Mizoram lal tam berte leh mipui tam takte kha Luseiho lalte leh an khua leh tui an ni tih chiang takin an rawn hria a, tawng hmanpui ber pawh Lusei tawng (tuna Mizotawng lo ni ta) a ni tih an hria. Chuvangin Lusei ram tih mai awm tak a lo ni ta reng a ni.
2. Ram leh hnam chhana huaisen taka British sipaiho lo do ngamtute kha Lusei lalte leh an khua leh tui an ni deuh ber tih an rawn hre chiang bawk. Chuvangin a ram leilung neitu (sons of the soil) chan chang ber chu Luseiho an niin an hmu bawk tih a lang.
3. Vailen lai (British-hoin Mizoram an rûn lai) khan Mizoramah tawng chi 5 kan hmang a, chungte chu Lusei tawng te, Pawi tawng, Hmar tawngte, Paihte tawngte leh Ralte tawngte an ni. Heng hnampui 5 tawngte hi inhnaih te te vek a ni a, mipui tam ber tawng hman Lusei tawng chauhin A AW B an lo siam ta a, chutichuan A AW B pakhat chauh kan lo nei ta a, hei hian hnam inpumkhatnaah nasa takin a tangkai ta a, kan hnam vanneihna ropui tak a ni ta a ni.

British sorkar-in min awp ngheh hnu chhiarpui hmasa ber kum 1901 chhiarpuiah chuan hetiang hian an lo chhinchhiah a.
a)    Mizorama Luseiho chu 36,332 an ni.
b)    Mizorama Pawiho chu 15,038 an ni.
c)    Mizorama Ralteho chu 13,827 an ni.
d)    Mizorama Hmarho chu 10,411 an ni.
e)    Mizorama Paihte-ho chu 2,870 an ni.
f)    Midang hote chu 3,955 an ni
(source - Mizo Chanchin - by Rev. Liangkhaia p. 154)

Mizo hnam hi an vanneihna ropui tak mai chu kristian sakhua kan vaia kan zawm ta hi a ni. Chu chuan kan hnam dan atthlak pui pui a tibo ta a; hmán lai chuan kan lalte kha an lal em em mai a, ram neih zau duhin an vela lal dangte an rûn a, an indo reng a, lal thlah leh lal thlah hrang an indova, an inthat reng a, râl hlau reng rengin an awm a ni.

Lalte kha an khua leh tuite chungahpawh an inti-lal em em a, hnamchawmho an rapbet nasa em em a, chuvangin an nun a zalen lova, an hrehawm hle a ni.

Ramhuai an bia a, khawhringte, dawite an ring a, miin natna engpawh nei se, ramhuai tihnatah an ngai a, ramhuaiho tlawn nan an inthawi reng a, an neih an sêng vak vak thin. Khawhring neiahte an inpuh a, indawihlum tumahte an inpuh a, an inhmelma a, an inthah phah fo thin. Sakhaw biak dan dik lo avang pawh hian an nun a hrehawm ngawih ngawih a ni.

Tin, sualna chi hrang hrang an zingah a tam em em bawk. Inngaih te, uire te, inhauh leh inkhin te a tam hle bawk. Tlangval chuan nula chu ngaih an tum tlat thin; mikhual nula zen phei chu tlangvalho uanna ber a ni. Upaho fiamthu tam ber chu zahmawh sawi a ni a, hetianga kan thlahtute nun chhe pui pui te, sakhua avanga an nun hrehawm em emte leh an inawpdan tha lote chu kristian kan lo nih hnu hian a lo reh ta hle mai a, a thawventhlak hle  ani.

Kum 100 vel chauh chhungin kan hnam nunphung hi a thang chak em em a, ziak leh chhiar thiamah phei chuan India ramah 2-na kan ni a, Chakma-ho chhiar lova keimahni Mizo hlangah phei chuan za-ah za tling lek lek kan ni ang. Khawvel science & technology hmasawnnain min chim tawh bawk a, thang chak tak kan ni.

Zir tur chi hnih lian tak kan nei; hetiang hian :
1)    Mizoram chhunga cheng MIzote hi zohnahthlak zinga a changkang berte kan ni; keiniho hian kan ram kilkhawra awmte leh kan chhehvela awm zohnahthlakte tihunau thiam hi zir ngai nasa tak a ni. Tuna kan Zo tawng an pai deuh emaw, an thiam vak loh avanga hmuhsit leh nuihzat mai kan ching tur a ni lo, thil engkimah an mahni huapzo thei anga nun leh chezia engkima tih thiam zir a ngai a ni., Khawvel hnam tin ah backward lai a awm vek a, chung enkawl leh tihchangkante, enkawl thiamte chu an zirlai an ivek mai.
2)    Tin, zohnahthlak hmun kilkhawr deuhva awmte pawhin engemaw hleka hnam leh kohhran thilah te chibing rilru zim tak lak ata khawhawi zau thiam an zir a ngai nasa em em bawk. Zohnahthlak zingah hian chipeng (sub-tribe) lian tawng hrang nei chin hnam 5 chiah a awm. A mal theuh chuan inlabing lutuk ila a tawpa boral mai chiah kan hmabak ang. Intihrang tham kan awm lo, kan vaia tanrual thiamna chauhin he ram leh hnam hi a chawilian a ni tih pawh hre reng ila, chu zirlai chu zir tham a ni a, chutianga chi leh hnam bing rilru zim paihbo thiam chu zir tur nasa tak a ni bawk ang.

A tawp nan hei hi kan hriat chian a ngai, hnam nawlpuiin kum 100 lai a lo kalpui tawh ang hi eng thil pawh kan thanlen dan tur a ni tho tho tawh a, rilru zim leh te puta, rilru tihhah ai chuan hnam pum pui kalphung chu chawmlen tum ila, a hlawkin a tangkai a, a finthlak zawk daih tih hi hriat a tul khawp mai.

Mizo hnam pui 5 te zingah Luseiho lal leh an khua leh tuite an lar ber a, administration leh defence lam thlengin an inenkawl dan a tha a, Mizoram rûntu British-ho meuh pawh khan he ram leilung neitu chan chang ber nia an lo hriat avangin Mizo hnam hrang hrang pawt khawmtu bertah an lo hmang a, Lusei tawngin A AW B an lo siam a, hnam culture & tradition, customary law thlengin Luseiho kalhmang chu Mizo hnamte min hnuk khawmtu bera hman leh rinchhan a lo ni ta a ni.

Tunah hian kan chhehvela kan unaute, Manipur tlangrama cheng zohnahthlak hote, Tripura-a cheng Zohnahthlak tam takte leh Naga-hote nen veka thlir pawhin Mizoram cheng Mizote hian vanneihna ropui tak mai kan nei a, sorkar inawpna lamah state sorkar kan neih mai bakah, kohhranin hnam a tibuai lova, hnamin kohhran a tibuai ve hek lo. Hnam tinte tawng thu-ah kan buai bawk hek lo; Mizoram chhungah chuan hmun kilkhawra mi tlem deuhte tih loh, midang zawngte chuan tawng pakhat kan hmangho va, tlangmi thenkhat angin kan kohhranah pawh Lusei kohhran, Ralte kohhran, Hmar kohhran etc. siam a ngai ve lo. Hengte hi kan vanneih em emna leh hnam anga kan puitlinnate chu an ni. Hengte hi thangthar zelte hian i vawng nung zel ang u.