Lalramchhana, Dawrpui. MTh (NT)
1. Bible hi Pathian Thawkkhum a ni
Bible hi Pathian thawkkhum, tehna dik lo thei lo a ni tih pawmtute zingah chuan ka tel ve chiang a. Sap chu thuhran, Mizo zingah pawh kan sawi zin tak em em, kan Kohhran hruaitu thenkhat pawhin Bible ropuizia sawi nana an hman thin, thuruk inthup awm, zawnchhuah theih an tih Bible Code hi kei chuan ka zir chin ah chuan ka pawm lo hulhual tawp.
A chhan kan tarlang anga, i pawm duh dan chu i thu ni rawh se. A dang pawh tam hle mahse, tin a tichhuaktute chu Witztum, Rips leh Rosenberg te ni daih mah se, THE BIBLE CODE tih, Michael Drosnin a ziah hi a lar deuh avangin han hmang deuh ila a tha awm e.
Brendan McKay, Dror Bar-Natan, Maya Bar-Hillel leh Gil Kalai te hian an dah nil tha hle a. An zirna May 1999 a an tihchhuah ah chuan, heng code inthukrute hmuchhuak tur hian Genesis bu emaw lehkhabu dang daih pawh ni se, a bu a thu awmin pawimawhna a nei hran lova, a zawngtuten an zawn dan method an hman a zirin (an hming zawn leh kum an zawn a zirin) code hrang hrang an hmu mai a ni an ti. A Bible thu chu an ti danglam lutuk hran lo (a lehlin dan leh thumal in dawt dan erawh hmun tam takan an thlak kual nual), mahse hming emaw thumal dang emaw an duh an zawntir a zir leh a hawrawp inkar an duh zat an thlan a zirin he code hi an hmuchhuak mai a ni.
2. Equidistant Letter Sequence (ELS)
A Hebrai tawng kan sawi thlen hma in he methodology hrim hrim hi han en zui ila. Drosnina leh midang pawhin an hman uar em em chu ELS hi a ni. Chumi awmzia chu, hawrawp mal inkarah duh duh zat (mahse a inzat zelin) tlak tir in, chu chu an chhiar kan a, chuan thumal awmze nei (code an ti awm e) engamaw a lo chhuak thin a ni. Hawrawp pahnih zel emaw za leh sawmnga zel emaw i kal kan pawhin i thu thu a ni, dan bik a awm chuang lo (Computerin an ti tlangpui- i peih chuan manual deuh pawhin a tih ve theih). Computer hmangin a bi zat hrang hrangin an han chhut ta tihna a nih chu. Genesis bung khatna ah hian hawrawp bi sawmnga na zel a chhiarin Israel tih a chhuak thei.
3. Engchin Nge Kan Pawm Ang?
A chunga kan sawi tawh angin a zawngtu leh a zawn dan khian ro a rel tlat avangin, zawn dan danga code an hmuhchhuahte hi a mak hlawm a sin. Kan Bible a Dan bu bik Torah ah pawh hian zawn dan a zirin thu mak pui pui a tam mai – Chhandamna a awm lo tihte, Isua hi Setana a ni tihte, Isua haw rawh u tihte, khawngaihin Isua hi umchhuak rawh u tihte, Isua hi Pathian a ni lo tihte, Pathian hi Yahweh a ni lo tihte, Yahweh a awm lo tihte, Pathian a awm lo tihte a awm nuk mai asin. A khawi Bible code chin chu nge kan pawm dawn le. Tu zawn dan hi nge a dik a a diklo kan tih ngawt ang, khawnge criteria, khawnge a zawndan tehfung chu. Jehova hi dawtsawihmang a ni tih ringawt pawh vawi riat lai Torah ah hian a awm asin. Jehova a thi tawh tihte hi vawi za vel a lang Torah ah hian. Chuvang chuan a nia, a zawn dan method hian a zawnchhuah tur hi a thunun hneh lutuk tlat an tih chhan, a buaithlak lai pawh a ni e.
4. Code hmuhchhuah hi an sawi ang em a har a ni em?
I duh thlang la, ELS hlutna hrang hrang in chu chu zawng la a chhuak duh khawp an ti. Sap lehkhabu lar Moby Dick ah te hian (a hnu ni mahse) Gandhi thih thu te a hmuh theih ve tho (Ben Witherington, “A Cracked Code,” Christia nity Today, July 12, 1999, page 20). Hebrai Bible chauh tur emaw tih laiin King James Version ah te pawh an hmu teuh tho mai, Computer program hmangin Mizo Bible te hi chhut ve theih se Mualzavata tih te Buizova tihte hi a chhuak ve nuk mai lo maw?
5. Eng Bible nge an hman?
Hebrai Bible hi a original hei hi a ni e tuman an ti thei lo, an inhlanchhawn dan kan hria, kutziakin a ni. Phek khat pawh Bible kha han copy chhuak chhin teh, diklo a awm em? Hetah pawh hian a buaithlak nghal, Drosnin a te chuan a nawlpuiin original a an pawm tlan kan hmang an ti a, mahse chu chu a original a ni der chuang si lo (pawn tlan nazawng hi a dik kher lo). Thutna mumal awmlo, eng mumal awm lo, pen tha tawk lova copy hi chu a buai deuh lai eng nge ni ber emaw a ziaktu thu hman ngei thlan theih loh a tam ang tih hriat tur. Tin, Hebrai Bible te hi an sal tanna ah te kenga an copy zel a ni a, tin ram hran ah te an ken kual zel a nih avangin a tawng hman pawh in anglo tamtak a awm a (synonyms a thlak kual tih hriat deuh deuh pawh hmuh tur a awm). Tin, an laih chhuah leh an hmuhchhuah tawh Bible them tam fe ah hian inang chiah chiah pakhat mah zu han awm lova mawle. Chuvang chu a nia, kan Bible phek hnuai lamah pawh “Kutziak bu hlui thenkhatah chuan he thu hi a tel lo tih emaw heti hian a inziak tih emaw” kan hmuh thin hi. A khawi ber chu nge an hman dawn? A tilar tute pawh hian in ang chiah lo deuh vek an hmang a sin. Hebrai tawng hi English leh mizo tawng ang lo takin ding lam tawp atang a ziak ta nin vei lamah a tawp phei zel a. Amaherawhchu Bible code zawng tute hi chuan saptawng kal zawngin an zawng daih thung bawk asin. Tape cassette letling zawnga ngaihthlak tihte pawh kha a ang deuh e.
6. Hebrai Bible ah Vowels telh a ni ngailo
Dan bu (Torah) Hebrai a ziak hmasa ah chuan vowel a awm ve lo (a sei an hlauh vang a ni mahna, a ziaktute chuan an hriat hneh em avangin an buai lo). Vowel te hi tun hnai lawka an belh chawp (chu pawh pointing vek, consonant hawrawp hnuai ah chhun han te reuh te te ten leh thai kawi zeuh zeuh te anni) a ni tih chu thudik chiang bal a ni a. Vowel a tel ngailo tih chu changchawiin vowel an paih veka consonant chauhin an chhut mai Bible code hi. Chu chuan engnge a entir, an duh duh vowel te kha consonant karah an zep mai tihna a nih chu. Entirnan mizo tawngah pawh SAKHI tih hi a vowel duh dan a thlak danglam chuan SAKUH tih ah pawh a siam theih. Chu chu a nia a zawngtute thu thu khan hming an hmuhchhuah pawh a danglam theih nachhan chu. Tin a thenin Vowel awm kan hmang an tia (Drosnin a te), a thenin Torah pawh vowel a tel lo an tia vowel paihin an lo zawng ve bawk nen a hnawk deuh a ni duh ai chuan.
7. Milem Biakna a ni em
Keimah lo chu Pathian dang reng reng i nei tur a ni lo Lalpan a ti. Kan Bible thu ken hi a ngai reng chatua nin, Pathian Thu kan hnena puanchhuah nana hmanrua a ni Bible hi. Amaherawhchu, a Pathian lam ngaihtuah lek lovin code ringawt buaipui leh sawi vung hian Bible hi kan pathian biak mai ang tih a hlauhawm ve tho. Culture hrang hrang ah tawng hrang hrang pawhin nei ila kan zain Thutak Bible a awma chu kan hrethiam thei a ni, engnge kan hnenah a sawi tih pawh a lang thei. Amaherawhchu a Hebrai hawrawp mal ringawt buaipuia awmze neihtir tum phet hi milem biakna chikhat chu a ni ve tho lawm ni.
8. ELS hman theih nan Bible hi mahni duh dan a lehlin te pawh a awm
Bible Review, August 1997 a chhuakah khan Ronald Hendel’an Bible code zawngtuten an duh ang an hmuhchhuah theihnan an duh dan in Bible an translate kual tih a sawi a. A sawi zinga pakhat chu Genesis 25:11 a kan Bible in Abrahama thih hnuah chuan tih laia Abrahama tih kha Drosnin a chuan “Ab raham” tihin inzawm lovin a dah a. Word pakhat kha word pahnih ah a siam daih tihna a nih chu. A chhan chu hetia a tih hian ELS hmanga a chhutna ah khan Rabin tih a chhuak thei chiah a ni (Israel Prime Minister thi ta kha). Kan sawi tawh angin a zawngtute thu a lal hle a ni, an duh hmu tur chuan Bible meuh pawh an ti danglam ngam zawk a tih theih.
9. Bible Code tello hian kan Bible hian a hlutna a hlauh em?
Hnai love kan ti kher teh ang. Thenkhat chuan he Bible Code avang hian Bible a hlu zual ah an ngai a, Pathian awm zia ti chiangtu ah ngaiin midang hmin thei ah an in ngai tlat hi ka buaina a ni. Pathia nin code tehchiamin min be lo, chhiar ila, hrethiam ila, zawm ila, kan nun kaihruaiin thunun sela, chu chu a pawimawh ber. A pawimawh ka tih ber chu Bible hian a hlutna chawinung turin leh a hnathawh tur tipuitling turin code a mamawhna a awm hranpa lo. Kan Politics ah te, kan khawtlang thil ah te, kan hnam nun zia ah te, kan economics dinhmun ah te hmalam min thlir thiam tir hi kan Bible in a ngaihpawimawh bulpuiber ber a ni hauh lova. A ngaihpawimawh bulpuiber erawh chu kan thlarau nun hmalam hun hi a ni zawk. Chumi thih hun khami thih hun hriat nan a ziak a ni lova, Pathian i lo hriatchiannan leh he lehkhabu avanga nunna i lo neih a (Pathia nin Lal Isuaa kan tana a plan chu), midangte pawh a hnen thleng tura i puih a (hmanrua ah Bible), engtikah emaw a hnen i thlen theih ngei nana ziak leh tun thlenga vawn that a ni. A original pawh nei tawh lo mahila kan mamawh chin leh kan hriat tura Pathia nin a duh chin kan kawl theuh a ni zawk. Code neilo hian a ropui tawk, a aia lehkhabu ropui a awm lo. Bible Code hi chi hrang hranga zawn dan a awm avang leh a zawng tu ah a innghah thui avangin thumak deuh deuh a chunga kan tarlan te pawh khi (Pathian a awm lo tih vel ho khi) zawngtu thenkhatin an hmuh ve tho a nia, engtin nge kan sawi fel theih ang. Bible Code mak tak chu Pathian atanga chhuak ni lovin a zawngtu mihringten an dah chawp a ang ta mah mah a nih chu.
Bible Code hmang ni lovin Thlarau Thianghlim hmanga a Thu min hrilhfiah leh hmalam hun min thlir tir hi Pathian chatuan remruat a nih thu hi i hrechiang zual zawk teh ang u.