Lalhruaitluanga Chawngte
Mizoram Polution Control Board member secretary Er. C Lalduhawma chuan, "Kan rama leimin hi chu thil pahnih - tuidawn leh thli luankawr kan ngaihpawimawh loh vang a ni," tiin a sawi. "Tui chakzia hi kan hre tawk lo niin a lang; Tlawng luiah hian kal ila, a kuang pang vela a khawh khawk te hi en ngat ila, lung chang tak tak a tam ang," a ti.
"Research emaw, survey emaw ka ti lo na a, ka vei em avang hian ka kalna apiangah ka thlithlai thin a, tumah hian thli luankawr leh tuidawn hi kan ngaipawimawh lo niin ka hria. Kan in chunga tui leh kan thli te hi a luan luanin kan luantir a, chu chu lei chhungah relhlut a, lei a chiah nem ta a ni. Keini ram leilung, nghetlo sa tan phei chuan hei hi a pawi hle. Ruahsur te kan puh thin a, a dikna chen pawh a awm ang, mahse, kha lei nem sa kha ruah baw-hawkah a min ta thin zawk a ni. Aizawla leimin tam zawk hi chu chutiang chu a ni ang," a ti a, "Bawlhhlawh reng reng treatment awm lovin kan riral tir a, treatment chu sawi loh a luan luanin kan luan tir a, kan thli ni se mahni in chhung chinah pipe te kan han siam ve a, chu chu kawmthlangah kan han khawhchhuah tir ringawt a," tia sawiin, "In hmun tha pawh ni se hetianga tuiin a chiah reng chuan lei a nem a, a min a hlauhawm tho," a ti bawk.
Administrative Training Institute hnuaiah Disaster Management Cell-a hmuna Associate Professor, Er. Lalbiakzuala pawhinleimin chungchang hi sawiin, "Tuihawk luankawr kan nei lo a, heti lamah hian inzirtir kan ngai khawp mai," a ti ve bawk.
"Loh theih loh chin chu awm mah se kan buaina tam zawk hi chu keimahni thlen a ni. Tui luankawr mumal awm loin, kawmthlangah a chhuak a... pawi ber chu thli luankawr kan nei lo hi a ni," tia sawiin,"Kan leilung a nghet lo tih chu a chiang a, mahse, kan minna ber chu management kan neih loh vang a ni," a ti a, "Kan in sak te hi a him leh him loh kan ngaihtuah lo. A foundation a him em tih te kan ngaihtuah lo a, cement tha kan hmang em tih te, hmanrawn tha kan hmang em tih te kan ngaihtuah lo. Vai mistiri-in a duh dan danin kan in te hi min sak sak a ni ringawt," a ti a ni.
"Hmun dangah chuan in sa tur hian dan mumal tak an nei a, a him lohna hmunah sak phal a ni lo. Keini chuan 'building by law' kan nei lo, tunah hian an buaipui ve mek niin ka hria. He'ng te hi ngaihpawimawh a ngai a ni. In sa tur chuan a thli luanna tur pawh a neih ngei ngei a ngai," a ti a, "Tuidawn ngaihpawimawhna chang kan hre lo te hi thil pawi tak a ni. In te tak teah pawh keini ram ang, ruahtui tamnaah chuan a chung atangin tui a luang tam thei hle a, chutiang chu tuidawn tel lovin a luan luana kan luantir avangin a hlauhawm a ni," a ti bawk.
Science and Technology Wing-a scientific officer, Disaster Management lama Master Degree nei, K Lalrammuana pawhin tuihawk luankawr mumal lo lutuk chu leimin nasat chhan niin a sawi ve bawk: "Nala system kan nei lo hi kan buaina ber a ni. Tlang awihpangah in kan sa a, nala kan ngaihsak si lo," tiin Mizorama leimin chungchanga a ngaihdan a sawi.
Leimin tamna rama leilung chanchin zirtu awmchhun - Geology & Mining chu Department pakhat hnuaiah 'wing' a ni chauh a, leilung chanchin zir chu industry din nana duhin, Industry Deptt. hnuaiah a awm nghe nghe. He deptt. directorate leh a chhehvela an quarters te pawh hian thli paihna an nei mumal chuang lo a, September ni 14-a he directorate thlanga kopang min pawh kha hei vang hi ni-a ngaih a ni.
LAD-in bawlhhlawh paih lam an hma thin a, chutih laiin Trade & Commerce Deptt. lamin Bazar thenfai hna an chang thung. Bawlhhlawh hi solid waste leh liquid waste-ah then a ni a, Aizawl thian thianghlimtu LAD chuan solid waste chauh khawihin, liquid waste lam chu a luan luanin a luang ta a ni ber. Tun hnaiah Urban Development & Poverty Alleviation Deptt. a dingthar a, anni hian bawlhhlawh paih hna thawk mah se, bawlhhlawh sawngbawl turin an chak tawk lo. Treatment ti tur phei chuan chutiang thiam an nei lo.
PHE hnuaiah Sewarage & Sanitation Circle a awm a, mahse, anni pawh hi thli (sewarage) chu an khawih chuang lo. Ruahmanna siamin sorkar-ah an thehlut tawh a, tihhlawhtlin a la ni lo thung; hei hi pawisa awm loh vang nia sawi a ni. Sorkar hnuaiah Mizoram Polution Control Board a awm a, boruak thianghlim leh thianghlim loh te, bawlhhlawh leh thli sawngbawl chungchangah te he Board ngaihdan hian ngaihpawimawh a hlawh lo thung. Sorkar chuan Disaster Management Committee te han din ve sateh mah se, tuma'n manage/control an tum lo a, a tawpa silpaulin-a khuh chu he ramin Disaster a buaipui thiam dan tawk a ni rih. Relief & Rehabilitation Department te han awm ve bawk mah se chhiatrupna thlen hnua tha thawha che thin chu khawtlang bawk an ni a, sorkar kut leh ke ber pawh leilung chanchin zir ve lo - PWD lam an ni tlangpui.