F. Chanchinmawia, Tuikhuahtlang
Khawvel mi ropuite zinga chhiar hmaihtawh ngai loh tur Abraham Lincoln-a chuan "Lehkhabu chhiar tur min hawhtu chu ka thian tha ber a ni ang’’ a lo ti a, Lehkhabu chu a dinhmun ropui tak chelhtirtu a nihzia a hai lo hle. Lehkhabu ropuizia chu hai theih rual a ni lo a, kan Pathian pawhin a ram lak nan pawha a hman rim ber a nih nghe nghe hi. Chung finna chuang lehkhabu awmkhawm, chhiar theiha ruahman hi Library kan tih mai chu a ni.
Hman fing hmasaten lehkhabu an ngaisang a, an ziak hnem em em bawk a, an thu hriat leh an tawnhriatte chu lehkhabu-ah an ziak zel a. Chung an finnate chu hnam dangin lehkhabu hmangin an lo chhawr tangkai a, finna an in rochhun chho zel a, civilization ropui zawk a piang zel a, heng finna inrochun chho zela palai hna thawktu ber chu lehkhabu hi a ni. Lehkhabu chhiar hnem chu mifing a ni a, a chhiar hnem poh leh mihring hi a fing tulh tulh mai a ni. Tun hma lehkhabu awm hma chuan mihring hi finna zawngin a zin thin a, a zin zau poh leh a fing ting mai a ni. Nimahsela tunah chuan lehkhabu atangin engkim kan hmu thei a, mahni pindan chhung atangin ram hla takah kan zin thei tawh a, kan peih leh peih lohah a inghat a ni. Ziaktu pakhat phei chuan "Lehkhabu reng reng hi chiar tlak loha tha lo a awm lo e,’’ a ti hial a ni.
Lehkhabu chhiar tam hian mahni inrintawkna a thlen a, sumdawng mi kan ni emaw, zirtirtu kan ni emaw, rawngbawltu kan ni emaw, eng hna pawh thawk ila kaihruaitu bera kan neih tur kan ban phaka awm reng lehkhabu hi kan thlauhthla tur a ni lo a, kan rawn nguna kan rawn fuh poh leh kan hma a kaw sawt sawt mai dawn a ni.
Tunlai khawvela finna sangin e-resources a rawn keng chhuak a, thalaite chuan lehkhabu dah thain computer screen-a thil chhiar kan ching ta a, kan zirlai a pui a, kan mamawh a phuhruk bawk a, a tangkai takzet a ni. Nimahsela heng changkanna bungraw tangkai tak hian side effect a thlen a, rei tak han chhiar nan a tlak hauh lo mai, kan mitin a tuar thuai mai a ni. Hun a lo kal zel chuan thatchhiatna leh dawngdahnaah min hruai lut thei a ni.
Hetih lai hian e-resources hi kan dah hniam thei hauh lo ang, miin a tangkai zawnga a hman chuan (powerful) thil tithei ber leh thu (relevant) tunlai ber berkan fawm khawmna a ni. Research ti lai mek tan phei chuan sekibuhchuak kan ti lo thei lo ang.Kan journal subscribeda zirin kan thu mamawh engkim deuh thaw hi a awm thei tlat a ni.
Zirna sang zawk University-ah te hlei hlei hian lehkabu tangkaizia a hriat. Zirnna hmunpui inelna lian ber pakhat chu library neih changtlun hi a ni kan ti lo thei lo ang. Kum 15 leka upa MZU Central Library pawn lehkhabu 95,818 chuang a lo nei ve der ta, a va lawmawm em. Kan mamawhna zawn ang zelin lehkhabu thlan tur a awm, a thlang thiam apiang mi vannei an ni mai. Academic Library, Public Library, Special Library leh Kohhran Library thleng hian duhthusamin lehkhabu awm lo mah se kan hmuh phak leh khawih phaka awm chhun ang ang hi kan chhiara kan Society leh Kohhrana kan sengluh hun hi Zofaten hmasawnna rahbi kan rah hun tur chu a ni.
Kan lehkhabu dahna hmunte hi maimawmte eizawn nana hmantir mai mai tawh loin, a chhawrtu tur dik takte hian chhawr tangkai tawh ila. Kan ram leh hnam, kan khawtlang leh kan mimal nun atan lehkhabu chhiarah hian i harh thar ang u.