Pana Chhangte
Supreme Court Ruling hnuhnung bera a lan danin Adhaar Card (UID) an buaipui em em thin leh an hlauh em em pawh nei tura tihluihna a awm loh thu leh neih loh pawhin engmah a nghawng pawi loh turzia fiah taka tarlan a ni a, heti chung hian tun thlengin an la insawi thaih a, mahni Kohhran awmna chhuahsan tur zawngten hma an la a, tul lovah an phili buai hle reng a, chu chuan nghawng tha lo tak a nei chho mek zel niin a lang.Chuvangin,Barcode pawh hi an insawithaih zinga tel ve a ni a, hetiang hian han belchiang teh:
A chanchin
Barcode hi Drexel Institute of Technology, Pensylvania USA-a zirlai pakhat Bernard Silver-a’n kum 1948-a a hmuh chhuah a ni a; Food fair-a an kal tumin Food Chain President-in an college hotu (dean) pakhat hnenah thil siam chhuah that zawng awlsam taka hriat theihna awm thei se a duh thu leh research bei tura a duh thu a rawn chu tihhlawhtlin ngei tumin a thianpa Norman Joseph Woodland a hrilh ve a. Nasa taka an beih hnuah ultraviolet ink hmangin an han siam chhin phawt a, mahse, a chul hma em avangin a rintlak tak tak loha a aia tha leh changkang zawk an hmu chhuak chho ta zel a ni.
Barcode hi Khawl mit nei emaw Khawl tarmit nei ti ila a dik mai awm e. Data aiawha hman, thil awmdan leh nihna lo enfiahna leh hmu theitu a ni. Rin pahnih kalthiang niin linear emaw dimentional (ID) a ni a, tunah chuan rectangle anga duan a ni a, chhun han (dots) angin an siam a, ‘Hexagon’ emaw geometric pattern angin dimension 2-a duan a ni a, chu chu 2D an ti. Hei hi thil chi hrang hrang chhinchhiah nan an hmang thin. Barcode lo endik leh tu chu Computer thluak chi khat optical scanners emaw Barcode readers an ti a; A hnuah computer-in a kentel thil lem leh thlalak te thla la chhawnga a ngai ngaia kan print chhuah leh theih thinna hi a ni. Hei hi tunah phei chuan Desktop leh smartphone-te thlengin an kengtel vek tawh a ni.
A tirah chuan barcode hi Association of American Railroads tanpuinain Industry lam atan kum 1960 lai vel khan an hmang tangkai tawh hle a. Chu chu General Telephone & Electronics (GTE)-in enkawlin a tha chho lehzual a; Automatice Car Identification (ACI) atan an hmang tangkai hle nghe nghe a ni. A hmingah pawh Kartrak an ti thin.
Rawng chi hrang hrang inpawlh (color stripes)- hmanga siam niin rangva them (Steel plate)-ah an bel a, chu chu relkawng sira lunghmunah an tar thin. Plate pahnih hi car pang tawn tawnah an bel a; pakhat zawk chuan thla a lo la a, pakhat zawk erawh motor nambar leh a neitu hriat theihna kimchang ziahna a ni. Car lo tlan apiang Barcode hian tu ta nge tih leh engang nge a nih a lo hrechiang (identiy) zung zung thin a ni. Amaherawhchu, khuareiah a rintlak tak tak loh avangin kum sawm hnuah a aia changkang zawk leh rintlak zawka siam a ni zui leh ta a ni.
Barcode hi Super market-a bungraw enfiah nan an hmang tangkai hle. An hmanna ber pawh amaha thil quality that leh that lohte lo enfiah theitu a nih vang leh data hrang hrang lak khawm zung zungna hmanrua a nih vang a ni. Chuvangin, automatic identification & data capture (AIDC) atan Khawvelin a hmang tangkai hle. Kum 1974 June thla khan a vawi khatna Universal Oroduct code (UPC) atan Wrigley Company chuan Thialret (chewing gum) tuamna kawrah a hmang tan a, a tangkaiin a chhawrnaawm hle. Barcode hian Company-te thilsiam chhuah (product) chu a quality a tha em tih leh a dik ngei em tih a man nen lam a kawkipin a bihchiang vek thei a; chuvangin, Damdawi tuamna kawrah te, Computer leh TV etc. bawmahte hian Barcode chu an bel a; Computer scanner-a ena thil siam chhuah dinhmun kimchang hriat mai theih tura tihna mai a ni a; Sakawlh nambar awzawng a ni lo ve!
Industry lam atan USA pawhin kum 1960 atang khan a lo hmang tangkai tawh a; Thilsiam chhuaktu company-ten 1974 atang khan an lo hmang tangkai tawh bawk a; Sakawlh nambar ni se’ng chuan mitinte hi min chhinchhiah kimna hun chu a awm tawh a, mahse, tun thleng hian tumah hetianga an chhinchhiah hi sawi tur an la awm lo niin a lang. Bazara Company thilsiam changkang leh tha tak tak chinte i lei chuan a bawm khawimaw lai kha en la, barcode chu i hmu ang. Lehkha Ban varah rin dum chhuk zawngin a thlur sung ang a, a hnuaiah a khamphei zawngin nambar a lang tuar ang. Kha tak kha Scanner atanga enin a tak (original) leh a that zawng (quality) leh a man zat thlenga hriat theihna chu a ni.
A tangkaina:
Thil hralh leh zawrhah Barcode hi a tangkai hle tun lai thil thar tha leh duh thlan tur awlsam taka hriat zung zung theihna a nih avangin Khawvelin a tel lovin sumdawnna a kalpui theih tawh lo a ni ber mai. A tangkaina tlem azawng hetiang hian tarlang ila:
1. Thil hralh zung zung nan leh enfiah zung zung nan a tangkai a, rinngamna min petu a ni.
2. Thil hralh chak theih loh a finfiah zung zung theih a; hei hian sum dinhmun a siamthat phah thin.
3. Thil siam chhuah thar zel dan leh tha zawk hriat chhuah zung zung theihna a ni.
4. Thilsiam (item) hrang hrangte engtianga rei nge a nih tawh tih leh a chanchin kimchang a hre thei.
5. Thil man bithliah dan tur a hriat theih a, a tlak hniam leh pun belh turah pawh tanpuitu tha a ni.
6. Thil leitute discount card siam nan leh consumer-te hriat hran nan a tangkai hle.
7. Thilsiamtuin a thilsiam a thawn chhuah dawnin midang hriat thiam ve loh tura chhinchhiahna danglam bik (unique Identifying Number-UID) bawm pangah a bel thei.
Heng bak pawh hi a tangkaina sawi tur tam tak a awm a, vawi khatah kan sawi seng lovang.
Chuvangin, a langsar zual leh tul zual chauh tarlan a ni e.
Barcode chi hrang te:
Barcode hi chi hrang hrang tam tak a awm a; an hnathawh dan a inang tlangpui a; A hman dan erawh a inang vek lem lo, chungte chu hetiang a ni:
- Linear barcode
- Matrix (2D) barcode
- Intelligent Mail barcode
- Latent image barcode
- Pharmacode
- Aztec Code
- Small Aztec Code
- Color Construct Code
- Compact Matrix Code
- CyberCode
- Compact Matrix Code
- Dot Code A
- Datastrip Code
- Grid Matrix Code
- EZ code
- High Capacity Color Barcode
- HD Barcode
- Intacta Code
- HueCode
- MaxiCode
- InterCode
- Nintendo e-Reader#Dot mCode
- WaterCode
- QuickMark Code
- QR Code
- ShotCode
- Snowflake Code
- SuperCode
- SPARQCode
- UltraCode
- Trillcode
- VeriCode, VSCode
- UnisCode
- CP Code
Heng tarlan bak pawh hi Code hrang hrang a la awm thei. Tin, Code tinte hian nambar hrang hrang an nei a; an code namber erawh tarlan sen a ni lovang. Tin, an code pek dan hi nambar indawt dan a ni tlangpui a; Sakawlh nambar anga digit thum (3) chauh a ni lova, a code an pek dan azirin digit tam tak pawh a ni thei.
Barcode chi hrang hrangte hi Tui enfiah nan te, damdawi lam enfiah nante leh Daka parsal thawnna atan leh kawng hrang hrang tam takah an hmang a; chuvangin Barcode hi Sakawlh nambar a ni lo tih hriat chian a pawimawh hle.
Tarlan tak ang khan Industry lam atan USA pawhin kum 1960 atang khan a lo hmang tangkai hle tawh a; Sakawlh ni se mi an chhinchhiah hnem tawh hle ang. Kum 1960 atanga 2015 inkar chu chhutin kum 55 lai a liam tawh a, mahse, tun thlengin USA-ah a ni emaw India ramah a ni emaw Sakawlh nambar nei emaw, Sakawlhin an Kut dinglamah emaw an chalah emaw Barcode hmangin Sakawlh Nambar 666 chhinchhiahna a chhutsak hmuh tur emaw hriattur a la awm lo! Sorkar leh khawtlang hmalakna tithuanawp zawnga dawt hmanga mi sawi thaih chingte hian mi an sawi thaih hmain ngaihtuah chiang thin se a tihzia ngawt ang.