Lo hal ni

Dr. H.T.C. Lalrinchhana

Vau thla alo herchhuah meuh chuan zoram nipui chu romei leh meikhuten boruak an luahkhat hle anga, khua han chuan vel pawh ni ila khawthlir a tawi hle ang. Thallai ani a, Mizote eizawnna kumtin thlawhhma lak a ahna hmasa ber lovah zawh tawh 'Chapchar awllen' lai anih avangin luikal leh ram vah mai loh chu mipa inih chuan hnatul a awm lemlo ang. Hmeichhia inih erawh chuan la I her anih loh pawhin puan itah in chawhma chuan thingtuah I phur bawk ang a, mahse khaw thenawmte lo hal khu chuan ni engmawina pawh chhuah hleithei lovin chengkek rah hmin angin a sen ram ang a, a eng dul ruih ang. Lunglengmi leh hla phuah mite chuan inchham lunglen nan taka hmangin nangpawh ngaihbik lem I neilo anih pawhin I lung a leng veng veng chuan a rinawm, achhan pawh I hawivelna lam apiang mai chu a ro ri re vek anga, tlang lang hla hleithei lo khawpin romei chhum in a bawh nguai anga, nun hi a chawhnu ruih hranpa ve hrim hrim thin anih kha.

Chutah tlai lama upa deuh thil chinchang hria leh chhut peih deuhte ramvak daia chawl chuan “Keini khua pawh ni hluiah lo hal ila atha ang, tin, lo hal kan hma loh chuan ruah ahnai” an tih chuan khawtlang hotute beng athleng anga, bengsika an ngaihtuah hnu ah lohal chu an rawt thlu tawh ang. Lo halni atan chuan naktip nak thai nise ti a an rel thluk hnu chuan tlangaupa chuan “Khaih... Khaih …. Khaih... lo ngaithla theuh rawh u khai, naktip nakthai ah lo kan hal dawn avangin naktuk hian apa hian apa chhuakin meikawng/meilam sah tur ani a, kawtchhuah lungdawh ah innghah khawm tur ani. Tin, ran nei zawng zawngin mahni ran kimtaka khalh haw theuh bawk tur” ti a a au vau vau chu tlangval phawk deuh thenkhatin an lo au nawmnah zui anga, tlangau velhin lei kuai miau heklo le. Tichuan, lohal tura intintuah leh thlaichin dan tur ngaihtuah chung chuan mut hmunah pawh rilru an seng zui tawh ang.

Atuk tukthuan eikhamah chuan meilam sial tur chu an chhuak khawm hmur anga, mipa rual chuti zozai chhuakkhawm chu hmuhnawm pawh iti viau maithei bawk. Dam lampang sat tur leh nikang lampang sattur chu inthendarh hlawmin, chawhma chuan an lehlan der anga, ran neiin ran khalhchhuak vekin, pa ram vachal deuhte chu luidung lamah an hnufumin an tawi khawmuang ngei ang. Zanah chuan tlangaupa chuan lohal tur chu a han au nawn leh anga, ngaihtuah atam tawh hle ang.

Lohal ni chuan khawtlang mipui zawng zawngte chu lohal tur chuan an chanvo theuh tur atan an in buatsaih sung sung ang. Zing atangin pa ho chu an ti ti deuh mam mam reng anga, engdang sawilovin hmeithainu mawng zingzum laia sa chan a khan tur zia te, thirdengpa vaua chan a beiseiawm tur ziate bak an sawi chuang kherlo ang. Tichuan, lo hal ngai ve lo (a lailum lama thlawhhma neite) thalai thenkhatten midang lo an halpui anga. Mipui nunau leh tar chak tawhlo te chuan kawtchhuah bungpui bul thengthaw nuamtak atanga lohal thlir turin an in buatsaih ang. Pasaltha deuh leh ram vachal deuhte chuan sa chang turin uisathiam tello in tlai deuhtakah fei kibar leh athenin silai ak far chungin hnung an dawl ang a, lohal ngailo midang halpui silo thalai leh pa valai deuhte chu vahchap ep chiah khaw lam pangah chuan iptepui leh chemtum nen thangte dawhin an ther fer fur ang a, an tihtur zawng ngaihtuah buai duh suh rawng eng leh rawng sen inhnawih kher mah suh sela 'Fire Service' tih hre mai rawh. Khaw lam hawizawnga ramkang a awm anih chuah englai pawha thelh thei tura santiri mai an ni. Lo hal tur hian an inbuatsaih nasa em em a, achhan chu an lo kan dan azirin an kumkhat khawsak dan tur a hril hle dawn ani. An lo chu thentheih thlawtlo in a kang failo angem? Nge, rin aiin bawn ram mah nise akang tha thovang aw? tihte rilru ah ariakreng tlat si ani.

Lohal hun chu a rualkhai na atan te leh thli thatlaia hal anih ngei theihna atan te, dar vawtu chuan dar ri hriatkim theihna lai tur velah awmhmun akhuar anga, chawhnu her thlit thatlaiin dar chu a vaw ri val val anga, avuak zawh veleh asa himna turin hmun ralmuang lamah a in saseng nghal ang. Sa changtu te erawh zawng ramsa mangang chhantu ngai, thihna pumpelh tura tlanchhuah tum, kan hlum hlau ngawih ngawih a an hmazawna rawn tlanchhuakte hlah hauhlo a lo chhunhlum emaw, lo kahhlum emaw zawl chu an lawmna ber ani si a, tichuan, in ringtak chung chuan an lo chang ran a, lohal turte lah chu dar vuak rik hun nghakin an lo halna tur hmun theuhvah chuan a khat tawkin an intlar thap ang.

Chawhhnu her alo nih chuan thli arawn thaw heuh heuh anga, mahse dar ala ri silo. An phun sap sap hnu chuan dar chu arawn ri ta val val anga, an bula mei an lo chhem lawkah chuan an meichher ken chu dep kaiin an hmabak chu lohal tur ho chuan an dep tan ta par par a, an kalna tura an lo sah kuaksa ah chuan vah chap dep kang zauh zauh pah chuan an tlan par par ang. Mauchang te chu a puak ri pup pup anga, meialh inhlap ri thum hum hum leh meikhu dum chho nguah nguah kara meialh sen zuai zuai te chu rawlthar deuh tan chuan lungphu a in thumrawn tluk tluk ta ve ang. Lohal tute chuan an hal zawh chuan luite chu kanin ral lam pang mual ahma kuma chul thlam ram tawh bul atang chuan mei luh thatna lai leh duhthusamlo laite chu an thlir veng veng tawh mai dawn ani.

In lampang kawtchhuaha bung leh hmawngpui zar hnuai leh kakpui vel ami nunau deuh hote chu meikhu alo chhuah tantirh atang khan an haw haw hluah hluah tawh reng a, meidil sat tur zia an suangtuahna ah alo lut zut zut ta ngei ang.

Ramkang thelh tura santiri hote pawh chuan nguntakin an lo thlir anga, meikawng sahna chin apelh vaih chuan arang aranga vaw mit turin mit an lo len ang. Kang thui deuh awm se an phal chin bak a sawn vaih chuan an zuk bawr anga reilote ah an thelh mai tur ani. Inchunga di hmang hote chuan baltina tui inchhawp chu inchunga hungin leihlawn an dawh ah chuan lohal tantirh atang khan an lo lawn fel diam tawh anga, mautlawn hmawra puan an veh bur chu tinah an hnim huh zel anga, mei vap leh meisi inchunga rawn tla apiang chu an lo dep hlum zel dawn ani. In a len deuh phei chuan pahnih pathum lai an awm ang. Hetiang hna erawh hi chu a awm anem deuhva mipa naupang emaw hmeichhe naupang pawh an santiri mai ang.

Hun engemawti hnu ah chuan meialh sen zuai zuai leh meithli thaw vuk vuk leh ri hum hum ten an vanglai an pelta tih ah chuan meikhu, vansang lam pan ta ho kha lapaw var thianghlim sar ang maiin an lo par var tup anga 'Par achhuang ta' tih tawngkam I hre zui maithei bawk.

Khua alo tlai chuan meikhu muai muai pawh alo ziaawm ta a, lohaltute ho khan kangvar chu an rawn chian haw ngei anga, chu kangvar dum ro karah chuan pa vannei deuhte chuan sa kanghlum lo hal ni la la chuan an chhar mial mahna. Nitlak dawn tepa rawn haw zut zut zutin athenin sakhi an rawn paw haw nalh nalh anga, athenin sazuk an rawn zawn hawng ang a, pa thenkhatte chuan sa kanghlum dum reu ro an rawn hawn maithei bawk e. I ngaihtuah phak bakin an hlim the ania, an zawhna inzawh tamberah chuan 'Enge ilo a an?” tih ani tawh mek ang.

Zanriah eikhawm awm hun vela pasaltha hnufual lo haw ten tlaklam mual akan thu leh an mahni maiin an rawn thelh mih theihloh thu an sawi chuan khawtlang hotute beng athleng var anga, rang mangkhenga tlangau a au avang chuan pa valai leh tlangval ho zawng zawng chu kang thelh turin an tlanliam zut zut ang. Nulate erawh chu innghahkhawmna in atang chuan tuithawla tui kengin hmunrem deuh laiah an lo inkhuar anga, val upa zual awm nuam vaklo ten an lo thutpui ang. Kangthelh tur chuan meikang hma ah an intlar anga chhawl (thingbuk) an ken theuh khan an vaw tliar tliar anga, reilote ah an vaw mit thuai ang. Chutianga vawitam an an thawhchhuah hnu ramkang rem tawhah chuan kuk ruih ruih leh changtum raih raih chung leh haw haw hluah hluah chungin lengite lo nghahna lam pan chuan chak tak takin an let zung zung tawh ang.

Nulaten duat tak leh duhsaktaka tui an lo tulh chu alawm tlangvalaten meisa an tawnlai pawha an mitthla-a chamreng kha. Nulaho tan lah an Chaltuaia te hnenah duhsakna leh seih an lo tihlanna alo ni rawl nen, tichuan meipui sa tak tawna chau zawr hnap tawh tlangvalte pawh inti pa thar lehin kut an hum ruh leh ngei anga, nulate an chaltuaia te ruala kala an zualko melh melh laiin khawfingchat arkhuan awm hun hialah khua an thlengfel chauh maithei. Hah leh inchhira phunnawi ahnekin chu zan reilote chu thenkhatte tan chuan theihnghilh har zan ngaihawmtak ani fo tawh maithei asin. Kangvar dumro kara thlai chi thlak tur leh mangkhawh hmabak teuh chungin chu ni chuan aliam san ta mai zawng alo ni.