Insuihkhawm leh zai i rel ang u

Mafaa Hauhnar

Unaute u, in damtlang alawm maw,Rinawmna chibai in dawng thei em?Thinlung chhungkhat Zoram chhehvela mite,Insuihkhawm leh zai i rel ang u. Aw, thang leh tharte’n eng nge kan tih ang le?Kan chanvo kan bil neihna kawng chu,Thawkchhuak turin eng nge kan tih tak ang le?Insuihkhawm leh zai i rel ang u.

Unaute u, han dawn nawn leh teh u,Khawvel unau hnam dang hriattir zelin;Kan nihna Chung Pathian ruat sa ang khan,Insuihkhawm leh zai i rel ang u.

Unaute u, in damtlang alawm maw,Rinawmna chibai inbuk ang le!Chhinlung chhungkhat Zofa kan nih hre rengin,Insuihkhawm leh zai i rel ang u. 

Kum 1999, Sahmulphah Thla ni 20,  Inrinni chawchhun fâk hun velah pa hawiher zahawm vêng vâwng, lu zo veh vawh tak, lukhum parh khuma tairaw tiang hmâwr kawm hnûm tha hlarh hawl hi ka chanchinbu khawihna hmunah a lo lêng lût hlawl a.  Chu ka inlêngpa chu inhmelhriattir hranpa ngai lovin Zohnahthlak insuihkhawm lehna thurin humtu leh Zofate inunau tawnna thupui leklârtu Mizo tlangval Lalzuala Sailo (Hony Capt. LZ Sailo 21.11.1924 - 25.6.2008) a ni tih ka hre nghal mai a. Churachanpur atangin Mizoramah a rawn insuan thla tawh tih hriat chuan ani ang mi ropui leh chhuanawm te chu va zawng chhuak a, va pan zawk tur ka nih tehlul nen. Amah zawkina min rawn pan hmasa mauh mai chu ka zak ru veng veng a.  Sialhâwk lal Liankanglova fapa, UN Peace Keeping Force-ah te lo tel a, Red Cross zingah te pawh lo chetla hrep tawh Capt. LZ Sailo hi kan inhmuh tûk lawka a kum 75-na champha hmang mai tawh tur a ni nâ a, kum 57 mi âwm velin ka hmu a. A hmel leh a chezia-ah kumin hnuhma a la hnutchhiah tehchiam lo hle.

Chibai te kan inbûk tawn lâwp lâwp hnu chuan thingpui dawm dun pahin kan inkâwm zui  mawlh mawlh a. “Kan inkâwm” ka ti elo? Zawhna ka zâwt a, ani’n min chhâng a ni ber zâwk âwm e. Rei tâwkfang kan titi hnu chuan Mizo hnahthlak unau thenkhatina ka lung an tih-awi loh avanga Mizo nihna atanga sahthlâk mai pawh duh rum rum khawpa rilru hrisel lo ka put châng a, min kai harh thar leh thintu, a hla phuah zawng zawng zinga ka duh ber “Insuihkhawm leh zai i rel ang u” tih hla a phuah dan ka zawt ta a.

Mi chhang mai lo chuan a aw a thian kharh kharh a.  Zun inah a va kal leh tê tê a. A lo kir leh chuan thutthleng bânah a kiu dinglam nghatin a kut zungchalin a biang a dawm a, a kut zunglai leh zungpuiah a khabe nghatin, ngun takin ka mitah mi en a. Heti hian a sawi ta a:

“Kum 1979 khan Tripura-a Zo hnahthlakte hnenah, thla ruk zet thangin  ka zin kual a. Kan unau ‘Chawrai-Langrawng’ kaih peng Mualthuam, Zamatia, Barahalam leh unau dangte ka zuk hmu a. Hmun thenkhatah chuan tawnglettu ka mamawh thin avangin Pu BK Hrangkhawla’n ka tawng chu a let deuh ber. Thu ka sawi dawn apiangin, ‘Unaute u, in dam tlang em le? In unaupa khawchhak atangin ka lo zin a, in hnenah hian unau nihna rinawmna chibai sem turin ka lo kal a. Chhinlung chhuak Zofate hi hnam ropui tak kan ni a. Mahse, Burma, Bangladesh leh India ramah te kan awm darh a. India ram chhungah pawh Tripura, Manipur, Nagaland leh Meghalaya state-ah chi bing tam tak angin kan awm thlih thliah a. Chu’ng zawng zawng chu kan insuihkhawm chuan khawvelah hian chimralin kan awm lo vang. Chuvangin, insuihkhawm lehna thuthlung hril turin ka lo kal a ni,’ tia ka sawi zawh hnuah ka thuchah ken chu ka sawi ta thin a.

“Zampui tlangdungah ka lo chuang chhuak a. Hmawngchuan atangin chhim lam panin Zofate awmna khuaah insuihkhawmna thuchah zuar chuan ke ngatin ka kal zel a. Hmawngchuan khua atang chuan vartianah keimah chauhin mau tiang hawlin ka chhuak a. Hmawngchuan leh Hmunpui khaw inkar ka kal lai chuan chung lam atangin “aw” ka hria a. Chu aw chuan, “Veivahna tur motor pawh i nei si lova Zo hnahthlak awmna khua zawng zawngah chuan i insuihkhawm lehna thuchah hi i hril zo hmanin, Zohnahthlak zawng zawng i hrilh kim seng  chuang lo vang. Chuvangin insuihkhawm lehna lam hla hi phuah la zaithiamin an la sa lar ang a, i chawlh mai mai lai pawhin mi sing telin  i thuthlung hi an lo ngaithla thei dawn asin,’ a rawn ti a. Ka thu hnawk a, ka mittui a tla a.

“Ka tho va, ka mittui ka hru hul a, ‘Hla chu phuah ngei tur a nih hi,’ ti chungin Tlaksih khua ka lut a. Ka thlen in nula, Lapuii kan tih mai Zothanpari pindana tingtang perha a lo zai ri ka hria a. A nu hnenah chuan, ‘In nula chu min han koh teh,’ ka ti a. Lapuii chu ka bulah tingtang nen a rawn thu a. Minit nga pawh tling lovah “Insuihkhawm leh zai i rel ang u” tih hla chu February ni 28, 1979, tlai lam dar ruk leh a chanve (6:30pm) khan ka lo phuah chhuak ta a ni.” tiin Zofate hnam rohlu lo pian chhuah dan ngaihnawm tak chu min hrilh.

ZoFest

Thu leh hla lamah sulhnu a ngahin a kut a kal hle. An sawi danin hla sak chi ringawt pawh 350 vel a phuah a, thu (articles & essays) sangkhat chuang a ziak a. Lehkhabu pawh bu sawmli (40) puitlinin bu 13 chu tihchhuah a ni tawh a. A thawnthubu pakhat “Runlum Nuthai” tih chu MAL-hovin “Book of the Year 2002”-ah an puang a. He’ng a kutchhuakte avang hian India ram chawimawina sang Padma Bhushan Award pawh kum 2007 khan India president kut atangin a dawn phah nghe nghe a. A lawmpuiawmin a chhuanawm hle.

A kutchhuak, a thu leh hla ka han chik chian hian, zep nak emaw,  literature tukverh atanga thlir chuan chuti teh lua niin ka hmu lo. Hriatna leh finna kawngah chuan thil thar tam tak min kawhhmuhin, kan khawhawi pawh a tizau ngei mai, ka pha lo. Amaherawh chu, a thu leh hla han vawrhchhuah dan leh a thlekpui danah themthiamna danglam (artistry, creativity, inventiveness, etc.) hmuh tur a vang ka ti a, ka dah sang tehchiam lo.  Amah ti-“Capt. LZ Sailo”-tu leh ka ngaihsan tawp theih lohna zawk chu Zohnahthlak hnam inpumkhatna a ‘champion’-pui dan hi a ni. Heti lamah na nâ nâ hi chuan tuna an chawimawina hlan tawh zawng zawng aia sang hi a la phu a ni.

Mizote hi Rose pangpar vul ve ta lo ka niin a ngai a; then darha kan awm avanga vul ve ta lo kan niin a sawi thin. Zofate insuihkhawm lehna a vei em avang hian India chuan sawrkar dodaltu niin a hmuh phah a. Kum 1982 July Ni 13-ah an man ta hial a.  Manipur atangin Aizawl District Jail-ah an sawnin vawkpui anga khung beh tlat a ni a.  “Ka thil tumah ka chiang a, dikna awmphaw nen chuan engmah hlauh ka nei lo. Ka tan chuan experience tha tak a ni a. Pawngsual emaw rûkrûk emaw thil dang vanga tâng ka ni lo va; insuihkhawm leh duh avanga tâng ka nih avangin ka tan chuan kha ka tawrhna kha lunghlu a ni,” tiin a thil tawn hlut zawkzia a sawi a. A tan lai hian a kal lam that loh avangin Civil Hospital-ah thla khat tawp dah a ni a. Hemi chhung zawng hian thirkhaidiata hren leh kawl buntir a ni.  Mahse chu chu zahpui a hnekin hmana man lo tawk tawh hlaphuahthiam RL Kamlala’n,

“Hmanah khawzo siahthing kan bun,

Tunah thiamthang ngunkual hi ...

Lenpuia’n ka chhuang ber mai.

Lenpuia’n ka chhuang ber mai.” a lo tih ang khan a chhuang zawk a.  Amah kantu a thian pakhat pawhin, “Kha i thil bun kha kawl a ni lo, ngûn-mawi a nih kha,” a tihsak tawp reng a ni. Zofate insuihkhawm lehna thlâkhlelh luat avanga man tawk hi an tam lo khawp ang.

Unaute u, in damtlang alawm maw?

Keimahni Mizo chhungkuaah hian kan lai tinatu a awm em? Kan nu leh pate’na min enkawl danah emaw, kan unaute’n min en danah emaw lawm lohna nei kan awm em? Chu’ng chu kan awm a nih chuan chhungkua kan nih ang ngeiin kan inhrilh tawnin kan harsatna te chu vaikian dan kan ngaihtuah tlang tur a ni dawn lo em ni? Nge kan chhungkaw buaina hi kan thenawmte hnenah puangzarin mahni mawng kan hlim dawn? Intih bingna leh inlâk hranna kawng lam lo awn teu to tâwk kan awm em? Khawvelah hian Mizo hnam hi uihûm lek kan ni a. Kan tlem tawh nak alaia kan la inphel sin leh zel chuan engtin nge maw kan dinkhawchhuah ang le? Isua ngeiin “Khawii ram pawh mahni indo apiang an boral thin; chhungkhat pawh mahni indo chu an ding khawchhuak lo vang,” (Luka 11:17, Mathaia 12:25) ti a a lo sawi kha. A mala kan tlat hran chuan phelhsep mal angin awlsam taka ulhtliah theih kan ni ang a, kan intêl ruh tlat erawh chuan mi chak ber ber kutah pawh kan tliak mai mai lo vang.

Rinawmna chibai in dawng thei em?

Hei hi zawhna pawimawh tak, hmai pha hauh lovin Zohnahthlak zawng zawngina “Thei e” tia kan chhan theih atana duhawm eltiang a ni.

Ram danga hnam dang zinga kan khawsaknaah hian kan hnam tan hian kan thianghlimna kan vawng tlat em, nge kan lo uire kual hrep tawh? Rinawmna chibai hi kan dawng thei em le? Tangka rosum ûm vang te, dinhmun duhawm leh hamthatna beisei avang tein kan Mizo nihna hi kan lo hralh tawh lo maw?

Kan Mizo hnathlak hnam zingah hian lungchhiatthlak takin rinawmna chibai dawng thei tawh lo va, hnam danga inchhung lut ta engemaw zat sawi tur an awm ta tlat mai. Kan mithiamte’na an sawi danin Mizo hnahthlak dik tak Halâm hnama chi peng pahnih Kawlawi leh Rupini te chuan Tripura hnamah min luhsan tawh a. Kolhren (Koireng) leh Hiroi-Lamjang te chu Meitei hnamah an inchhunglut tawh a. Mizo hnahthlak chi peng pasarih aia tlem lo - Moyang, Aimol, Chiru, Anal, Monsang,  Chawhte,  Maring te - chu Naga hnamah an inchhal tawh. A dang pawh sawi tur a la awm ang.

Eng nge kan tih tâk ang le?

George Bernard Shaw-a lemchan thawnthu ziah hmingthang tak ‘Saint Joan’-ah khan Joan of Arc chuan, “Van Lal hnuaia kun vek kan ni a. Ani chuan kan luah tur ram leh kan inbiakpawh tawnna tur tawng min pe a. Chu chu vawnghima humhalh tlat turin min duh a ni. 

English-hovina Pathian hnen atanga kan chanvo dawn rawn luah an tum tlat mai hi Pathian duh dan leh remruat dan kalh tlat a ni. Chuti ni suh se, indona hmuna English-pa kan tihhlum hian tualthat kan ni dawn asin,” a ti a. Keini pawhin Kan nihna Chung Pathian ruat sa, Kan chanvo kan bil kan neih theihna turin kan in-unauna kara hêm thlak a, thirhlingnei hmanga min then hrangtu hi theihtawpa bei turin tan kan khawh dawn lo em ni?