Mizo tobul chhinlung leh ka tawnhriat

Rev. L.Rema

Mizo zirlaite hian mahni hnam tobul chanchin te, nunphung leh tawngte hi hriatchian a pawimawh em em a, ram danga han awm phei chuan mahni hnam tobul dik tak kan hriat loh chuan hnam dang zingah a zahthlak ve thei tlat. Chuvangin China ram Sichuan Province a awm Sinlung (Chhin lung) chungchang tawite in han tar lang ila tuna zirlaite leh zirchhuak tawhte thlenga hriat makmawh a ni.

Dt. 22nd February, 2012 khan Mizoram Khawpui Aizawl atangin Myanmar ram paltlangin China ram panin ka chhuak a. Yunnan Province ka thlen hian tunhmaa rawng ka lo bawl tawhna hmunte ka tlawh kual a, ka rawngbawlpui Chinese Pastor pakhat Yanjinfu chu China ram Sichuan province a awm Sinlung khuaa min kalpui turin ka sawm a, a lo remchang ta hlauh mai a.

Tichuan 13th March, 2012 khan Yunnan Province atangin Sichuan Province a awm Chhinlung panin kan pahnihin kan chhuak ta a. Kawng a thuiin khaw tamtak kan paltlang a, ni 19th March, 2012 ah Ganze khua kan thleng a zan kan riak a, a tukah Ganze atangin Sinlung (Chhinlung) khua pan tur Sumo ah kan chuang a passenger an la kim loh avangin driver chuan Sinlung Sinlung Sinlung…. tiin kawtthler ah passenger zawngin a au vak vak mai a, tichuan 20th March, 2012 khan Sinlung (Chhinlung) khua chu tluang takin kan thleng ta a.

Mizo History ziaktu ten Matric zirlaibuah vawiin thleng hian Chhinlung awmna hmun hriat a ni rih lo, hmasang titi satliah anga an ziak Sinlung (Chhinlung) chu a hmun ngei kan thleng a mumang pawh a kan man phak loh Mizote tobul Chhinlung an sawi thin hmun (leilung) ngei kan rap ta chu a ropui hle in ka hria. Lalpa chu fakin awm rawh se! Hei hian Chhinlung a awm chiang hle a ni tih kan hre thei mai awm e.

Tuna kan kalna Chhinlung China ram map a a lan dan chuan Latitude 28º leh Longitude100º ah awmin Yalong lui sir tuak dinglam leh veilam ah a awm a, Yalong lui hnar lam atanga kan chhukthlak chuan dinglam ah hmun zawl zau deuh a awm a building in veilam aiin a tam deuh a Yalong lui kanna hi concrete bridge in an dawh zawm a motor eng chi pawh a kal kai theih. Kan kal lai hian ruah a sur a vur a tlak reng avangin a vawt hle.

A khuaa chengte hi Tibet hnam deuh vek an ni a, Tibet tawng an hmang tlanglawn hle Buddish sakhaw betute an ni a, Kristian hmuh tur an awm lo, tuna an insak dan tlangpui chu concrete building pangai leh Tibet hnam insak dan type a ni deuh tlangpui. Tin, Chhinlung khua  mulzawl zau tha lai tak ah hian hmanlai mi huaisen Army General Lian Hua’n sakawr chunga a chuang lai a lim chu an dintir luah mai a, he mual zawl ah hian Chhinlung khua nu leh pa naupang thlengin zing nilum ai pah a in kawm khawm nan an hmang thin, an Zawlbuk tual zawl hmun ti ila a sual tampui awm love.

Tin, Chhinlung ah hian hmanlai hmanrua Dar, Bungbel, Thi, Taihren, Chem, Fei, Thal, leh Hriamhrei dang tamtak hmuh tur a la awm. Hmanlai Pasaltha fam chang ta te ruang dai zalhna thlanmualah chuan an sakhming te nen mawi takin thlanlung an siam a, an enkawl fai thin hle mai. Kan pi leh pu ten doral hlau a Yalong lui mawng lam an zawh thlak na lamthuang te chu a la thlur thla ruih mai a, an sulhnu tam zawk pawh Chhinlung thlanglam ah a awm a puk lian pui pui zau tha tak tak te, sei pui pui thuk tak tak te chu pi pu te sulhnu tichiang tu te an ni henglai hmun hi tunah chuan ramsate riahrun ah an chang zo tawh a riah chawfai nen ke a kal ngai te a ni tawh.

Tin, lung kawngka (a rammi te tawngin) Lungbangkha an tih te pawh vawiin ni thlengin hmuh theihin a la awm, Awle, engpawhnise Zofate tobul Chhinlung hmun chu hmuh theihin chiang takin a la awm a Chhinlung khua chu Zopa ke ngeiin a rap ta a chiang leh zual a hre turin kan puanven sawi chhing ila zirlai te pawh in Mizo tobul Chhinlung chanchin dik tak kan hriat theih nan tan ila thar leh ang u.