RE Ralte
Atheist ropui tih lemah Atheist zingah ‘ropui’ tih kan nei tihna ni lovin Atheist a nihnaah mi ropui a tling pha tihna lam a ni a. Anthony Flew-a hi Methodist Pastor fapa, ngaihtuahna a hman thiam tirh atanga sakhaw thil ngai ho leh Pathian awm ring thei lo chho ta ngar ngar a ni a. A thluak a that em avang pawh a ni ang khawvela University hlun ber leh tha ber pawl Oxford University-ah te zirtirtu hna a thawk zak zak a ni. A paper ziah hmasak ber ‘Theology and Falsification’ phei chu Philosophy thuziak-ah chuan chhuah chhawn nasat ber a ni e, an ti hial a. Ani tluka Atheism tan nasa leh Pathian awm lohzia sawifiah tumna lam kutchhuak nei tam awm lova sawitute pawh an awm. Kum 50 vel chu inthlahdah lo takin mithiamte zingah Pathian awm a awihawm lohzia thu a lo tlangaupui tawh thin a. A lehkhabu zawng pawhin textbook rawn nasat ber pawl God and Philosophy tih te, The Presumption of Atheism tih te a lo ziak tawh bawk a ni.
Chuti taka a beih hnu leh a hming pawh a than viau tawh hnu, kum 2004 khan ‘Ka thu ka zuk e. Pathian hi a awm a ni tih ka ring ta,’ tih thu a puang ta roh a nih chu. Mithiamten mak an ti nasa. A kamliam lo chang tawh Atheist tam takin an haw zual hle. Sawichhiat leh deusawh pawh a tawng nasa a ni awm e. Mahse, ani lah chuan “ ‘Thil ni awm zawk zawk chu ka pawm mai tur a ni’ tih hi ka tanna a ni reng…hman atangin,” a ti mai si. Atheist ropui chu a tlawm ta a ni.
Kum 2007 khan hetianga a ngaihdan a sawhsawn nachhan ziakin lehkhabu There is a God: How the World’s Most Notorious Atheist Changed His Mind, tih a chhuah a. Chhiar manhla tak a ni. Anthony Flew-a hian khawvela tuarna rapthlak tak tak awm avang hian Pathian Engkimtithei a awm hi ring lo thinin, Pathian hi a awm ngei a ni tih kan finfiah theih hma chuan ‘a awm lo’ tih hi kan bultanna a ni tur a ni, tih thu te hi a lo sawi vung tawh thin a. Mahse tunah chuan van leh khawvel hi Siamtu awm loa rawn awm ngawt a nih theih lohzia te, Thilsiam inrem fel mak tak avanga Pathian awm a awihawmzia te, leh Pathian avang chauha mihring zinga nun dan dik chungchang sawi theih a nihziate chu thu ho mai maiah a lo ngai thei ta ngang lo a, zah pawh dawn zo lovin a ‘Dawl zawrin ka zawr, ka tlawm e’ a ti ta a ni ber mai.
A rilru thlaktu ber nia sawi chu tunlai Science thil hmuh chhuahte hi a ni tlat mai. Hei hi a chhinchhiah tlak hle a ni. Universe hi bul tan ni nei tia Big Bang Theory a rawn lar takah hian ‘engmah lo’ (nothing) atangin ‘thil’(something) hi a rawn chhuah ngawt a ring thei lovin Siamtu a awm a ring ta tlat a ni ber a. DNA chungchanga Science-in a thil hmuh chhuah tharte a thlir hian ‘finna’ tel lovin hetiang thil mak hi mihringah a inphan chhuah vek a ring thei lo a ni. Tin, he khawvela nunna(life) a awm theih nana vansang planets leh arsite reng reng inrem fel dan mak tak mai hian ‘remfeltu’ awm lova awm theiah a ngai thei ta ngang lo a ni. Entirnan, science thiamte bawkin an chhut danin eng(light) hi a kal chak dan chu 299792458 metres/sec a ni a. Hei hi second khatin emaw danglam ta se, he khawvelah hian nunna(life) hi a awm thei dawn lo a ni. Hetiang thil awmzia hian Flew-a chu mihring piah lam finna awmzia hi pawm lo thei ni lovin a siam a ni a. Lei leh van thununtu dan(laws) Science-in a hmuhfiah zel hian Pathian bak thil dang kawkin a hre thei ta thlawt lo a ni. Ani chuan chiang tawka ngaiin ‘I have to follow where the argument leads’ a ti mai nia.
April 8, 2010 khan Anthony Flew chuan he khawvel hi a lo chhuahsan ve ta a. A nunah hian zir tur tam tak kan nei. |hangthar lehkhathiam thenkhat zingah rilru hmang leh mithiam tak tak ten Pathian awm an ring mang loa hriate an awm ta nawk mai. Science leh Pathian inkalh tlata hriate pawh an awm. Mithiam chungchuang Anthony Flew te meuh pawhin Science thil hmuhchhuahin a Pathian a kawk chiang ngeia ngaiin Atheism atangin Theism-ah an inlet a, tlawm leh zah pawh an dawn zo lo a nih hi.
0 Comments