Environment leh Leivûng paih dan

Robin Lalmuanawma

Serchhip District Monitoring Committee on Implementation of JICA on NH-54 member-te chuan July 14 khan Bhartia Infra Project Limited-te leivûng paih dan an endik a, Serchhip district-a NH-54 zauh hna thawh meka leivûng paihna hmun khat liam tawh siamṭhat nana retaining wall siam tura tihte chu thla hnih chhunga thawk zo tur leh chumi chhung chuan lei lai tawh rih lo turin an hriattir.

Tun hnaiah Serchhip District chauh ni lo, Champhai District leh Lunglei District lamah pawh kawng laih avanga leivûng paih dan chungchangah hmalakna a awm nual tawh a, Mizoram Jour­nalist Association lam pawhin July 2, Inrinni khan Aizawl leh Keifang inkara national highway kawngpui laih leh siam mek an lo enfiah tawh.

Thla hmasa lam khan pawl panga, Youth for Environment Justice Mizoram, Lunglei Ṭhalai Pawl, Serchhip Ṭhalai Pawl, Hnahthial Ṭhalai Pawl leh Saikhawpui Ṭhalai Pawlte pawhin Chief Minister hnenah National Highway and Infrastructure Development Corporation Limited (NHIDCL) hnuaia kawngpui laihin environ­ment a tihchhiat nasat lutuk tihtawp a nih theih nan hma la tura ngenna an thehlut tawh bawk.

Ram hmasawnna tur leh ṭhan zelna kawngah inkalpawhna kalkawng neih ṭhat hi thil pawimawh tak a ni a, chu ai maha pawimawh lehzual erawh kan chenna leilung chenna tlak a nih reng theih nana vawn ṭhat a, enkawl hi kan tihtur a ni a, Pathian laka kan bat a ni.

Hemi kawnga Mizo ṭhalaite kan harh zel hi a lawmawm takzet a, Mizorama kalkawng siam hna thawk mekte pawhin Mizo ṭhalaite duhna hi ngai pawimawhin, thuneitutena ngenna an lo siam tawh hi an zawm hram hram a ṭul takzet.

India State of Forest Report, 2021-in a tarlan danin, Mizoramin kum khat chhungin ramngaw sq.km.185.51 kan hloh a, hei hi ralkhel dar a ni tawh - chutihlaia kan kawng laitu company-ten dan awm sa zawm lo a, an duh dan ang anga leivûng an la paih mai ṭhin hi a pawi takzet a, Serchhip District Monitoring Committee on Implementation of JICA on NH-54 member-ten hma an la ve leh ta hi a lawmawm takzet a ni.

Mizoram hmun hrang hranga dan zawm loa leivûng paih a nih avangin lui a tibawlhhlawh nasa a, sangha dil tam tak tihchhiat a ni tawh bawk. Hmasawnna duh viau mah ila, hmasawnna tura hmalaknate hian tuihna siamtu ramngaw leh nungcha a tih chereu a, leivûng paih dan uluk lohin lui tui a tihbawlhhlawh zel chuan Mizoram mipuite hian tui thianghlim kan tlachham thuai ang a, kan ram hi chenna tlak loh a ni mai dawn a ni.

Environment humhalh kawngah Mizo ṭhalaite harh zel ila, thuneitute pawhin kan ramngawte humhalh a ngai tawh takzet tih hriain theihtawp chhuahin hma la zel se, tih hi kei ka duhthusam a ni e. Kan ram hi a chereu i phal lul lo ang u.