Dr K. Lalnghinglova, MFAS
1. Thuhmahruai: Kan lehkha zir lai han ti ve khanglang ila, Civil service exam lam kan tui zual lai khan thlakip chhuak, Sapṭawng Magazine kan lei ṭhin a. Chu’ng zingah chuan Competition Success Refresher te, The Chronicles-te kha a langsar zual deuhte chu an ni awm e. Chu’ng Magazine karah chuan India rama zirna in ṭha deuhte fakna a awm ṭhin a, mit a lain luh ve theih a chakawm ṭhin hle.
Chu’ng zinga langsar tak pakhat chu, Indian Institute of Management (IIM) hi a ni a, MBA etc. zir theihna a ni. IIM aṭanga MBA chhuak nih kha a chakawm a, chumi lut tur erawh chuan beih ve fe a ngai thung. IIM chhuakte ngat phei chu hna zawn kawngah pawh amahniin zawn ngai loin private company lian tak takten an rawn inchuh zawk ṭhin a ni.
Chutiang zirna in sang (Premier Institution)-ah chuan Sorkar hotute
duhsakna changin IIM, Kozhikode (Ko-ri-kod), Kerela-ah kar khat chhung
training turin hun remchang ka hmu hlauh a. Central Sorkar, Ministry of
Finance lamin a sponsor a ni. Programme course hi Public Private
Partnership (PPP) & Infrastructure Development chungchang a ni a;
Public Transport-ah te, Health Care chungchangah te, zirna chungchangah
te leh sector hrang hrangah-te PPP Model kalpui dan tur min hlui a ni
ber. 
Indian Institute of Management Kozhikode
2. A tlang leh a mual : AD 1489, May ni 20 daih tawh khan Portuguese mi hratkhawkheng, Vasco Da Gamma chuan he khawpui Calicut (tun hnua Kozhikode an tih tak) khua hi a lo thleng tawh a. Chinese te, Arab te, Portuguese ten sumdawnna hmunpui atan an hman hnuin British kutah awmin, chumi hnuah French leh Dutch hote an rawn lut veleh a ni.
IIM Campus hi Airport aṭangin darkar khat vel tlan a ni a, Rs 1600 kan chawi a. Lengpui to Aizawl Taxi fare nen a inzat viau mai. A khawpui hi Tuifinriat kama awm phaizawl ni mah se, a campus tak erawh tlang phir pahnih, pawng sang lo tak chhipa awm a ni thung. Ruahtui a dawng ṭha a, campus chhunga an tui hman zawng zawng hi ruahtui khawl (rainwater harvest) aṭanga lak a ni a, hei hi a chhinchiahtlak hle. Khawpui boruak bengchhengin a tihbuai loh, tlang thengthaw nuam taka awm niin zirna hmun atan hei aia ṭha thlan tur a awm chuang awm lo e.
3. Kan hmuh leh hriatte :
Tirhkoh Petera ten, ‘Keini zawng, thil kan hmuh leh kan hriatte kha sawi loin kan awm thei lo a ni,’ an tih ang deuh khan; kan thil hmuh leh hriatte hi sawi chhuak loa ngawihbopui mai atan chuan a pamhmai deuhin ka hria a, ka han ‘chhim ṭhal bekang puah’ ve phawng phawng ang e.
A. Subject pawn lam
i) Inren rawh khai! Airport aṭanga darkar khat ṭha kan tlan hnu chuan zan a lo ni a, khualbuk kan thleng a. Ka khawsakna tur Room ka han lut a, ka hmuh hmasak ber chu tui leh energy ren tura hriattirna a ni. Business School nge nge, an inren hle dawn a nih hi tiin rilru a vak kual nghal a. Chumi nemngheh nan chuan, bath room-ah fiah takin ‘Save Water, Switch off Geyser after 05 mins’ tih alo intar kuau bawk a. Tui renchem rawh, tui lumna hi minute 5 aia rei ON suh ang che, tihna a ni.
In lama tui kan herh haw huau huau te, tui so bulh bulh hnu pawha off mai loa kan chhuan rei ṭhinzia te, a ni! Thlasik laia Office tin deuh thawa heater kan vuah furte chu mithlaah a lo lang a, ho tea lang ni mah se zir tur a awm nghal!
ii) Simple Living High Thinking: He thu hi naupan tet atanga kan zir thin a ni a, mahse a taka hman erawh a har hle mai. Kan thawh chhuah phu lo a, kan khawsak phung sang lutukte hi vei thin sa teh mah ila, a taka nunpui a har mang e! Class room-ah kan han lut a, kan zirtirtu ‘Professor’ a lo thu diam tawh a. A hmel lan dan mai atang chuan kum naupangte a nih hmel. Pheikhawk bun loin ke lawngin class room-ah a vei theuh theuh mai a. Ani hi United States-a magazine lar tak, Wall Street Journal-ah te pawh article lo ziak nual tawh thin a ni. Professor dang a rawn kal leh a, ani pawh chuan pheikhawk bun ta chuang lo chuan Vawthlep, Slipper nen min rawn zirtir leh ta mawp mawp mai a.
India rama zirnain ṭha ber pawla min zirtirtute thuam inbel dan chuan ngaihtuahna a tithui a, an khawsak simple lutuk chuan zirlai min hnuchhiah leh nual ta! Anni chu pawn lam lan dan leh thawmhnaw inbelah an buai lo a, an inteh hek lo! Simple taka khawsa, ngaihtuahna thuk tak nei site nun aṭang hian zir tur a va tam em!
iii) Engkim a hun takah : Kan thlen tirh phat aṭangin engkim a hunah tih chat chat vek a ni a. A tawi zawngin sawi ta ila, thaw lakna hun a awm meuh lo a ni ber e! Class room kha Professor ten min thlen khalh deuh reng mai a nih chu! Ṭum khat chu kan Prof pakhat minute 3 velin a rawn tlai hlauh mai a, classroom ni lo zawkah min lo nghah vang chu niin! Minute 3 leka tlai pawh kha a inthiam lo hle a, ngaihdam a dil chul mai a ni.
Minute khat hlutzia hi minute khat chauh a awm tawh hnuaah chakna goal khung theih a nihzia, Football en ṭhinte leh khel ṭhinte chuan an hria ang. Ni e, inkhawm kal tlai kan hlauh ang bawk hian office kal tlaite hi hlau ila kan ziaawm deuh ang em? tih rilruahte a lo awm nghal zat a.
PPP Investment Model-ah chuan Private Company ten Investment rawn tiin, a ruhrel sak/din, a enkawl hna leh services mipui hnenah an thawk ang a, a hlep awm theite pawh an tel ang. Sawrkarin lamin a hmun hma leh dan leh hraite a kengkawh thung ang. Chu service chu man chawi ngai a nih chuan mipuiten a man (user charges) an pe ve thung ang. Entirna mawlte lo tarlang ila: PPP model atan Hospital din lo thlang ta ila. Hemi atan hian Private company ten Hospital building sakna tur senso an tum ang a, Doctor leh medical staff- te pawh a thiam thiam an ruai ang, a hmunhhma erawh sawrkarin a pe ve thung dawn a ni. Chumi hman man chu mipuiten kan chawi ve thung ang. Hetiang lo pawh hian kalpui dan kawng hrang hrang a awm thei a, kan sawi vek seng lo ang.
Sawrkarin Infrastructure tha din tura sum leh pai lama harsatna a neih chang a awm fo ṭhin. Chu'ng hunah chuan Pvt. company-te invest turin a sawm a. Tuna Delhi Airport khu PPP mode-a kalpuia a ni a, tun tleng hian World Class Airport an nei thei a ni. Sawrkar tana enkawl hautak tak–kan Airport te, kan Public transport te, Power & Electricity chungchang te, kan Health Care System te thleng hian PPP model-a kalpui chi a ni em? tih erawh a chhiartu ngaihdan ni se.
ii) Project Impact Evaluation: Sawrkarin Programme emaw Scheme emaw Project eng pawh a kalpui reng rengin a hlawhtlinna teltu turte ngun takin a ngaihtuah ṭhin a. Project hlawhtlin leh hlawtlin loh tehna pawimawh tak chu Impact Evaluation hi a ni. Kan ramah project siamin Central lam aṭang paw'n sum kan hailut tam narawh e. A ṭha! Amaherawhchu, heng kan project siamte hian engti ang chiahin nge mipuiah rah ṭha a chhuah tih erawh kan chhut let fo a ngai thung a ni.
Project hlawhtlin leh tlin loh chung changah heng thil palite hi kan enchian a ngai hle: Input, Output, Outcome & Impact te hi! Entirna mawlte han sawi leh ta ila: Thil zuar Company pakhatin TV-ah sum tam tak sengin advertisement a chhuah a. Chu advertisement chuan engti ang chiahin nge Sales-ah hlawkna a thlen tih a chhut let a ngai a ni. Chutiang bawkin sum tam tak seng a, Sorkar programme advertisement kan tihte hian eng ang chiahin mipuiah nghawng a neih tih kan chhut let ṭhin em? Belh leh paih (Quantitvative analysis) hmanga chhût theih a ni kher loh mai thei, mahse, mipui rilru sukthlek erawh a teh theih thung a ni. Eg : Exit Poll. Chu ai maha pawimawh zawk chu - Vaibelchhe tel man teh meuh Project lian tak tak kan siamte hian mipuite khawsak phung ṭha zawkah a thlen em? Nge, kan project-te hi mi tlem te hlawkna mai mai tur tih kan zirchian fo a ngai ni. Chu chuan Programme leh Scheme kal mekah thutlukna dik a siam ang a, Programme kalpui zel dan tur pawh a hril dawn a ni. Kan Sawrkar Programme kalpui tawhte- MIP leh NLUP te kha Impact evaluation mumal tak neiin, chumi results aṭang chuan tuna SEDP kalpui mek pawh hi ṭha lehzuala kalpui dan a awm ngei ang.
iii) Political Payment & Economic Freedom: Mizo tawng ang maia kan hman tawh ‘Corruption’ chu ṭawngkam thar ‘Political Payments’ tiin an lo sawi a. Ancient Rome leh Medieval China hun lai aṭang daih tawh khan an Lal, Emperor-te intlawnsiakin ram leh an thil neihte pein he Political Paymenst hi an kalpui tawh ṭhin a. Engkim kha an Lalte kutah a awm avangin Rome hun laia Alexandria’s Steaming Engine hmuhchhuahte kha Toys ang lekin museum ah hnuchhiah a ni a; Medieval China hun laia Paper, Compass, Sana leh Gun Powder an hmuhchuahte kha an Lalte kutah engkim thuneihna dah a ni. Chumi awmzia chu inkhuahkhirhna nasa tak avangin hma sawn zel turin Economic freedom a awm lo a, chu chuan an thil hmuhchhuahte hlutna a phawk chhuak lo va, a tiṭhuanawp tlat thung a ni.
Economic freedom a awm lohna ram apiangah eirukna- Malpractice/ Cooruption kan tih chu a hluar zel tiin zirmite chuan an sawi. India ramah pawh engkim Sorkar thuneihna sang tak, dan leh hrai khirh tak tak avangin hmasawnna duh angin a ṭhang thei lo ti ila a sual lo vang. Ram dang aṭanga bungraw tlawm zawka la lut turin dan kaltlang ngai tam tak a awm a, thawnchhuak turin dan paltlang a ngai tam hle bawk. Chutiang bawkin miin a chhehvela Sikul ṭha din turin Permit a neih a ngai a, Industry din turin Licence a neih a ngai a. Economic freedom/ Free trade a hniam a; khuahkhirhna paltlang thei tur chuan a kawng a thui a, hmuh a harsa a, a hautak a ni. A kawng awlsam ber chu thuneitute hnena puanhnuai thil, a man pek chu a ni. Chu chu a ni, Political Payments kan tih chu! Chu chu awlsam taka Business kalpui theih dan awmchhun a ni a, Political payments chu economic freedom thlaktu (substitute) atan hman a lo ngai ta a ni!
Ziaktu pakhat chuan, “Corrupt behaviour is a consequence of ‘rule of the game’, not a consequence of the ‘motifs of the players’ a ti. Chumi awmzia chu, ‘Eirukna hi a eirutu rilru sukthlek dik leh dik loh lam ai mahin kan dan leh hrai khirhkhiap lutukin a rah chhuah zawk a ni...tiin a lo sawi a. Hei hi corruption chungchanga thlirna tlang dang deuh ka han tarlang a ni e.
Vawiin hian state dang ang thoin keini pawh sum leh pai lamah harsatna kan tawk mek a ni a. Kan thawhchhhuah a beithamziate hi zep thu a cheng lo. Zau zawka hma thlir neih a, ram dang atanga Investment rawn ti duh an awm a nih chuan kawng kan lo sahhawn a pawimawh hle ang. Tin, kan ram chhung ngeiah pawh thawh chhuah leh thar chhuah kan neih ang angte chak zawka kalpui a nih theih nan kan dan hman mekte ennawn a; awlsam leh kawng zau zawk hawnsak dan kan ngaihtuah a pawimawh hle a ni. Chu chuan economic growth a tikang awk awk ang a, tin, dan phena Political Payments kan tihte pawh a tikiam zawk ngei ang.