Lehkhabu ngei

Lalrinzuala Chawngthu

Ka ngaih san êm êm Bill Gates-a hian kum tin lehkhabu 50 vel a chhiar ṭhin. Kuminah lehkhabu 50 chhiar ka tum ve a; mahse, ka tlin lo nasa hle.

Bill Gates-a hi chuan sumdawnna lam hawi te, thuril te, khawvel politics te leh thil danga mi rilru sukthlek leh thlir dan te a hre châk a, an lehkhabu aṭangin a zawng ṭhin.

Mizoten social media kan khawih nasa hle a, hripui avanga ina kan tawm nasat avangin kum dang zawng aiin kan khawih nasa lehzual. Social media-ah hian thu lâkna bulbal nei lo, mi thiam leh ril thuchhuak pawh ni lo, zir chianna tak tak awm chuang lo, tlachawp thu tam tak kan hmu a. Hengte aṭang hian mi tam tak chuan ngaih dan kan siam ṭhin. A belhchiandawl lo tak zet a ni.

Mi tam tak chuan google behchhanin thu ṭha leh fing te kan la a, hriatna tihzauh nan chuan a ṭha nangiang reng a. Mahse, news site-a thu thar tih loh; thu tam tak hi a ziktluak lo hle. Khawi lehkhabu emaw aṭanga lak dah a ni ṭhin. Innghahna berah a rin tlak lem loh.

Mizo ṭawnga ziak lehkhabu kum tin tihchhuah a tam hle ṭhin a, chhiar tlak deuh leh chhiar loh pawi lo a tam ṭhin. Mamawh lam hawi lehkhabu chhiar tur thlanah mi fing an fimkhur ṭhin hle a, mi mal hmasawnna tur leh an tana ṭangkai tur lam hawi lo lehkhabu chhiar tam an duh lo a ni. Mi nawlpui erawh chuan chutiangin kan thliar lem lo a, kan hmuh hmuh kan chhiar mai zel.

Mizo ṭhalai tam tak hi lehkha chhiar thatchhe si, sawi duh ngah si kan tam hle. A chinchhuaka thil chhui peih lo leh chîk peih si loa tlachhawpa kan thu hmuh behchhanin ler deuh aṭanga ṭhuai a, ngaih dan siam mai kan uar a, hei hian mi principle nei lo leh pawnlâwiah min chhuak phah ṭeuh a, a pawi hle.

Eng lehkhabu pawh, vantlanga pho chhuah ngam chu chhiar tam hi a ṭha hrim hrim. Cowbow buah pawh finna te, dikna ṭan ṭhatna te, mihring cheng ho kârah inphiarrûkna te a awm theihzia hmuh tur a awm zel tho.

Zirlâibu chauh chhiar bel tlur hi exam-naa tih ṭhat nan ṭha mah se tunlai khawvelah erawh zirlâibu piah lam thlenga hriat tam loh chuan thil tak takah hlawhtlin a harsa tawh a, zirlâibu bâk thleng hriat theih theih hriat a ṭul tawh.

Khawvelah dam khawchhuak tura kan intuaihriam ve zel loh chuan kan bil tawlh tawlh a, hman tlak lohah kan chhuak ṭhin. Intuaihriam turin hriat tam a ṭul a, hre tam tur chuan chhiar tam a ṭul.

Social media-ah mi fing leh ril tam tak chuan an ngaih dan chipchiar an sawi zuah zuah ngai mang lo.

Chuvangin social media hi innghahna atana hman tlak a ni lo fo. Chu ai chuan mi chhiar tura pho chhuah ngam lehkhabu ngei hi eng kawng atan pawh innghahchhan atan hman a him ṭhin.

Mizo IAS pakhat chuan, _"A ziaktu pawh an awm chuan mi ziah sa lo hriat te chu a harsa hlei nem...,"_ a ti mai a! Mi ziah sa lo chhiar a, lo hriat ve hi mi nâwlpui tih theih a ni.

Ramri, Chakma leh Bru, MLA aṭanga inban chungchang te hi a lera ṭhuai mai loa a bulthum aṭanga sawi thei hi an tam kher lo ang. Mi tam tak chuan hre tura kan inchhiar zau peih loh avanga hre lo kan ni.

Pathian thu-ah pawh, hriat ngai loh châng ni loin hriat tawh sa châng hmangin a ni Pathianin kan hnenah thu a sawi fo ni. Pathian pawlna dawng tura Pathian thu kan lo hriat lawk a ṭul tho a nih chu.