Football te, Volleyboll adt. an khel ṭhin a, pawisa khelhna (gambling) chi hrang hrang a awm bawk. Inkhelha an tum ber chu mi bum leh an khingpuite kuta sahrang chhuhsak a ni. Politics hi chutianga khelh tur nge, gambling anga sum tuakna zawk? Politician suak chuan Assembly House hi khelmualah hmangin, ball an invuakper ṭhin a ni.
JF Dictionary-ah chuan politics chu ram awp dan ngaihtuah tihna a ni a, politician chu ram awp dan thiam tiin a hrilhfiah a. Tuman sorkar hna ka 'khel' an ti ngai lo va, sumdawng hna pawh ka 'khel' an ti ngai lo va, contract hna pawh ka 'khel' an ti ngai lo va, ran vulh leh lo hna pawh kan 'khel' lo va, a thawhin a ni, kan thawk zawk ni!
Kan politician ṭhenkhat hi chu politician lemchang an ni tih a lang fiah em em a. Politics chu tangka sum khelhna hmunah an siam a, “An pathian chu an pumpui a ni,” tih ang mai khan (Phil.3:19).
Kan ram hi mahnia ro inrelin kum 1972-2022 kan awm a. Term khatah MLA 40 zelin, term 10 zet kum 50 chhung kan hmang a; ram leh hnam vei inti MLA 2,000 rual zet kan nei tawh ang a ni. Kum 50 chhungin Mizoram ramri pawh ching fel thei lo ram hruaitu kan nei a ni.
Forth Grade pakhatin chhungkua a chawm thei a, thingtlang pain kuttum leh chempui hmangin chhungkua a chawm thei a, hmeithai pakhatin lamlian sirah sangha zuarin chhungkua a chawm thei a. Chutih laiin, “Pu zahawm tak,” tia koh mi 2,000 rualin Central sum dawng chungin kan ram chu kutdawh ramah min chhuah thei hram a ni; kan sawi uar deuh a nih pawhin a dik thuak ang! Sorkar aṭanga kan dawn tur min pek changin pangpar thi awrhtirin, mimal sum min pe emaw tiin kan lo zawn tak ang vu vu zel bawk a. A zawntu lah mawl bawk, an mi zawn lahin zah nachang hre lovin, an nupuite nen hlang chungah thuin ban an lo vai ngam a.
Politics hi mimal leh chhungkaw bil hamṭhatna atan a khelha khelh tur a ni lo va, Candidate belhchian dawl lo te vote-a ṭanpui mai lovin, ram leh hnam tana mi tha leh belhchian dawl kan tanpui mai tur a ni, tih te leh kohhrante tana thil tangkai ladt. a awm ṭeuh bawk.