Tenance Act

Commissioner Lalkiamlova

Mizote chu duham lo, mahni hnampuite hmangaihna leh ṭhatna duhsak a, rethei chawi kân tumna lian tak nei tlat nia ka lo hriat ṭhin avanga kan mamawh reng reng loh tura ka ngaih, dan pakhat a awm a. Ka rin loh ang leh ka beisei ang lo taka Mizote rilru a inher a, sum duhna leh mawi leh mawi lo pawh dawn hauh lova retheite neih chhun pawh ei ralsak vek duh mai hmel kan lo put takah hian kan mamawh ngai loh tura ka ngaih, dan chu hman ve a ṭha tawh mai awm mang e, ka ti ta a ni. Chu dan chu ‘Tenance Act’ hi a ni.

Hripui len hma khan Assembly Library-ah Assembly-in Dan an pass tawhte chhiar a, ka len ṭumin Tenance Act hi duan a lo ni tawh reng tih ka hmu a. Hman chhuah erawh chu a ni lo. Kan ramah he dan hi hman ni ta se la chuan, kan Leilet hminsa tam tak enkawltu hi vai an ni si a. ‘Kum chuti zat chu ka enkawl tawh a, ka nei thei tawh tiin Tenancy Act tlawh chhanin neih an han tum ang a; Kan rice belt ṭha lai zawng zawng hi min chhuhsak mai ang tih ka hlau deuh ṭhin a. Chutih avang chuan Mizoramah chuan hman loh a ṭha zawk ang, ka lo ti ṭhin a. Mahse, ngun taka ka ngaihtuahin, kan ramah, abikin Aizawl khawpuiah, miretheite tana khawsak a harsatzia ka hmuhin hman mai ṭhaa rinna ka nei ta.

Kolkatta-ah khuan Salvation Army-in New Market Bazar bul, Indian Museum hnung, Sudder Street No. 2-ah Redshield Guest House kan nei a. Indopui pahnihna hma lam aṭanga kan luah tawh, mi hausa ta a ni a. Kan luah rei tawh avangin a man an chhiar sang thei lo va, mi hnenah an hralh thei bawk si lo va. Kan leisak ta a, kan luah tirh aṭanga kan luah mana kan pek zawng zawng kan han chhut chhuak a. Kolkatta khawpui hmun laili, engkim mai a to em emna hmuna awm mah ni se, luah mana kan pek tawh nena chhutin nuaih sawmriat chauh pek belhin kan nei thei ta mai a ni.

Mizoram-ah hian in luah man a sang ve ta hle mai a. In neitute hian duh zah zah an chhiarin, duh hun hunah an punin, an in luahte hi laklawh sawi miah lovin an chhuahtir mai ṭhin nia sawite hi a awm a. Tin, lehlamah in luahtu a huna chhuak duh lo leh mahni duh hun huna chhuak tawp tawp te, luah man pe thei lo leh pe ṭha duh lote nen. Kan ram hian in inluahtir dan fumfe zawk kan mamawh hle tih a lang. In luah man sang leh duh zah zah chhiar chu thuhran ni se, mi luah tura room te tak tê tê-a ṭhen sawm a, an luah duh tho tih vang a, tui chhe paihna awm ṭha lo, Choka, sitting room leh Bed room pawh awm hrang thei lo, ṭhenawmte nena daikal in inṭawm te hi mihring rilru tichhetu pakhat a tling. Kan Aizawl khawpui hriselna tichhetu leh hri inkaidarh tiawlsamtu a ni thei bawk. Chu bakah, tuichhe paihna awm fumfe lovin veng a tiṭawpin leimin siamtu pakhat a ni thei bawk a ni.

Hetiang thilte avang hian tenancy act hi kan mamawh hlea hriatna ka nei thar ta a ni. Hei hian Leilet ram inhmantir dan ṭha zawk a hring chhuakin, kan ram buh thar pawh kan chan tam phah zawk ngei ka beisei. In luah tur neitu leh a luahtu tan pawh kaihhruaina fumfe tak neih a ṭulzia min hriattir ang. Kalimponga kan awm laiin kan ṭhiannuin chaw eiah min sawm a. An in luah chu basement sei tak hi a ni a. An luah man ka zawh chuan cheng sawmhnih pasarih a ti a. A tlawm em emna chhan ka’n zawh chuan, "A in man zat kan pek chuan kan neihsak thei mai dawn si a, a chhiar sang ngam tawh lo a ni,” a ti. Hei hian kan ram leh Aizawl khawpuiah miretheite tan chenna in awlsam leh tlawm deuh zawk a siam chhuah theih ngei ka beisei a ni.

Mihring chenna tur in chuan, inthiarna, tuichhe luanna, bedroom, choka leh sitting room a nei ngei tur a ni tiin standard fumfe tak siam ni se, chu chu kan Aizawl khawpui smart city a nihna tur leh, kan fai thianghlimna tur kawng pawimawh tak pakhat a ni ngei ang. Sawrkarin dan a siam emaw siam lo emaw mipui mi mirin kan ngaihpawimawh ngei ngei tur zinga mi a ni e.