Tik Tok - Beiseina petu

H.Lalroluahpuia

America mi, thuhriltu chawr no leh ziaktu duh­awm, thla khat emaw chhûng leka a lehkhabu hmasa ber leh neih chhun hmanga khawvêl deng chhuak a, mi tam takte hnêna beiseina nung petu, Cristina Baker-i hi kum 1984-ah khân tu hriat mah hlawh zo lovin chhûngkaw pangngai ve takah a lo piang a ni.

Khawvêl chhe ber ber chhiar sen loh a paltlang hnuin miten engtin nge Pathian hmangaihna chu an hmuh a, an chhân let a, Isua Kristaah chuan eng beiseina nge an neih ve tih chu a buaipui ber a ni ta daih mai!

Tiktok star Bristina Baker

Baker-i hi chhûngkaw keh chhia aṭanga seilian a ni. Kum 7 mi chauh a nihin a nu leh pa an inṭhen a. A nu hian pasal dang nei lehin Bolivia-ah an pem a, a pahrâwn hi a sual hle a, a tihduhdah ṭhin hle; kum a vei meuh chuan mi pangngai phâk zo lovin Baker-i chu a lo tlusawp ta der mai le.

“Kum 14 kan nih khân ‘aw’ ka chhuah tawh ngai lova, ka chhûngril natna chu ka incheina hmanga lantirin hmaihnawih u-chuak tak tak hmangtein ka inpuang chhuak ṭhin a ni ber. Thim hlir hi a ni mai! Ka chiau vawng vawng a, ka aw-râwl tâwpin ka nun min hriatthiampui tûr ka zawng a, ka mal tak zet thung. Hlutna ka thlahlel a, hmangaihna châkin ka tuihal dang châr a ni ber,” tih hi a chanchin a sawi dân hmasa a ni a, beiseina nung petu a ni ta si.

Kum 15 a nihin a nu hian amah hringtu a pa hnêna awm tûrin Hawaii-ah a thawn leh ta daih mai, ama sual vâng pawh a ni ve bawk. Thlawhna ṭum hmunah dârkâr ruk chuang zet a nghah a, a beidawn hnuah inthlahlel lo takin fapa chu an intawng a. A pa chuan luikama puan in zarah a khawsak ve mai mai thu a hrilh nghat zat mai. Baker-i chu a ṭhawng tak zet a, mak a ti lutuk chu sawi tûr pawh a hre lo.

A pa, a hriat ṭhin kha chu Oil Company lian taka Executive hna zahawm tak thawk, sum leh paiah pawh ni se, buai ngai lo kha a ni tlat a ni. Mahse, ruihhlo bawiha lûta ngawl a vei avângin a neih zawng zawng a lo chân zo hman si!

Pathian ring thei an ni ta lo! A awm lo tawp ang, an ti ve ta ringawt a, an tuar dun tlawk tlawk hi a ni ber. Baker-i chuan chhûngkaw pakhat Internet Cafe-a sumdawng te chu a ṭûl ṭûl thawkin a bel ta ringawt mai a ni. A nutei chuan Baker-i chuan belh tûr a nei lo a ni tih a lo hriatin a lainat hle a. Thlawhna ticket thawnin Houston, TX-a a hnêna kal thuai tûrin leh an chhûngkuaa tel tûrin a sâwm a.

Texas-ah chuan a chhûngte belin a khawsa ve naw naw a, khawiah mah lawm a hlawh zo chuang lo. A hringtu nu hnên aṭang chuan ticket a dawng ve leh ta tlat mai, Pennsylvania-a a unaupa, Messiah College-a lehkha zir mêk tlawh tûrin sâwmna a dawng a ni. A unaupa chuan tum vâng reng pawh ni lovin an basketball coach, Manzer-a hnênah chuan ṭanpuina a dilsak a, ani chuan Kohhranah thlensak ve lehin, America rama chhiatna râpthlâk - 9/11 thlen hma chiah chawlhkârah khân Hess chhûngkua chuan Baker-i chu lâwm takin fa atân an lo la ta a ni.

A in thar a han thleng chu an lo lâwm thiam hle a, ani pawh a hlim ve tak zet. Mahse, dân zawm ngei ngei tûr pahnih a nei - Zân dâr 11:00-ah chuan inah a awm ngei ngei tawh tûr a ni a, Pathianni apiangin Biak Inah a inkhâwm ziah tûr a ni bawk. Pathian a lo ring lo hman tawh bawk si, a buai ve tak zet a; duhthlan tûr dang nei ta lo chu, kum 3 zet an chenho hnuah chuan a lo danglam ta. Siam thar a ni a, phu loh hmangaihna changtu, hmangaih a lo ni ve ta. Hmangaihtute vâng a ni a, hlawhtling tak tak tûr erawh chuan kum 10 chuang zet an la nghâk ve tho.

High School a zova, a in dang ve a, zalênna a thlâkhlelh vâng a ni leh ber. A ngai te bawkin ruihhlovah a kir leh a, a bialpa Aaron-a fa a pai ta hial mai. Tihtlâk tuma ruahmanna an siam laiin ruihhlo zuartu pakhat kawppui nula pakhat nên an intawng fuh a, an vânnei leh ta rih a ni. Baker-i chuan University Call Centre-ah hna a hmu a. Pathian duhsakna changin a kaisâng ve ta hial mai! A fapa, Evan-a nêna an intun nunna tûr khawp chu a hmu ve ta. Mahse, Evan-a’n kum 2 a tlin chuan ruihhlovah bawk a châk a hrik thlâk leh a lo ngai a, man niin lung ina tân hmabâka police ten an hnungkhirh lai chuan mangang takin, “Lalpa, i awm tak zet a nih chuan eng vângin nge hêng thilte hi ka chungah a thlen bik?” tiin a au chhuak ve tâwp mai. Bail-a chhuah lailâwk niin, thla 3 chhûng zet chu en thlâk chhunzawm a ni - a ning ve hle.

Hetianga a nghah lai hian a nun chu châwl lo leh buai takin a hmang zo a, chhûnah hna thawkin zânah a rui thung. Ni khat chu mahni intihhlum tumin a inbuatsaih a. Chutih lai chuan a thawhpui, Hilroy-a chuan a dara vuanin a tâna Pathian thu sawi tûr a neih thu a rawn hrilh a, mak takin ṭawngṭaina pindanah an insâwm lut ta a. Hilroy-a chuan Jeremia lehkhabu chhiarsakin, thih leh dam inkâr thu a hrilh ta a, Baker-i chuan a bengah thutak a hre ve ta tlat mai! Hilroy-a hmang chuan Pathianin a chhan chhuak leh a ni. Kâr lovah an kiangah chuan mi an lo awm ṭeuh a, an ṭawngṭaihova, Baker-i tâna dil an ni ber. “Kha hun zet kha chu a hlu a ni, thlamuanna ka hriatthiam phâk ngai loh ka chhar a, ka dam a ni,” tiin nun thar a neih dân a sawi zui a.

Ruihhlo avânga a chunga rorêlna puan ni tûr chu a lo thleng a, a hlau­thawng ve tak zet a. A ukil chuan a tân mai a rin thu a sawi a. ‘Aw’ zawi tê hriain, District Attorney chu be tûrin tih a ni a, a ukil chuan a ring vak lo, mahse a zâwm a. A chhûngril a inbunruah zawh hnuah chuan DA chuan, “Kan zavai hian tisual ṭhin vek alawm kan nih, ni duhawm tak hmang tûrin duhsakna ka hlân a che,” a lo ti tlat mai! A tliak hnawp a ni ber e! Ngaihdam, thiamchantir a nih thu a han hria chu a va han hlim tehreng em! “Kha nunhlui kha ka kalsan vang vang a ni. Pathian hi a lo awm tak zet a, ka kiangah, keimahah ngei pawh hian a awm a ni, ka chhûngrilah hian meialh anga mutin, kha hunah khân a rinawmzia ka hmu chiang hle,” a ti thei ta!

A nuna bung thar zawh ṭanin, Hilroy-a chu amah kaihruaitu ber a ni a. Ni tin ṭawngṭai inkhâwm kalin Pathian nêna len dun chu nuam a tih ber a lo ni ta! Evan-a pa, a bialpa hlui Aaron-a kha a rawn lang ve leh hlawl a. Baker-i phone chu a ri ral ral a, a chhâng ngam lo. Hilroy-a chu panin, ṭawngṭaisak tûrin a ngên leh rawih mai. Ani chuan lo fuihin, a hlauhna te chu hneh tûra Pathian chu ringa engkim a siamṭhatsak leh vek beisei tlat tûrin a lo ṭanpui a ni. A tukah chuan Aaron-a chuan a rawn call leh a, Baker-i chuan thaw la vak vakin a intichak a, an inbe ve ta. Baker-i chuan a nunhluia a tihsual zawng zawngte avângin ngaihdam a dil a, amah ngei pawh chuan a ngaihdam thu a hrilh nghal bawk. Aaron-a chu Krista hnênah a hruai thleng ve leh ta der mai! Vânduaitlâk takin, ni hnih hnuah car accident-ah a boral zui a, Baker-i erawh chu a lungawi tlat, Aaron-a chuan Isua a hmu tawh dâwn tih a hria a ni.

Baker-i chuan ṭhalai inkhâwm­naah Ryan-a a tawng ve leh a, “Ryan-a hian keimah leh ka fapa tâna pa nihna a hlen chhuak a, pa awmzia min hriattir a ni,” tiin Pathian malsâwmna a dawn, a bialpa thar chanchin chu a sawi. Pa thinlung hriattirtu, Ryan-a nên chuan kum 2005, March ni 5-ah khân ‘Tiam tlat e,” an ti a, Evan-a pawhin pa a nei ve ta!

Kum 21 a nihin Evan-a a hring a, brain tumor a neih thu hriattir a ni bawk. Inenkawlna awm miah lovin kum 5 zet chu a tuar tâwp ringawt a ni. Mahse, Pathian hian Baker-i nunah thilmak tam tak a thlentir a, pathum chauh han sawi leh teh ang. (1) A pa, Pathian awm ring lo kha a piangthar. (2) Doctor ten a brain tumor hlawhtling taka zaiin kâr lovah a dam. (3) A nu a lo piangthar ve leh a, inpumkhat takin an awm zui.

Covid-19 lên vânglai khân Pa­thianin social media-a rawngbâwlna tûr a pe a. A la hmêlhriat loh leh chet ngai lohna lam ni mah se, Tik Tok-a ṭawngṭaina pho chhuak tûrin a inbuatsaih a. ‘Post’ a han siam zet chu a darh chak hle a, kâr lovah mihring maktaduai 9.7 chuang zetin ṭha an tih thu, ‘like’ hmanga tilangin, amah ngei pawh chuan ṭhian (follower) sing riat chuang zet a nei thuai a. A video chu second 60 chauh a ni nain, thu sawi ring leh darh zau, mite pawm leh beiseina thar petu a lo ni der mai! “Pathian hian kan nun leh hun zawng zawng hi a lo mamawh zo vek kher lo, engemaw ti ve tûr pawhin hun kan pêk theih ang chhun chhun hi a lo hmang ṭangkai thei zêl zâwk a ni,” a ti nghe nghe. Kumin May ni 31-ah khân Tik Tok Star, Cristina Baker-i chuan lehkhabu ropui, “Second 60 Chhûngin Beiseina,” (Hope in 60 Seconds: Encountering the God of the Impossible) tih chu a tichhuak a, mi zawng zawng hnawl hnu kha Pathian vângin mi sang tam tak tâna beiseina thar siamsaktu a lo ni ta!

Kan khawvêl boruak leh hun tawn mêk kan hria a, sual leh thim hlir a ni ta ringawt mai! Kan ṭâm leh kohâm tâk dân êm êm te hi a mak lam deuh chu a ni. Isua kan mamawhna tichiang lehzualtu te pawh a ni ve bawk ang. Eng anga dinhmun chhia, khirh leh hrehawm pawh ni se, Isua chu kan tân a rinawmin belhtlâk a ni reng a. Rorêlna fel lo tuar kan ni emaw, thlarau bo - chhandam ngai pawh kan lo ni thei a, natna tuara rûm, dam thlahlela thih sualin kan awm mêk a ni thei, retheihna sal belh pawh lo ni ila, he lehkhabua ṭawngṭaina 20 te leh mihring nun inthlâk danglam leh hmasâwn chhoh dân thawnthu ropui tak takte bâkah Bible zirtirnate hian mihring ṭha zâwkah a siam thar thei ang che tih ka beisei a, Pathian malsâwm lehkhabu hi chhiar ve ngei tûrin ka duhsak che a ni. Isua êngah chuan nun bul hi ṭan thar theih reng a ni a!

“Kum 21 mi chauh ka nih lai khân tute mahina an suangtuah phâk ngai loh tûr khawpa hlaah beiseina hi ka lo bosan daih tawh a, tûna i nun ang kha ka lo têm lâwk ve pawh a ni mai thei,” titu Baker-i hi mi vânduai ber a ni ngei ang. A hringnun hi a runthlâk tlûk zetin a ngaihnawm a, beiseina meichher chhi êngtu a ni ta! Ruihhlo tawlh rûk vânga lung in hmachhawn reng tawh, Isua zâra chhan chhuahna a chan dân te kha a mak a, a ropui a sin! Kan chanvo a ni!

Beidawngin kan chau ṭhin em? Tlûksawp chauh hmabâkin a ngaihna hre lovin kan chiai ṭhin em? Ruihhlo bawihah tângin hmun thim ber nghâktu pawh kan ni thei e. Keimahni chauh kan ni lo tih hria ila. Krista hmangaihna vânga hnehtute zâra beiseina nung chu kan chanvo hmasa lo ni sela. Beiseina leh a rah chhuahte hi i zir thar leh ang u. Pathianin keimahniah hian theihna a dah a, nunin a thlâkhlelh leh zawn ang tak lungawina hmu tûrin, ‘Isua nên’ ti tlat ila, a thlawn ngai lo.

Baker-i hring­nun thuchah pawh hi Isua tih a ni tawp mai! Beiseina, thim chhah ber kârah pawh êng chhuak zo a ni tlat a! Kan tânna hmun chu eng pawh lo ni sela, kan beisei chhan ber Isua a nih tlat chuan nun duhawm zâwk nên mihring ṭha zâwk kan la ni thei vek a ni, a la tlai lo ve. Beiseina nung - Isua kan neih hi a thlawn ngai dâwn lo! Isua Kristaa duhthlanna dik a ni mai e...