India leh Myanmar ramri-a insumdawn tawnna

P.C. Lawmkunga

Mi thiam tam takin Indo-Myanmar Border Trade hi an sawiin an ziak ṭhin a, a tlangpui chu kan hre viau hlawm awm e. India sawrkarin khaw chhak lam hawia Look East Policy (a hnu kum 2014-a Act East Policy lo ni ta) kalpui a tumnaa thil pawimawh ber zinga mi chu kawng hrang hranga Myanmar leh India inlaichinna ṭha neih a ni. Chûng zinga pawimawh ber tih theih chu insumdâwn tawnna ṭha neih hi a ni.

Indo-Burma Border Trade 

South East Asiaa ram 10 te tlawh pawh tur hian Myamar hi a kalkawng a nih tlat bawk avangin India ram tan Myanmar hi biak chhiat theih a ni lo. Chuvang chuan tun hma aṭang tawhin India hian Myanmar nen hian inhriat thiamna thui tak lo nei tawhin Myanmar-India Friendship Road pawh Moreh aṭanga Kalewa thlengin 160 km zet chu kum 2001 khan a lo sial sak tawh a. He kawng hi India (Moreh) – Myanmar (Mandalay)-Thailand (Mae Sot), Trilateral Highway 1408km zeta seiin a chhungkhung a ni.

Hei mai bakah hian India leh Myanmar hian inhriatthiamna leh thawhdunna kawng hrang hrangin an nei reng a. Tuna kan sawi lar viau KMMTP kawng te pawh hi India puihnaa sial mek a ni a. Chubakah energy lamah ONGC leh GAIL Company-ten Myanmarah hna an thawk mek a. Rel kawng siam leh power (electricity) siam chhuahna lamah an thawk dun mek bawk. Tata Motors hian truck lian chi siam chhuahna an bun mek bawk.

Insumdawn tawnna lamah chuan Confederation of Indian Industry leh Union of Mynamar Chambers of Commerce ten thawh dunna thuthlung an nei a. Hetianga sumdawnna tichak tur hian Sawrkar pahnih inṭâwm, Joint Joint Trade Committee pawh siam a ni. Myanmar tan India hi khawvela a sumdawnpui lian ber palina a tling phak a ni. Kum 25 kal ta chhung kum 2020 thleng khan India-in Myanmara bungrua a thawn chhuah chu kum tin US dollar 871 million hu a ni a, Myanmar chuan US dollar 742 million hu kumtin a rawn thawn chhuak thung.

Ramri-a insumdawnna ve thung: A chunga kan sawi khi a pumpui thu-a India leh Myanmar insumdawn tawnna hlim thla chauh a ni a. Border trade kan la sawi kai lo. India leh Myanmar hi ramri inṭâwm kan nih avang hian ramri-a insumdawn tawnna hian kan inlaichinnaah hmun pawimawh tak a luah lo thei lo va.

Chuvangin kum 1994 khan India leh Myanmar chuan ramri-a insumdawn tawn theihna tur thuthlung an rawn zam chhuak ta a. Mahse he thuthlung hian a huam zim vang a ni ber ang, kum 2015-ah chuan RBI leh DGFT chuan border trade hnuaia insum­dawn tawnna dan (barter trade leh traditional trade) chu tibovin dan pangngaia insumdawn tawnna normal trade chu a rawn puang ta a ni. He mi dungzui hian a hmaa item 62 an lo phal sa chu insumdawn tawnna pangngai angin kalpui a ni ta a. Custom duty rate pawh concession sang tak pek an ni ta bawk.

Entir nan, dan pangngaiah chuan kuhva ro tan CD chu 100% tur a ni a, mahse border trade-ah hian 40% a tihhniam a ni. Sawhthing pawh 30% aṭangin 25% ah, hmarcha chu 70% aṭangin 59% ah. Hetiang hian engemaw chen kalpui a ni tawh a.

Ramri-a insumdawn tawnna a tla chhia: Ram pahnih insumdawn tawnna Bilateral trade nena khaikhin chuan border trade volume hi chu a hniam viau mai, 1% pawh a tling meuh lo. Vawiinah phei chuan border trade-a insumdawn tawnna hi Moreh leh Zokhawthara Land Custom Station-ah te hian a awm lo tluk a ni. Moreh lam an ziaawm deuh a nih pawhin beisei an pha chuang lo.

International trade Initiative Forum (ITIF): Hetia border trade a lo tla chhe ta hi tundin leh dan a awm law maw tia kawng daptu he pawl hi pawl te tak te hi, March a 2022-a din a ni a. Hruaitu leh member pawh an tam lo hle. P.C. Lawmkunga, Lalthuamliana, Vanneihtluanga, P.L. Liandinga, Rosiama Vanchhawng leh J.Thatlinga te hi hruaitu-a an vuah ve te chu an ni a. Mahse an zingah border trade leh international trade lama tawnhriat nei em em an awm lo va. Chuvang chuan mi thiam leh thil hre zawkte rawn kual kha an hna hmasa a ni a.

March 11, 2022 ah khan Innovative Centre-ah Seminar hmasa ber buatsaihin mithiam pathum, Prof. Vanlalchhawna, MZU, Pu Lalmalsawma Pachuau, Joint. Director DHS, Food safety, Govt of Mizoram leh Pu Mangboia Customs Department te sawmin border trade chungchang leh a mutante sawihona hun ṭha tak a buatsaih a. ZONET, SBI leh Cookie Jar ten a bul min tum sak(sponsor) a, kan lawm hle. Chu mi hnuin Hrângbâna College-ah Dr. Lalbiakzuali Commerce deptt leh Staff te nena ṭanghovin ni April 7, 2022 khan EXIM chungchanga thil hriat turte min hrilh turin Pu Lalngaihzuala State Bank Of India-a Asst. GM hlui sawm a ni leh a. Hemi hunah hian Pu Lalduhthlana Ralte IFS (Rtd) ex-Ambassador-in Sawrkar leh sawrkar indawrnaa insumdawn tawnna pawimawhzia min hrilh bawk a, kan vâr deuh uar mai.

Heng seminara kan tum ber chu engtin nge Indo Myanmar border trade hi dan pangngaia kan kalpui leh theih ang, harsatna eng nge sut kian tur awm tihte a ni ber a. Border trade kal mumal loh avanga dan lova bungraw lakluh lo pung ta nia lang te leh, abikin kuhvaro avanga mipui phunna a nasatzia leh chutih laia State Sawrkar lamin awmze neia thil a kalpui thei lo nia hriatnate khan nasa takin min nawr bawk a ni.

Chutia eng emaw chen kan mithiamte aṭanga bengvarna thil kan khawnkhawm hnu chuan India rama lal ber Prime Minsiter hnena thlen rawih mai kha ṭha berin kan hria a, lehkha sei fe kan buatsaih ta a. Chutah chuan border trade lo tlakchhiat dan leh a tihnun lehna tur nia kan hriat leh mawhphurtu Ministry leh Department te chiang takin kan tarlang a. Kan memorandum hi March 29th 2022 khan Prime Minister hnenah thawn a ni ta a.

Hemi hnu hian Governor pawh April 13th, 2022 ah hmuin hma kan lak dante kan hrilh a, min lo tuipui ve viau va. Hma lâk zel dan turte pawh min lo kawhhmuh nual a ni. Prime Minsiter hnena kan lehkhathawn kha a thâm ral mai mai dawn emaw kan tih lai leh Delhi lama ûmzui tura intirh hial ṭhaa kan hriat laiin vanneihthlak takin PMO chuan kan lehkha an dawn ni lâ lâ April 13, 2022 khan Ministry of Commerce-ah (PMOPG/2022/0082116-Taken up tiin) thurawn an lo pe thla a lo ni a. Min. of Commerce hian border trade hmasawnna tura mawhphurtu Ministry hrang hrang chu a ṭûl anga hma la vat turin mawhphurtu bik official-te hming hmerh meuhvin kan lehkha chu an thawn kual tih hriattirna chu May 27th 2022 khan kan dawng ta tlat mai a. Chung mawhphurtu officer te chu Ministry-a Joint Secretary vek, S.K. Barnwal, MHA, Ms. Samita Pant, MEA, H.Pokhryal DONER, Pankaj Sharma, Financial Services leh CS, Mizoramah te niin a ṭul anga hma lo la turin an hrilh ta vek a ni.

Kan lehkhain a nghawng zel ni âwma ngaih theihin MEA Joint Secretary khian Manipur CS chu Moreha Integrated Check post chu hawng thuai turin thu a rawn pe a. Mizoram sawrkar an hrilh thu erawh a chuang lo thung. (Business Standard, IANS May 27, 2022). PM hnena ITIF-in kan lehkha thehluhte pawh an rawn sawi lang nual a ni.

June 20th khan Aizawl rawn tlawh NEC Secretary Moses Chalai IAS nen chhun chaw kan ei dun laiin heng thil hi ka sawi chhuak a. Ani chuan NEC lam pawhin border trade tihnun lehna tura hmalatu tur Committee an din dawn thu min hrilh a. Chu Committee-ah chuan ITIF member te min telh ve turin ka han ngên thla ngawt bawk a. Chutiang vel chuan he pawl hian he thil hi kan vei ve viau mai.

Border trade tihnun leh thuai a pawimawhna: India ram tana ṭha turte chu sawi pha lo mah ila, Mizoram tan hian he border trade tihnun leh hi a ṭûl khawp mai. Vawiina kan buaipui em em dan lova lakluh kuhvaro, damdawi ṭha lo leh bungraw dang tam lutukte hi khilaia border trade pangngai kalpui theih a nih loh vang a ni ber. Border trade tihchangtlun avangin smuggling zawng zawng zawng a bo vek ang, tihna lam ni lovin nasa takin a tinêp ang tih lam a ni zawk. Chu ai maha pawimawh zawk chu he border trade hi kan tihnun leh theih chuan Mizoram, abikin ramri depa awmte tan sum hmuhna leh eizawnna remchang tak a inhawng nasa dawn bawk a. India Sawrkar leh Mizoram sawrkar hian chhiah a hmuh belh ṭeuh bawk dawn a ni. Tin, Hachhek tlangdunga kuhva chingtute thaw pawh a ven phahin a rinawm bawk.

International trade te chu vei pha lo mah ila, Indo-Mynamar border trade tihnun leh hi Mizoram tana hlawk tur a nih avang tal hi chuan State sawrkar pawh hian hma la se a duhawm khawp mai. April ni 6th 2022 chawhnu dar hnih khan PM-a kan memorundam copy kha CM kutah ka hlan a. Mahse tuia thlak ang deuhvin a pil vang vang mai. India sawrkar, PMO leh Commerce Ministry meuhvin a ngaih pawimawh border trade tihnun leh hian kan hotute beng a verh lo hlein a lang a, a ngaihna a vang hle. Kan political party te pawh hian an manifesto ah hian an telh meuh lo nge ni, an sawi ngai lo hle a. Nimin piaha Champhai vel a fannaah khan Pu Lalduhawma chuan ZPM in sawrkar a siam hun chuan Indo-Myanmar Border Trade tihnun leh hi an hna hmasa a nih tur thu a sawi a, chu zawng chu a la ni rih.

A ngaihna hre zawkte kha rawn pên chhuak teh u le.