Homosexuality

Dr. C. Lalhrekima 

Synod-in Union Minister of Law & Justice-ah meuh lehkha a thawnna subject, August ni 15, 2009 a kohhran tinin tawngtaina kan hmanna thu, thu khirhkhan zet mai, mipa leh mipa emaw, hmeichhia leh hmeichhia emaw inngaihzawn leh mut dun (homosexuality) chungchang thu hi sawi ka duh tlat a. Mahse a subject hi a ril ang reng a, sawi a ngamawm loh a, sawi thiam pawh a har a, sawi chi nge chi loh tih ka inkhap nasa a, mahse tunhnaia ka thil tawnte atangin sawi tul ka ti ta riau si a ni.

Kohhran tina kan tawngtai thupui ber kha chu IPC Sec 377 na, ‘mihringte awm dan tur bawhchhiaa, mipa leh mipa, hmeichhia leh hmeichhia, mipat hmeichhiatna hmangte chu hrem theih a ni’ tih Delhi High Court-in a hrem theihna dan tih bo a tumna chu tih bo a nih loh theihna tur a ni ber a. “Hengho hi hrem theih ni zel rawh se” tiin kan tawngtai kha a ni ber a. Kan kohhran Nupa Chungchang Dan Bung 5 : VII (B) INKAWP LO CHI INKAWP : Mipa leh mipa emaw, hmeichhia leh hmeichhia emaw, nupa anga inkawp (Homosexual leh lesbian) te chu inngaihna sual emaw, uirena sual emaw emawa tlu anga ngaih tur a ni a, thunun tur an ni’ tih a kalh tlat vang a ni ber a. Hrem theih a nih loh chuan he thil hi miin sualah an ngai lo vang a, kan pawmzam ang a, hetiang mi hi an lo pung zel ang tih hlauhna vang a ni bawk.

Kan tawngtaina thu piah lam hi ka rilrua awm zawk chu a ni. Tuai leh patil kan tihte, chumi aia nasaa mahni neih anpui inngaihzawnna chungchangah hian chhungkaw tin hian zir tur kan nei niin a lang a. Homosexual kan neih belh zel lohna tura chhungkaw tin mawhphurhna leh anmahniho laka kan rilru put dan turte hi inthlahrung tak, thiam loh inring tak leh tul ti siin luhchilh ka’n tum chhin ta poh chu a nih hi.

Sawi a tul em?
Mizoramah hian homosexual hi engemaw zat chu an awm ve a. Ram pum anga zirna chiang tak chu awm lo mahse pawl thenkhatte zirna atang chuan mipa leh mipa inkawp hi engemaw zat chhinchhiah an ni a. Tunhnaiah kei ngei paw’n ka hmu ta nual mai a. Heng chhinchhiah bak leh kan hmuh bakah hian a ruka ti tam fe awma ngaih a ni. Hmeichhiate chhuina a awm chiah lo na a,  mipa aia tam zawk tur ngaih a la ni ta deuh deuh. Mipa leh hmeichhe lo chesual angin an rai lang ve tawh bawk si lova, an mualpho ve mai mai lova, tun thlengin Mizorama kohhran zingah pawh ‘thunun’ an la awm lo niin a lang. An awm lo tihna a ni bawk si lo. Mipa leh mipa inhmannaah lah hian tunlai natna lar AIDS kan tih ang chi hi a darh chak bik e an la ti ta zel bawk si a, chuvang chuan he thil hi ngaihzam mai mai chi a ni ta lo a, kan ngaihven a hun ta hle in a lang.

Sex
Pathian chuan sex hi inthlahchhawn nana hman tura a siam a ni a. Adama leh Evi atangin chi thlah bul tan a ni a, Abrahama hnenah leilung luah khat tura thupek a awm zui a, chumi hmanrua chu sex hi a ni tlat a ni. Mipa leh hmeichhe inhman tawnna atang chauhin chi inthahchhawn theih a ni. Mipa leh hmeichhe inneihna Pathianin a chawimawi a, a thianghlim a, a zahawm a. Mipa leh mipa emaw, hmeichhia leh hmeichhia emaw inneihna erawh chu ‘tih hlum tur’ tia Leveticus (18 : 22 ; 20:13) atanga inziak tawh, Paula ten vanram kai lo tur an tihte zinga mi la ni zui ta zel a ni (I Korinth 6 : 9 – 11).

Mipat hmeichhiatna chungchang hi Pathian siam leh a remruat anga kalpui chuan thil duhawm leh hlimawm tak, Pathian hnathawh kan puih ve theihna tura Pathianin a rem min ruatsak a ni tihte kan sawi ve tawh thin a. Mihring piang tawh tam zawkah chuan buaithlak lutuk lovin, zirtir hranpa ngai lutuk lovin, keimahnia Pathianin hormone a dah hmangte leh mihring inlaichinna kawng hrang hrang ena zir chungin mipa leh hmeichhia chu mahni nihna inhriain, duh zawng pawh pangngai takin a kal thluam thluam a.

Chutih karah chuan mi thenkhat, mi tam zawkin, ‘dan pangngai a ni lo, sual a ni, Pathian-in a siam dan pawh a ni lo, hrem chi an ni’ tih tur ang hian mipat hmeichhiatna hi an lo hmang ve mek tho mai a. Kan chak zawng te, kan phurna tichhuak theite hi a inang lo hlawm thei khawp mai a.

Hmana Taikheri scandal-te kha, mi tam takin Taikheri zawk kha engemaw ngaiha ngaiin, sualna nei lo kha kan khengbet lo chauh a. A chhuitute khan nausen ruang phawrhtupa khan sex chakna dik lo, ‘mitthi pawl chakna – necrophilia’  neih vang mai zawk an ti ta a ni lawm ni kha? Hmanni lawka thi ta Michael Jackson-a pawh khan naupang itna, paedophilia a nei nia puhna te pawh kha a tawng nawk nawk a nih kha. Hengte hi daktawrte leh zirmiten - sexual disorder, danglam leh dik lo niaa an ngaih tam tak zinga thenkhat a ni a. Chi dang pawh a tam mai. Mipat hmeichhiatna kawngah hian sawi tur tam fe a awm a ni.

Homosexual kan pawmzam tan?
Hmanlai atangin tuai leh patilte pawh hi an lo awm ve tawh a, mipain ama mipatpui ita mu dun ta tlat mai te, hmeichhia leh hmeichhia in it ta tlat maite hi an awm bawk a. Hengho hi homosexual tiin hmanlai chuan nungchang dik lo, natna chi khat, abnormal, thildik lo tiin enkawl ngai, mi rilru piangsual anga ngaih an ni thin a, mahse tunlaiah khawvel chuan a pawmzam tan ta mek a. Ram thenkhatah chuan dan angin an inneihtir ta hial bawk. Medical science-a rilru lam natna thliar hranna zing atang pawhin – ‘abnormal behavior, rilru lam fel loh thil lutuk pawh a ni love, an rilru an pekna – orientation hi a dang ve mai a ni’ tiin an lo thaibo tan ta mai a.

India ramah ngei pawh, ‘He thil hi sual, crime a nih avangin a tite chu hrem tur an ni e,’ an tih thin chu, ‘Mi sual an ni hlei nem, hrem kher a tul love’ tiin tun hnaiah Delhi High Court ah a lo chhuak ta phut mai a. Chu chuan thawm chi hnih ring em emin a chhuah ta a, Chi khatna chu lawm hlim au ri a ni. Hetiang rilru pu, a ruka hrem hlau taka inthup chunga inthlahrung em ema khawvel lo hmang vete chu lawmin an lo au chhuak a, kawng an zawh a, zalen zawkin an nihna chu an puang chhuak ngam ve ta a. Chutih rual vek chuan kohhran hruaitute leh mipui mimir tam zawk chuan pawmzam chiah ngai lovin a dodalna thu kan chhuah mek bawk a.

Hetih lai hian kan Bible-in min hrilhna thute chu ring pui puiin chhiar ta ila, mi tam tak chuan inven nana kan hman zui theih laiin chutiang rilru pu chu hlau leh zaka kimkiin kan siam thei bawk si a. Mahse hetiang khawvela kan chen mek lai hian kan rinna hi a nghing thiang lo vang. Bible zirtirna hi kan hnualsuat thei lo. Kohhran chuan engtik lai mahin a pawmzam ngai dawn bawk hek lo.

Bible ah engtinnge?
Bible ah hian homosexual chungchang hi chang hmun sarih ah a lang a, mipa nawhchizuar chungchang hi hmun ngaah a lang bawk a. Heng Bible chang khawiahmah hian ngaihzamna thu a lang lo va, sual dang aia a uchuak bik thu pawh a ziak hek lo. Hmun thenkhatah chuan a ziak na khel khawl khawp mai. Sualna dang ang bawk a ‘tihhlum tur, vanram pawh kai lo tur’ an ni tawp mai.

Kan ngaihtuah ngai ta zawk chu
Mi sual an ni emaw, dan bawhchhiaa hrem ngei tur an nih leh nih loh emaw, vanram an kai tur leh tur loh emaw hi chu la khek hrih lawk ila. IPC Section 377 hi an tidanglam dawn nge dawn lo tihte pawh hi kan sawi phak lutuk a ni lo mai thei a. Mi tinin kan ngaihtuah theih erawh chu - Ka fapa hian / ka fanu hian hetiang hian a mipatpui, a hmeichhiatpui kawp se ka duh leh duh loh thu hi a ni. An nih dawn leh dawn loh chu nu leh pa leh chhungte kutah a innghat thui hle an ti miau si a.

Homosexuality hi ven theih a nihna a tam avangin chu lam chu sawi thui hret ka duh. Inven dan sawi chiang tur chuan a awm chhan kan zir chian phawt a ngai a. Mi tam takin homosexual chungchang hi an lo zir chiang tawh a, engvanga hetiang hi lo ni ta mai nge tih hi an zir nasa em em a.

Homosexual awm chhan

• A chhan pakhat mal khai tur a awm fak lo. Thil chi hrang hrang inchawhpawlhin a thlen thei.
• Taksa chhungril te, hormones leh thluak lam zir chianna tangin inthlahchhawn theih chu niin a lang lova, taksa insiam phung danglam bik leh a nih tur ang nih loh vang pawh a ni vek lo. Pianpui a ni ber lo.
• Zirmite lungrual tlanna tak pakhat chu ‘zir chawp’ tih a ni. Zir luih tihna a ni kher lo.
• Nu leh pa leh fate inkar inlaichin danin a thlen thei. Chhungkuaa pa ber a chak lohna, a nep na, a thu lohna, a ropui lohna leh nu ber a huaisarna, a nasatna, a huangtauna inchhunga fateah a awm duh bik tlat an ti. Chutiang inah chuan mipa naupangin a mipatnaah inrintawkna a nei zo lo thei a, hmeichhe bulah a zam zual thin a. Sex-a kawppuiah pawh mipa a thlang thei ta thin a. Hmeichhe naupangin a pa chu a ngainat loh avang te, a star loh avangin mipa chu a vai ngainat ta lo vek a, mipa bula awm dan a thiam ta lo a, hmeichhe bul nuam a ti zawk a, sexual partner-ah pawh hmeichhiaah bawk a confi thin.
• Nu in hmeichhe dang a rin loh emaw a hlauh emaw a, chu chu a fapa a zirtir chuan mipa naupang chuan hmeichhia a hlau ve a, mipa lamah a tlan phah thei.
• Nu in mipa a hlauh emaw a rin loh thu a fanua a tuh chuan hmeichhe naupang chuan mipa a hlau a, a hmeichhiatpui lam a nel ta thin.
• Mipa naupang chu hmeichhe rual zinga sei lian a nih chuan hmeichhe rilru leh chetzia a la ve thei a, chumi avang chuan chhaih leh dem a hlawh a, chu chuan hmeichhe rilru a siam zual a, homosexual dang ten an lo it phah bawk a, amah pawh a inngai homosexual hlauh thei a, hmeichhia ngaihzawn aiin mipa a ngaizawng hlauh thei.
• Nu leh pain hmeichhe fa an awh viau a, an fapa pawh an hmeichhe chei tak mai chuan mipa naupang inhriatna a tibuai leh thei bawk.
• Mipa naupang chu a pain a duh loh leh a lawm vak loh chuan mipa a nihna a famkim lo thei a, a mipatnaah a inring zo lo a, hmeichhia a ngaizawng ngam lo thei.
• Hmeichhe naupang pawhin chutiang inlaichinna tha lo chu a nu lakah a neih chuan a hmeichhiat nihna a buai thei a, mipa a ngaizawng ngam lova, hmeichhiaah a tlan thei.
• Khawi hnamah pawh mipa leh hmeichhe awmzia hi kan zir thar vek a. Mipa leh hmeichhe nih dan tur pawh ziak loh dan a awm vek a. Chutiang inzirtirna mumal awm thei lo khawpa nun a buainaah chuan naupang rilru a thang dik lo thei. A opposite sex lakah an dawih a, an mahni anpui lakah an intulut duh fo.
• Hauhna : Opposite sex te nena tlangnel taka inkawm theihna remchang a awm loh chuan timna, zamna a awm thei a, opposite sex ten an hnawl an nih chuan hlauhna an nei thei a, khawih chhiat (sexually abuse) an nih chuan an hlau hlen thei ve bawk.
• Hriat ve chak vang te, duh reng vang te, a remchan avangte pawhin a thleng thei. An tawnhriat chhin tawh (jailah te, hostel-ah te) zawngchhangna a awm thei bawk.
• Mipa leh hmeichhe inneihna hmuhnawm tak, nawm hmel tak hi naupangin an hmuh loh a, nu leh pa inhau, insual reng an hmuhte hian mipa leh hmeichhe inngaihzawnna leh inneihnate hi an it lo thei a, a lehlam zawk an awn thei bawk.
• A awmchhan khaikhawm nan chuan : Mi thenkhatin taksa insiam fuh loh vang emaw, piansualna chi khat ve reng emaw, chutiang tura Pathian siam ve hial emawte an tih laiin chumi evidence chu a dik tawk zo lo tlat a. Danglam bikna hran awm miah si lova ni tlat an tam viau si avangin ‘Pianpui ai chuan pian hnua inlaichinna leh awm danina a hrin a tam zawk’ tih hi an thu vuak thlak a ni ta fur mai a. ‘Chuti a nih chuan ven theih a nih dawn chu’ tih boruak a lian ta hle mai a ni.

InvennaPathian hnena kan tawngtai hian a chhanna hi eng (light) angin emaw a rawn thleng kher lo fo a, engmah ti lova kan thut mai mai lai hian rin loh lam atangin a lo theng phut reng bik hauh lo mai a. Pathian hian keimahniho tho hi hmanruaah hman min duh. Pathianin a duh loh em em, homosexual ni lo tur hian inven dan a awm a, chu invenna chu ‘chhungkaw inenkawl dan dik’ (kan tan chuan Kristian chhungkua kan tih fo) ah hian a innghat a, nu leh pa tin kutah a innghat dawn a ni tih hi research in a hmu chhuak tawh tlat.

Irving Biebar-a’n nasa fea a zir a hmuh chhuah chu, ‘He thila invenna tha ber chu pa leh a fate inkara inlaichinna nghet leh hlimawm tak a awm hi a ni’ a ti tlat. Pa leh fapa inlaichinna tha a awm chuan mipa naupang kha a paah a in identify chiang a, mipa a nihna a chiang a, mipa nih nuam tihna a nei a. Pain a fapa an fiam nawk nawk a, a hrawm nawk nawk a, an vawrh a, a lo dawng leh angte hi an mipatna siam puitlingtu atan a tha em em a. Chutia an intih lai vel chuan nu khan lo khap ta se, pain a tihluih zela naupang a hlim bawk chuan naupang kha a nu lak atangin a inlahrang ve thei ta a, a mipa nihna a lo famkim thei ta a. Nuin lo khap khan an infiamna kha titawp ta se la, pa leh fapa inkara inlaichinna dik kha a insiam thei lo a ni a ti. Kum 3 an nih vel thlenga hetianga hlim taka ‘pa’ tak sia an infiamna hian rah duhawm a chhuah thei tlat a ni.

Puitling leh naupang upa deuh thlengin an naute an en dan, an biak danah hian an mipat hmeichhiatna a siam dik pui bawk a. Mipa naupang kha hmeichhe naupang ang maia a awm tum a, ‘Mipain khatiang an ti ngai lo’ tia lo khap zauhtu an awmte hian hna tha a thawk a. Chu chuan an nihna tur thui takin a pui thei.

Nuin a fapa mipatna a pawmpui a ngai a, mipa a nih anga a theihna leh thiamnate a hlimpui a, a fuih a, a hlauhna leh zamnate a hnehtir a tul bawk.

Nuin mipa a zahna hrim hrim a tihlan fo hian naupangah rah tha a chhuah a. Pa awm lohna emaw, pa chak lohna chhungkuaah pawh nuin pa ber a tihzahawm a, mipa a zahna a lantir fo chuan mipa naupang khan mipa nih ngaihsanna a nei a, chu chuan a veng thei bawk.

Naupang hian inneihna hlimawm tak an hmuh a ngai a, mipa leh hmeichhe inneihna leh mipa leh hmeichhe inkara hmangaihna hi a mawiin a ngaihsanawm a, a nawm hmel a, a hlimawm a ni tih naupangin an hriat theih ngeina turin nupa inlaichinna dik an hmu ngei tur a ni. An inneihna hmuh thin chu a hlimawm loh, inhauh leh innghirnghona hlir a nih chuan mipa leh hmeichhe inngaihzawnna chu an duh ve lo thei a, an mipatpui, an hmeichhiatpui zawkah lunglen hnemna an zawng thei thin.

Mipa tan a mipatpui infiampui tur neih a tha bawk. Hmeichhe naupang tan pawh chuti tho.

Nu chu a fate hmaah zahawm takin a khawsa tur ani a, pa pawhin a zahawmna a vawnsak tur a ni, nupatna hmang lai naupangin an hmu tur a  ni lo.

Naupangte chu khawihchhe theitu laka an him theih nan ven uluk tur an ni. Nuapang khuaikhem ching tam tak hi laina hnai, thian tha nia lang an ni fo a, nu leh pate pawhin an fate kalsan ngamna tlaka an ngaihte a ni fo tih hriat tur. Fate hnenah an taksa peng, mi dang khawih loh chi zirtir uar tur a ni a, chutiang khawih an awm chuan rang taka anmahni hrilh tura zirtir tur an ni.

Fate hnenah anmahni tinatute leh an chunga sualte pawh ngaihdam theihna zirtir tel tur a ni. Mahni inkhawngaihna leh mi dang awhna nei lo tura zirtir an ngai. Naupan laia tawh sual tawk, khawih chingpen zingah homosexual an awm thei ngei mai a. Mahse tawh sual tawk zawng zawng erawh chutiang chu an ni zui vek si lo. An danglamna chu an rilru hliam a dam loh fo vang a ni. Huatna te, ngeina te, phuba lak duhnate a reh loh chuan an heti thei. Mi tam tak chuan chu rilru chu kan fateah kan tuh fo. Kan chunga thil tisualtu kan ngaidam loh a, fate hriatah kan sawi fo a, kan fate khawih chingpentu chu kan fate pawhin haw zui se kan pawi tih loh ruk tlat chuan chutiang rilru kal zel chuan he thil hi a thlen thei tlat. Rilru hliam dam lo hi a pawi. Rilru hliam damna chu Kristaah a awm bawk.

Naupangin mipa a nih leh hmeichhia a nih a inhriat tan hun hi thla 8 atanga kum 4 inkar vel a nih avangin chu rilru chu tuh hma a ngai khawp mai. Nakinah a inthlak ve mai ang tia nghah liam a pawi thei.

Naupan laia mize danglam deuh, mipa ni si, mipa naupang infiamna lam aia hmeichhe thil duh zawk tlat, mipa kawm tur nei lo, infiamna ngaina vak lo, naute lem khal thin, hmeichhe inthuamnaa inthuam ching tak, tawng leh chezia pawh nu deuh, inkhualtelemnaah pawh nu lema chang tlat zel, hmeichhia an nih chak zawk thu sawi chhuak fo an awm thei. Hetiang mizia hi kum 2 – 8 inkarah a lang fo a, mi thenkhat chu an kawmte azirin han danglamin lang mahse an tleirawlah a rawn lang nawn fo. Chutiang mizia kan faten an neih chuan enliam mai mai a fuh lo chawk. Pa emaw, mipain an awmpui tam a ngai a, hmeichhe lam inrawlh vak lohna nun nena kaihhruai an mamawh.

Mipa naupang chu a pa nen an inhnaih loh viau chuan a nu hnenah a tlan a, chu chuan a pa nena an inlaichinna a tichhe leh zual a. Pa hmangaih loh nia inhria, a nu lama bet lutuk chuan mipa naupang dang kawm dan pawh a thiam lova, hmeichhe lam a awn a, thiante’n an lo chhaih leh a, chu chuan a tihrilhhai zual a, a nu hnenah bawk thlamuanna a zawng leh a, chutiang naupang chu mipa homosexual hoin an khuaikhem duh chawk a, chu chuan amah kha chutiang mi chu a nia inngaihna a siam zui zel thei.

Nu nena inhnaih lutuk, nu control nasat lutukna kara pa ber inkiltawih, fate pawh kawm nel si lo karah an awm duh bik tihte hmuhchhuah a ni ta zel a.

Kohhran hian thui takin min veng sa. Tunlaia kan sawi fo, Kristian chhungkua, Pathian thu ang chhungkaw inkaihhruaina tha kan neih a, pa ber a lalna leh chhungkaw hotu tak tak a nihna chungkua, nu berin pasalte an zahna, pain a fate a ngaihsak a a hmangaihna chhungkua, nu ber zahawmna chhungkua, fate pawhin zah an hlawhna, thununna dik taka hmanna chhungkua, naupangin nupa hlim tak an hmuhna chhungkua hi Homosexual invenna tha ber chu a lo ni e. ‘Pa leh fate inkarah inlaichinna hlimawm tak a awm phawt chuan tu fa mah hi an homosexual lo ang e,’ an ti hial a ni.

Kohhranah hian Pathian thu mila sex chungchang inzirtirna dik kan pek tam a tul bawk. Hmangaihna te, inthianna te, insum theihna te zirtirna kan uar tur a ni.

Puihna
Homosexual hi Pathian mithmuhah a dik loh thu Bible ah kan hmu teuh a. He nungchang hi kristian tan chuan pawmzam theih a ni tlat lo. Khawvelin pawmzam mahse, puih ngai lo, ‘duhzawng dang lam satliah ve mai an ni, sual a ni lo, hrem ngai an ni lo,’ pawh ti mahse Kristiante tan chuan pawmzam theih a ni ve tlat lo. Puih ngai, chhandam ngai, chhanchhuah ngai an ni.

Mi engemaw zat chu ka lo hmu ve tawh a, puih pawh an harsa ang reng phian a. Mihring rilru insiam thatsak leh inthlaksak hi thil har a tak a ni reng a. Ru lo tur te, mi dang haw lo turte, hmelmate hmangaih turte, dawt sawi lo turtea kan inzirtir tam tawh teh lul nen kan sim famkim thei chuang lo a. Thuhriltu thahnemngai ten, ‘Isuan engtinnge a tih ang? tih ngaihtuah chungin ni tin nun hman tur’ tihte pawh min hrilh zing tawh a, mahse mihringa chakna leh duhna awm thin avang hian Isua kan ngaihtuah thleng lo fo thin a nih hi. Mize hrang hrang insiam that a harsat tluk ang zet hian hengho rilru hi thlak a har khawp. Rilru hi thlak a har e tih vangin inpawmzam vek dawn ta ila, a dik ber chuang si lo. Tualthah duh rilru te, huatna thinlung te, ruk duhna thinlung te hi a dik lo a, mahse miin a thlak theih loh avang hian a dik ta a, pawm zam mai tur  ni chuang lo ang hian, he mipa leh mipa, hmeichhia leh hmeichhia init tawnna hi thlak har hle mahse kristian tan chuan pawmzam chi a ni der si lo.

Hmanniah Psychiatrist rualin kan sawiho a, ‘an mahniin hrehawm an tih loh a, an nun a hlimte chuan inthlaktir an ngai lo’ tih kha ngaihdan, an rilru chin chauh thlira dik niawma lang chu a ni a. Mahse an thlarau nun ngaihtuahtu tan chuan a tawk zo si lo. ‘Kristian psychiatrist ka nihna hi ka theihnghilh thiang lo thin a, Pathian thu atanga dik lo nia lang chu theihtawp chhuaha tih dik ka tum ve thin’ ka ti a. Mahse ka hlawhtlinna rate erawh chu a hniam khawp mai. Pastor-hoin an beramte thlarau nun an chhandam vek thei lo ang deuh hi a ni. Pastor dem zawnga sawi ka ni love, a inthlak tur mihring, a piangthar tur beram hian thu ka awih miau si loh leh ka tum miau si loh chuan, kan pastor-te leh rawngbawtute hian thu tha engkim leh vanram kai chawhlui tha tha pawh min hlui mahse, keimah hi ka inpal liam leh thin ang hi a ni.

Damna chu
Homosexual hi natna, enkawl dam theih loh anga sawi a awm fo. Natna ai mahin nungchang dik lo, tanpuina awmze nei nena hmasawn thei an ni. Anmahni lamah inthlak duhna tak tak a awm a ngai. An nun thlak tur chuan an kawm thinte pawh an kalsan ngam a ngai a, zu leh drugs an tih loh a tul. Mihringte hlawhtlinna chu hniam hle mahse Lal Isuaah an damna a awm.

Homosexual te hi Pathian ngaihin a tenawm uchuak bik em ni? Hnai suh e. Sual dang nen a inang reng a, mahse kan ngai sual bik a, kan hnualsuat bik a ni lo maw? Tualthat pawh tihhlum tur, rukruk pawh phal loh, dawt sawi pawh phal loh, duham pawh phal loh a ni a. Vanram an kai loh dan tur pawh inang reng, Paula pawhin tlar khata a list a dahkhawmte zinga pakhat ve mai a ni. Mahse homosexual te hi kan dem bik a, kan ten bik a ni lo maw?

Vanram pawh chu an kai dawn lo tak tak em ni ang? Leveticus a kan hmuh ang hian tihhlum zel tur chu em ni ta? Thuthung hlui hunah hian dan anga rorel a ni a, chu dan chu mihring ten a siamtu Pathian an hriat a, an hlauh a, Pathian duhzawnga an awm dan tur ziahna a ni a. Dan hmanga rorelna hnuaiah chuan thi tlak, boral tur, chatuana thiam loh chang tur an ni. Thuthlung Hlui danah chuan thiam loh chang ni mahse, Thuthlung Thar, Lal Isua Thuthlung laimu chu hmangaihna leh ngaihdamna, khawngaihna a nih miau avangin, rukru pawh, mi lem bia pawh, Lal Isua hnen an pan chuan an sualte sil faia, Lal Isua hminga thiam chantir, tihthianghlim an lo ni thei ta. Chhandamna kan chang vek thei. Keini mihringte lo rel ve chi a ni tawh lova, Pathian ang maia roreltua tan a, buk lung khaia dem mai lova chhandam an nih theihna tura tawngtaisaktu kan nih theuh a pawimawh hle.

Hengho hi kohhran leh kohhrana mi tinte hian kan puih an ngai. Mi dang pui tur chuan nuihsawh emaw, ten emaw, haw chung emawin a puih theih loh. Lal Isuan misual leh thlemna tawk mekte pawh a hmangaih a. A hnung zuitute hian kan entawn tur a ni ang. Chungho hmangaih theihna leh ngainat theihna pawh kan dil a tul ang.

“Khengbet rawh’ tia au a, ‘Hrem ni rawh se’ tih mai chi a ni lo, ‘Ka pa, anni hi ngaidam rawh, an thil tihsual an hre lo a ni,’ tia Lal Isuan kraws ler atanga a dilsakte kha an ni ve asin. Lal Isua hnungzuiin, kan ngaihdam a, dem mai lova anmahni lainatna thinlung pu chunga fuih chungin, chhandamna an chan theih nana kan dil pui a, anmahni khaichhuak tura kan pen a pawimawh takzet a ni.

I Korinth 6 : 9 - 11 a kan hmuh angin, Pathian ram luah tlak lo - inngaih hmang te, milem betute, uirete, mi hurte, mawngkawhurte, ruk hmangte, mi duhamte, zu ruih hmangte, mi hau hmangte, hleprute kan nih thin kha; nimahsela Lalpa Isua Krista hmingah leh kan Pathianah tlenfai kan ni tawh a, tihthianghlim kan ni tawh a, thiam chang kan ni tawh.