Rorelna tha innghahna lungphum atan Bible

RORELNA THA INNGHAHNA LUNGPHUM ATAN BIBLE
(Biblical Foundation for Good Governance)
 

Rev. Dr. K. Lallawmzuala

Mizoram People Forum (MPF)-te hmalakna avangin kan ram rorelna a kal dik theihna tura rahbi pawimawh tak inthlanna thianghlim leh tha tak kan nei thei thin a. Chu bakah chuan rorelna tha kan neih theihna turin mipui zirtir nan seminar hmun hrang hrangah an buatsaih zui zel a, a lawmawm hle. Seminar paper an buatsaih tawhte ka hmuh theih chin chin ka lo chhiar ve a, zirtirna tha tak tak an pe chhuak tam tawh hlein ka hria. Ka rilrua zawhna pakhat awm erawh chu rorelna dik leh tha beiseia kan inzirtir lai hian innghahna bul bal leh thlen tum chin chiang reng rawng kan nei em tih hi a ni. Kristiante zingah chuan ram rorelna tha kan neihna tura kan inzirtirna innghahna (ideological foundation) atan Kristian zirtirna ngaisang lem lotute ngaihdan (ideology) chu a bulpui berah chuan kan dah thei lovang. Kristiante inzirtirna atan chuan Bible aia bulpui zawk innghahna a awm theiin a lang lo. Chuvangin tun tumah pawh hian Bible zirtirna mila ram rorelna kan kalpui dan tur inkawhhmuhna lam kan hawi dawn a ni. Kan Bible pumpui hi thlirna pakhat atang chuan politics inlumlet boruak hrang hrang kara ringtute hnena Pathian inpuanna angin a thlir theih a. Chuvangin ram rorelna tha kan neih theihna tura zirtirna innghahna tling kan Bible-ah hian a inphum teuh a ni.

1. Lei leh van hi Pathian ta a ni

Genesis bung 1-na atanga chiang taka kan hmuh nghal chu leilung leh a chhunga thil awm zawng zawng hi Pathian siam a ni tih hi a ni. Hei hian thilsiamte hi mihring ta ni lovin Pathian ta a ni tih a tarlang. Lei leh van din chhuaktu chuan ruahmanna mumal tak neiin thilsiam te ber thleng hian a siam a ni. Pathian hian ni ruk chhungin thil a siam zova, a chawlh san nghal ta vang vang a ni lo. A thilsiamte than chhoh zel danah duh dan a nei zui a, chuvangin khawvel leh a chhunga thil thlengah hian a inrawlh chhunzawm zel a ni. Mihringte sualna avangin Pathian thil tum chu a nih tur ang ni pha vek lo mahse Pathian hian a duh dan leh tum dan a sawhsawn chuang lova, a thil tum tithlawhtling turin kawng hrang hrangin hna a thawk chhunzawm reng zawk a ni. Chu Pathian thil tum tihlawhtling tur chuan mihringte pawh hi Pathianin a hmanruaah a hmang thin a, a ram dinpui turin a thawhpuiah min duh a ni. Tunlai Kristian mission zirnaah chuan mission hi a bul takah chuan Pathian ta (Missio Dei) niin an ngai a, mihringte hi chu a thawhpuitu mai kan ni an ti. Pathian mission chuan Chanchintha hrilh darhna mai bakah ram rorelna leh eibar dapna siam that te, khawtlanga diklohna hrang hrang um bo leh Pathian thilsiamte humhalhna kawnga hmalak thleng hian a huam vekin an ngai.

Pathian thilsiam chanchin Bible-a kan hmuh atang hian Pathian chu fel taka reltu leh thil mumal taka kal tir duhtu a ni tih a lang chiang hle. Pathianin lei leh van a siam lai khan lei hi a chhiaa a ruak ngawt a ni a, tui thuk tak chung chu a thim mup a. Chu lei chhia leh ruak (chaos) atang chuan thilsiam zawng zawngte awmdan tur mumal (order) Pathianin a rawn rem fel ta a ni. Thil mumal lo atangin mumal leh fel a rawn din chhuak ta anih chu. Pathian ze pui a thilsiam atanga lo lang chu engkim tha taka rela mumal tak leh fel taka rem thlap duhtu a nihna hi a ni. A thilsiam zawng zawngte tan ram ri kham sakin inmamawh tawn leh inring tawn turin fel takin a rem khawm a ni. A siam mihringte inrelbawlna atan pawh hian rorelna fel leh tha a duh tih hi a chiang hle. Rorelna fel lo hi Pathian nihna ze pui nen thil kaldun thei lo leh inrem thei miah lo a ni. Pathian ringtu dik tak chuan rorelna tha a duh tlat tur a ni a, rorelna tha nei turin a finna leh chaknate pawh a theih tawp chhuahin a hmang ngei tur a ni.

2. Ram chu LALPA ta a ni: Israel-te chuan lei leh van hi Pathian ta a ni an tih rualin anmahni ram luah ngei pawh kha a neitu tak tak chu Pathian anih thu hi nghet takin an pawm. ‘Ram chu LALPA ta a ni’ tih hi ram chungchanga an ngaihdan innghahna bulpui a ni. An ram luah kha anmahni taah an ngai mai lova, Pathianin an pi leh pute hnena a lo tiam tawh hun rei tak hnua a luah tir niin an ngai nghet hle. An ram luah dan an sawi pawhin kan pi pute Aigupta atangin an rawn pem lut a, he lai ram hi engtin tin emaw an luah ta a lawm mawle an ti mai ngai lo. Pathianin a kut chak taka a hruai thu leh harsatna tam tak pal tlanga luah thei tawk an nihna hi an sawi tel ziah thin. Pathian ta luah hawhtuah an inngai a, a neitu Pathian duh dana ram an enkawl loh chuan ram chu an kutah a awm reng dawn lo tih an chiang hle. Zawlneite thuchah laipui ber pawh Pathian duh dana Israel faten ram an enkawl loh chuan ram dangah hnam dang chak zawk ten an hruai bo daih dawn tih hi a ni. A neitu duh dana an enkawl loh chuan ram luah rengna tur right an nei lo tih an chiang hle a ni.

Mizoram mipuite hian kan ram hi Pathian min pekah kan ngai vak lem lovin a lang. Khawchhak lam atanga rawn chhuk thlain engtin tin emaw he lai ramah hian kan khawsa ve ta mai niin kan ngai. Amaherawhchu Israel-te ang hian ngaihtuah chiang ve ngat ila chuan he ram luah tura Pathian min hruaina mak tak hi chu hmuh tur a tam ve ngawtin a rinawm. He ramah hian Pathianin a kut chak takin min hruai lut a, he ram enkawl tur pawhin keini aia rin zawk a nei rih lo tih hi kan pawm dan tur a ni. Amaherawhchu he ram min luah tirtu duh dan lova ram kan enkawl chuan kan kuta dah zui zel hi Pathian thil tum a ni lem lo tih hi Bible zirtirna atang pawhin a lang a ni. Hnam tam tak chimral leh anmahni ram ngeiah chep taka hnam dang ten an awpbeh hriat tur an awm si a. Pathian hriatna tel lova kan ram kan enkawl chuan chutiang chu kan thleng lovang tih hi a sawi theih bik loh a ni.

‘Ram chu LALPA ta a ni’ tih rinna hian ram enkawlna leh rorelna chung changah kal dan tha tam tak a pe a, chungte chu han thlir thuak thuak ila:

(1) Ram hmangaihna rilru a pe:
An ram chu Pathian hnen atanga an dawn leh an rochan ngei nia an ngaih tlat avangin an ngaihlu a, chu chuan ram hmangaihna rilru a pe nasa hle. An ram tan mawhphurhna neiin an inngai tlat a, chuvang chuan an chakna leh theihna zawng zawng ram tan an pek phah thin. Israel ram hmu tawhte chuan khawvela ram tha lai ber a nilo tih chu an chiang ngawt ang le. Mahse an ram sawi nanah ‘khawizu leh hnute tui luanna ram’ tih an hmang fo thin. Pathianin ram a pek chu hmusit lovin duat takin an enkawl a, an theihna zawng zawngin an ram that nan an thawk thin a ni.

Mahni ram hmangaih na chang hriat hi kan thanharhna tur pawimawh tak a ni. He ram hi Pathianin mak tak maiin kan pi leh pute hruaiin min luah tir ngei a ni tih hi kan pawm tlat tur a ni. Pathianin min pe lo se kan vela hnam chak tak tak hian kan luah hmain an lo nei daih tawh ngei ang. Tin, kan ram hi khawvela a chhe lai ber changah kan inngai palh mai ang tih a hlauhawm khawp mai. Khawvel ram zau zawk hmu tawhte chuan kan ram sik leh sa nawm zia te hi an chiang ngawt ang. Ruahtui thlai ngeih tawk turin kum tin khel lovin kan dawng a, lei a thain kan ramah hian thlai tinreng a tha duh em em a ni. Ram hmangaihna leh thahnemngaihna nen kan ram hi kan enkawl a hun ta hle mai. He ram hian ruk saktu ni lovin hmangaih taka enkawltu a mamawh a ni. Ram hmangaihna nei lo zingah ram rorelna tha a piang ngawt thei lo. Ram din chhuah nana pawimawh hmasa ber chu ram hmangaihna dik neih hi a ni. Kan ram hi kan hmangaiha, kan tih theih sang ber a tana tih theuh kan tum chuan hmasawnna leh rorelna tha hi chu kan nei ngei ang.

(2) Ram insem an uluk: Ram chu Pathian hnen atanga an dawn anih avangin Israel zinga chhung tin ten ram leilungah chan an nei theuh tur a ni. Josua hova Kanaan ram an luh khan hnam sawm leh hnam hnihte hnenah an ram chan tur theuh pek an ni a. Hnam (tribe) hrang hrangin ram an insem bakah khan khaw (Heb. Mispaha) tinin an insem darh leh a. Chutah chuan chhung tin (Heb. Beth Av) ten chan an nei hrang leh theuh a ni. Hmanlai Thuthlung Hlui hunah chuan mi zawng zawng deuh thaw thlai chin leh ranvulh-a innghat an ni a, ram nei velo tan chuan din khawchhuah ve ngaihna a awm lo tluk a ni. Chutiang khawvelah chuan mitinin ei an hmuh theih nan a rual khai thei ang berin Pathianin a pek ram chu insem an tum thin. Miin a lo ram retheihna avangin emaw harsatna dan rualloh avangin emaw mi hausa zawk kutah lo hralh pawh ni sela, Jubilee kumah chuan a tira a neitu hnenah pek let leh ngei tur a ni (Leviticus 25:23-28). Pathian hnen atanga a dawn anih avangin mihausain mirethei ram a neih hlen sak a thiang lo a ni
Israel ramin lal neia ro an inrel hnu khan kum khat tla khawp thar tura lo neih (tribal subsistence economy) kal sanin sumdawnnaa hlawk tham thar chhuah tuma lo neih (commercial-oriented economy) lam kawng an zawh ta a. An thlai chinah pawh sumdawn nana hlawk tur thlai olive te, grape te, rimtui (perfume) lam leh ranvulhah pawh beram hmul (wool) tam tham thar chhuak thei turin tan an la a ni. Lal sual deuh leh mi hausa intelkhawmte chuan miretheite ram an retheihna denchhena lak luih sak an ching ta hle niin a lang (cf.1 Lalte 21). Pathian zawlnei ten huaisen takin chutianga thuneitu leh mihausa intelkhawmte chu Pathian thu atanga an dik loh zia an rawn au chhuah pui ta a ni. Kum zabi 8-na lai phei kha chuan mihausate kutah ram zau tak a tlu lut tawh a, mirethei zawkte an ram atanga nek chhuakin an dinhmun a chau em em a ni (Isaia 5:8-10). Chutiang karah chuan mirethei zawk ten ram an neih let leh theih nan zawlnei ten huaisen takin hma an la a ni (Mika 2:1-2).

Mizoramah pawh hian hman lai atangin kum khat tla tawk thar turin lo kan nei tlang pui a, chhungkaw pakhatin ram zau tak kan mamawh thin lem lo. Lal thuneihna hnuaiah vantlangin ram kan intawm a, lo atan kan mamawh angin kan insem den den thin. Tunah erawh chuan sum chang thlai (cash crop) chin a hlawk tih hriain teak huan leh thil dangah ram kan mamawhna a nasa sawt hle. District Council pian hun kum 1950 chho vel atang khan mimalin ram neih theih dan kawng a rawn inhawng tan a, kum 1991 hnu lam atang phei chuan vantlang ram ni thin kha chhungkaw mal kutah kan sem darh ta a. Khawpuia mihausate kutah thingtlang ram zau tak tak a tlu lut nasa tawh hle a ni. Nakin lawkah chuan thingtlang miretheite hi mihausate ram tunhmaa anmahni ram ngeiah khan an la inhlawhfa ngei dawnin a lang. Ram leilung miin a neih tawh loh chuan a zung atanga pawh phawi ang a ni a, mihausaten an duh duha an chhawr retheih (exploit) tur dinhmunah an ding mek a ni. Keini ang ram retheiah chuan ram leilung aia eibar dapna atana innghahna tling (resource) kan nei si lova, rual taka insem dan thar kan ngaihtuah loh chuan ramin harsatna kan la tawk ngei dawn a ni. Mipui than dan rual khai taka kalpui kan tum anih chuan sorkar hian mimal ram neih theih zat tur bi tuk (land ceiling act) a neih a, khauh taka a kenkawh vat a ngai a ni. Mihausa ten an duh tawk tawk ram tha an invalhna kawng kan hawn reng chuan kar lovah mirethei ram nei lo an pung tual tual dawn a, tunlaia Maoist/Naxalite ho harsatna ang khu kan ramin a la hmachhawn ve thuai mai ang tih a hlauhawm hle a ni.

(3) Rawngbawlna rilruin ram an enkawl: Pathianin ram a pek luah hawhtua an inpawm avangin ram venhimna leh enkawlna chu Pathian rawngbawlnaah an ngai nghet hle. Ram an kuta dahtu chuan duh dan a nei tih hriain a duh zawnga ram enkawl an tum tlat thin. Mitinin an hma zawnah mawhphurhna nei theuhvin an inngai a, ram tan an nun an hlan phal zel. Ram enkawl tur lal leh roreltute chu Pathian tih mi an ni ngei tur niin an ngai a, Pathian tihna nei lova ram enkawltute chu huaisen takin zawlnei ten an dodal thin. Mi diklo leh hlemhlete kutah ram rorelna a awmin an ngawih bo pui mai lova, siam that hna thawk turin Pathian hmingin a rawngbawltute an pen chhuak thin.

Kan ram hi Kohhran chhunga Pathian rawngbawlna lamah chuan kan thangharh hle tawh a. Mahse ram enkawlna leh sorkar hnate hi chu Pathian rawngbawlnaah kan la ngai thei meuh lo. Ram rawngbawl hna – eibar dapna peng tinreng te, inawpna leh rorelna leh khawtlang tana tha tur kan thawh zawng zawngte hi Pathian rawngbawlna a ni tih kan hriat thar a tul hle. Kan hma zawn theuha Pathian rawngbawlna rilru nena ram kan enkawl chuan kan ramah hian dikna leh thianghlimnain hmun lai li a chang thuai ang. Rorelna tha kan tih pawh hi lal leh thuneitute kutah chauh a awm bik lova, mipui nawlpui ten kan mawhphurhna kan hriatnaah a innghat nasa hle a ni.

3. Rorelna dik hi Pathian ta a ni:
Kan ramah rorelna dik a awm theih nan beiseina sang tak nen Kohhran leh sorkarin hmathlir thuhmun kan nei a. Amosa 5:24 “Nimahsela rorelna dik chu lui angin luang sela, felna chu luipui kang ngai lo angin luang rawhse” tih hi sorkarin thupuiah neiin sorkar office-ah chuan he thu hi an tar deuh vek awm e. Mizoram Presbyterian Kohhran pawhin he Bible chang tlawh chhan hian ‘Rorelna Dik’ tih Synod 2009 inkhawmpui thupuiah neiin, Kristian |halai Pawl leh Kohhran Hmeichhia pawhin thupui-ah an thlang ve nghal bawk a ni. Rorelna dik neih chakin kan tuihal tih a chiang hle mai. Rorelna dik chung changa Bible zirtirna lam erawh zir chianna kan nei vak lo niin a lang. Tun tumah hian he tawngkam ‘rorelna dik’ tih awmzia leh kan ram rorelna tha kan neihna kawnga a pawimawhna han chhui thuak thuak dawn ila a tha ang e.

Rorelna dik tia Mizo tawnga kan lehlin hi Hebrai tawng chuan Mispath tih a ni a, chu chu sap tawngin justice emaw judgment tiin emaw lehlin a ni thin. Mizo tawnga kan lehlin dan hi chuan sorkar rorelna emaw roreltuten dan hmanga ro an relna lam chauh a kawk a ang viau. Tin, sap tawnga an lehlinna pawh hian Hebrai tawnga a awmzia hi a let chhuak pha vek lo niin tunlai mithiamte chuan an ngai. He tawngkam hian a hmanna hmun a zirin awmze hrang hrang a nei thei a, awmze pahnih khat chauh nei anga lehlin hi chu a fuh tawk lo a ni. Chuvangin a hmanna hmun (context) thlir chunga lehlin ngai niin mithiamte chuan an ngai. He tawngkam nena awmze thuhmuna an hman dun fo (synonymous parallel) chu Hebrai tawnga Sedeqa hi a ni a, chu chu Mizo tawnga ‘felna’ tia kan dah sap tawnga ‘righteousness’ tia an lehlin hi a ni. He tawngkam pawh hi awmze hausa tak nei tho a ni.

Thuthlung Hlui zirtirnaah chuan rorelna dik (mispath) hi mihring thil mai ni lovin Pathian atanga chhuak a ni a. Pathian chu dikna, felna leh thianghlimna bulpui anih avangin he khawvelah pawh hian dikna chu tundin a tum tlat thin. Pathian ngei chu dikna tungding turin mihringte history-ah hian a inrawlh fo thin tih Israel fate chanchin atangin a lang chiang hle. Rorelna dik (mispath) awmze pawimawh zual Bible-in a sawi dan hrang hrang han thlir dawn ila:

(1) Rorelna dik chu midang tana inpekna hi a ni:
Amosa 5:24 thu hi kan zir chian chuan a hma chang 21-23 ah hian Israel faten Pathian biakna an kalpui dan a sawiselna kan hmu a. Kum zabi 8-na zawlneite hian an hun laia puithiam leh mihausa ten an sakhuana an kalpui dan hleihluak tak kha an sawisel theuh mai (cf. Isaia 1:11-17; Mika 6:7; Hosea 2:11). Zawlnei Mika chuan, “LALPA chu berampa sang tam tak emaw hriak lui singte emawah a lungni dawn em ni?” tiin zawhna “A teuh lo mai!” tia chhan ngei turin a zawt a. Hei hian an hun laia sakhuana an kalpui dan zawlnei ten an pawmpui loh zia a pholang chiang hle awm e. An sakhaw serh leh sangte chu mi hausate inhampuarna leh mirethei zawkte rahbehna hmanruaah a chang mek a. Hetih hun laia thuneitute leh mihausate hian a chenral zawng leh nawmsip bawl zawngin an khawsa nasa hle a, tunlai tawng chuan consumerist culture an nun pui a ni. An sakhaw serh leh sang pawh nawmsip bawl zawng leh a hautak thei ang berin an kalpui a, mihausate nuam tawlna leh an chapona pholanna hmanrua mai a ni tawh a ni. Chutiang sakhua chu an bul hnaia mirethei nitin chaw ei tur pawh lungngaite tan chuan sakhaw awmze neilo leh tenawm mai a ni a. Chutianga sakhua kalpui ai chuan ‘rorelna dik’ (mispath) chu lui angin luang sela, felna (sadeqa) chu luipui kang ngai lo angin luang rawhse tih hi zawlnei duh dan a ni. A sawi tum tak nia lang chu mirethei zawkte tana inpekna leh insenralna chu sakhuana hautak deuhva kalpui ai chuan uar zawk turin a duh a ni.

Kan ramah pawh hian sakhuana kan kalpui dan hi a hautak zawngin ke kan pen nasa tial tial niin a lang. Biak in mawi leh man to neihah te kan intlansiak nasa ta hle mai. Sound system changkang leh tha neihah te kan inel nasa ta khawp mai bawk. Tunlaia kan intlansiakna tam tak hi chu consumerism thil a ni. Kan ramah hian rorelna dik tun din kan tum tak zet anih chuan mirethei leh chanhaite mamawh phuhru zawnga Kohhran pawhin tan lak a hun ta hle. Kohhran hi mihausate ngaihhlut zawng chawi larna hmun mai leh miretheite tel vena phak loh ani mai ang tih a hlauhawm. Mihausa zawkte pawhin rethei zawkte dawmkang zawnga inpekna thar neih a tul takzet tawh a ni. Kan ram hian hausakna engzat pawh neih belh ila, a nei tawh sate nawmchenna mai leh a retheite lungngaihna tizualtu mai anih chuan rorelna dik (mispath) chu kan hlat tulh tulh zawk dawn niin a lang. Mihring pui rethei zawkte tana inpekna hi rorelna dikin min phut tlat a ni.

(2) Rorelna dik chu miretheite lama tan hi a ni:
Bible-ah hian dikna Israel faten an hriatthiam dan langsar tak chu miretheite lama tan hi a ni. Dikna tung ding turin mirethei leh chanhai zawkte lam tan a ngai fo. Lal leh mihausate kutah thuneihna a insawr bing thin a, chu chuan miretheite rahbehna kawng zau tak a hawng thin. Israel hnam chanchina an theihnghilh theih hauh loh chu Aigupta bawiha an awm laia tihduhdahna leh awpbehna rapthlak tak an tuar kha a ni. Awpbehna leh neksawrna kara an mangang au thawm chu Pathianin a lo hria a, chumi chhan nan chuan Pharoa awpbehna awm khauh tak chu su kehin chhandamna ropui tak Mosia hmangin a siam sak ta a ni. Aigupta bawih chhuahnaa Pathian inrawlhna atang hian awpbeh tuar miretheite lamah Pathian a tang tih kan hmu chiang hle. Tunlaia Pathian thu thlir dan lar tak pakhat liberation theology chuan Bible-a kan hmuh Pathian hi miretheite lama tang thin anih avangin retheihna leh inawpbehna laka chhanchhuah hna thawh hi ringtute rawngbawlna pawimawh tak niin an ngai.

Mosia dan Exodus leh Deuteronomy bu-a kan hmuhte pawh hi chik taka kan zir chuan mirethei leh chanhai – fahrah te, hmeithai te, ram dang mi te (gerim) leh pa neilo te humhalhna thu kan hmu tam hle. Heng mite hi khawtlanga mi hnuaihnung leh chhantu nei lo, mite hmuhsit leh endawng an ni a, dan lama humhalh mamawh em em te an ni. Thuthlung Hlui zawlneite rawngbawlna laipui tak pawh mirethei leh chhumchhiate humhalhna lam hi a ni. Thuneitu leh mihausa ten an nawm an maka an chhawr retheih leh aw rawl chhuah thei lova an nekchep tlat thin avangin zawlneite kha miretheite aw rawlah tangin chhan chhuah an nih theih nan huaisen takin an au chhuak thin.

Kan ramah pawh hian rorelna dik leh tha awm tir kan tum tak zet anih chuan mirethei lam tang zawnga sorkar pawhin hmalak a ngai nasa tawh hle. Tunlai khawvelah phei chuan mihausa leh thiltitheite thuhnuaiah sorkar hi a kun thuai thin. Inthlan dawnah mihausate sum ringa politician ten hma an lak chuan an tlin hnuah mihausa thu thuin an awm zui mai thin. Sumdawng hausate sumdawnna kawng sial saktu leh miretheite rapbettu sorkar hmuh tur a tam tawh viau mai a, chutiang sorkar-ah chuan miretheite tan beisei tur a awm ngai lo. Mirethei chhanchhuahna programme kan duante pawh hi mihausate duh tawk chin vel chauh anih chuan a tawk lo hle ang. Ram rorelna tha kan duh takzet chuan kan society-a mirethei ber leh dinhmun chhe berte hmasawnna hi tih takzeta kan beih a ngai a ni. Zawlneite angin heng ho chhanchhuah nan hian ke kan pena, roreltute beng thleng phaka mipuite pawhin aw rawl kan chhuah sak fo a hun ta hle. Rorelna dik keng kawh sorkar chuan miretheite chhanchhuahna hna a takin a thawk ngei ngei tur a ni.

(3) Rorelna dik chu sual huat hi a ni:
Dikna Bible-in a zirtir dan dang leh chu sualna dodala thianghlimna leh felna ngainat hi a ni. Thil diklo leh bawlhhlawh hnawl ngam a, a tha leh fel chawisan ngam hi Bible-a dikna awmzia kan hmuh pawimawh tak chu a ni. Lal leh roreltute chuan hlemhletna leh eiruknate an haw ngam tur a ni a, mi dik leh pawisawilote an humhalh ngam tur a ni thung.

Kan rama dikna tungding turin huaisen taka sual huat a hun ta hle. Misual ten an phu tawk hremna an tuar loh chuan sual kan thlah zalen a ni. Ram rorelna dikah chuan misualte an chepin mi thate an zalen thin. Misualte hremna a na a, mi dik leh rinawmte chawimawina a ropui thung. Thil sual titu man chhuah ngei hrem lova an awm hian sual a tipunlun a, dikna palzutna thalo tak a ni.

(4) Rorelna dik chu rinawmna leh taimakna neih hi a ni:
Rinawmna leh taimakna tel lo chuan rorelna dik a neih theih loh. Israel hnam ten rinawmna leh thawhrimna an tlak chham apiangin Pathian duh dan an hlat a, ram rorelnain a tuar thin. Zawlnei Isaia chuan a hun lai mipuite chu, “I mi liante chu mi helhmang, rukrute thian an ni a; mi tinin tham an duh a, lawmman an um thin” a ti a (Isa.1:23). Hetih hun lai hi Juda lal ram rorelna kawnga an tlukchhiat nasat lai tak a ni a. An ram hruaitute leh mipui nawlpui pawhin thamna lain lawmman leh therhlo an um nasa hle a ni. Chutiang karah chuan rorelna dik a awm thei lo.

Mizoram mipuite pawh kan thanharh a hun ta hle. Rorelna dik nei tur hian ram roreltute chauhin mawh an phur lo a ni. Mipui rinawm leh taima dikna ngainatu kan tam hunah rorelna dik hi chu kan la nei thei dawn chauh a ni. Roreltuten dik taka thil tih tum mahse mipui rilru puthmang a dik loh chuan kawng dik zawh a har em em a ni. Mipui ten hna kan thawh peih lova, kuttling lova sum hai luh kan tum tlat a, mahni hlawkna tur anih dawn chuan thil dik lo tih pawh kan duh zel si chuan rorelna dik chu kan la hlat hle ani ang. Kan ram hruaitute khalh ngil thei khawpa mipuiin dikna leh rinawmna kan ngainat a pawimawh a ni. Democracy ramah phei chuan mipui ten rorelna dik nei turin mawh kan phur nasa hle. Inthlanna (election) thianghlim leh thaa bul tan a pawimawh a, chu bakah ram tana thil tha leh rotling duh nachang hriaa chutiang ti tura roreltute kan nawr reng a pawimawh hle a ni.

(5) Rorelna dik chu dan hmanga rorelna hi a ni:
Israel fate hi hman lai society-ah chuan dan nei chip chiar ber pawl an ni awm e. Mosia dan chip chiar tak Exodus leh Deuteronomy-a kan hmuhte hi society-a nunhona leh inkungkaihna atana pawimawh tak vek an ni. Tumah dan chunga leng an awm lova, retheih leh hausak avangin tumah dan hmaah thlei bik an nei lo. Amaherawhchu a chunga kan sawi tawh ang khan mirethei leh dinhmun chhiate chu an dan hian kawng hrang hrangin a humhalh a ni. Dan hmanga dik taka rorelna hmunah chuan dikna a lal thin a, mi dik leh pawisawi lo tan a nuam a, dan bawhchhetute nun a chep thin.

Kan ramah pawh hian rorelna dik a awm theih nan dan hmanga dik taka rorel kan zir a ngai a ni. Mihausa leh thiltithei deuhte tan dan palzut a la awl a, miretheite chungah erawh dan kan lek na leh hle si ni tein a hriat. Dan hmaa ang khata rorelna dik kan neih hun chuan kan ramah dikna a lal anga, sualnain hmun a chang tlem tial tial dawn a ni. Thil diklo titu chu ram hruaitu lu ber pawh nise dan hmanga hrem an nih ve theih hun a nghahhlelhawm hle. Dan chunga leng bik an awmna hmunah rorelna dik a awm thei lo.

(6) Rorelna dik chu remna leh muanna awmna hi a ni: Rorelna dikin min hruai thlen a tumna chu remna leh muanna a ni. Isarel faten remna leh muanna an sawina tawngkam chu shalom a ni a, hei hian buai awmlohna mai ni lovin hlimna, hausakna, induhsakna leh zalenna nun (wholeness of life) a kawk a ni.

Remna leh muanna nei turin ram hruaitute an pawimawh em em a, chutih rual chuan mipuite pawhin mawhphurhna sang tak kan nei a ni. Ram hruaituten mipuite leh ram venhim hi an hna pui a ni a, hlimna leh induhsakna nun nuam nei tur chuan mipuiten mawh kan phur a ni. Ram nuam siam turin inrintawnna leh induhsaktawnna a pawimawh hle.

(7) Rorelna dik chu kalphung mumal neih hi a ni:
A chunga kan sawi tawh ang khan Israel fate chu ram leilung enkawl danahte kalphung (land sytem) mumal tak nei an ni a. An nunhona peng tinrengah kalphung fel tak an nei a, chu chuan an hnam nun a phuarin kawng dik zawh thei turin a tanpui nasa hle a ni. Ram chhunga rorelna dik awm tur chuan kalphung tha neih pawimawhna hi sawi uar tawk a har hle ang.

Kan ramah pawh hian kalphung dik leh tha nei tura tan lak a ngai hle a ni. Kalphung tha hian sual leh thil thalo tam tak hi a veng thei a, chu chuan dikna leh thianghlimna kawng min zawh luih tir thei a ni. Mimal anga rinawm leh dik tura inzirtir hi a tangkai hle a, chumi zawm thei tur chuan system dik leh thain min phuar a ngai a ni. Sap rinawm tak nia kan hriatte pawh khu kan ramah hian eizawnna kawng rawn zawh ve ta se an rinawm reng thei bik lo mai thei a ni. A chhan chu an kalkawng tur system tha kan la neih tawk loh vang a ni.

(8) Rorelna dik chu intluktlanna hi a ni:
Mihringte hian mahni hma kan sial thiam dan hi a inchen lo hle mai a, eibar dapna leh kan nunhona kawng dangah hian dinhmun a inthlau thuai thin. Israel fate pawh kha an hun hmasa lamah chuan keini anga hnam nun hlawm tha leh intluk tlang an ni ve thin a. Amaherawhchu an ramah rorelna lama inawpna leh an eibar dapna kawnga rawn inthlak danglam hnuah khan mihring dinhmun a inthlau chak hle. Dinhmun inthlauhna chuan thil thalo tam tak a keng tel a, chu chuan nunhona boruak a tichhe thuai thin. Zawlneite rawngbawlnain a ngaihmawh ber pawh rethei leh hausa kar zau lutuk kha a ni. Mahni tanghma hai thiam leh mi duhamte tan kawng zau tak hawn anih a, a thiam velote tan kawng awm mang lova ram a kal chuan dinhmun inthlauhna a nasa tial tial a, chu chuan ram rorelna kehchhia a thlen thuai thin.

Kan ramah pawh hian rorelna dik vawng nung tur chuan a rual thei ang bera kan than tlan theihna hi ngaihtuah a ngai a ni. Hmasawnna kawngah thang viau mah ila kan than dan a rual loh chuan inlungrualna kan hloh thuai ang. Intluktlang tih hian inrualthap tih chu a kawk lova, a theih chin china hmasawn ho tihna ani ber awm e. Rethei leh hausa kar zau luattukna hmunah reng reng muanna a awm thei lo. Ram changkangah chuan thla tin lalut tam apiang sorkarin chhiah hmangin a chhuhsak tam a, a lalut tlemte chu a dim leh hle thin. A hausate chhiah chhun luh hmangin rethei zawkte hamthatna tur zirnaah leh damdawi lam inenkawlnaah te sorkarin ruahmanna tha tak a nei a, hausa tak awm mahse rethei lutuk bik tur a veng a, chu chuan dinhmun inthlau lutuk tur a siamtha thei a ni. Mi duham leh mi pamhamte chauh tana kawng kan hawn zau chuan rorelna dik kan nei ngai lovang.

Tlangkawmna

A chunga ram rorel tha innghahna lungphum atana Bible zirtirna kan han chhawp chhuahte khian kan ram rorelna atana kan mamawh zawng zawng chu a huap kim lo hle ang. Amaherawhchu rorelna tha kan neih nana bul tanna atan chuan a tawk hle tho awm e. Kan ramin rorelna tha kan neih theihna tura inzirtirna kan vawrh darh mek lai hian kan hnam nun innghahna pawimawh tak Bible hi hmun lai li i chantir zel ang u.

Sawiho tur:

1. Mizoram mipuite hian kan ram hi kan hmangaihin kan hria em? Engtin nge tun aia nasa zawk hian mipui ten kan ram hi kan hmangaih theih ang?

2. Ram rorelna tha kan neihna daltu kan ram kalphung (socio-economic & political system) thalo nia kan hriatte sawi chhuak ila. A siam thatna tura ngaihdan kan neihte sawi ni bawk se.

3. Kan ram hmasawnna hian miretheite leh mihausate inkar a tizau tial tial nge a tizim tial tial? Tun aia rual zawka kan than tlan theih dan a awm a ngem?

4. Ram rorelna tha neihna tura inthlanna (election) thianghlim leh dik neih a tulna chhan engte nge?